Daabaco Boggan | Print

Wasaaradda Macdanta iyo Biyaha ee Maamulka Somaliland oo Xaqiijisay in Xiriir Dhexmaray Shirkadda Batroolka ee Lundin Oil ...

Warar horraantii Febraayo (2008) lagu faafiyey shabakadaha ay xogta isku dhaafsadaan dadka saamiyada ku leh Suuqa Ganacsiga Australia, oo soo xiganeyey warar ay faafiyeen warbaahinta Hargeysa, ayaa sheegay in uu wadahadal u socdo Wasiirka Macdanta iyo Biyaha ee Somaliland, Qaasim Sheikh Yuusuf Ibraahim iyo shirkadaha Range Resources & Africa Oil, wadahadalkaas oo ku saabsan heshiis wax-soosaar-wadaag ee Batroolka.

Haddaba, war ay (9 February 2008) faafisay Somaliland Times ayaa sheegay in Wasaaradda Macdanta iyo Biyaha ee maamulka Somaliland ay xaqiijisay in uu jiro xiriir dhex maray wasaaraddaas iyo shirkadda batroolka ee Lundin.

Tarjumadii warkaas oo ku qornaa Af-Ingriisi iyo faallada SomaliTalk.com hoos ka akhri:

I. Lundin MA-OGTAHAY: Shirkadda LUNDIN in uu madaxweyne ka yahay Ian H. Lundin oo ay walaalo yihiin Lukas H. Lundin oo ahaan jirey madaxweynihii CANMEX. Mase ogtahay in labadas shirkadoodba ay yihiin mataano asaaskooda loo tirinayo in uu lahaa Adolf H. Lundin (eeg hoose). L. Lundin Shirkadda CANMEX in markii shan (5) maalmood oo keliya [Oct 11 - Oct 17, 2006] laga soo wareegey markii ay heshiiska qabyada ah ee ku saabsan khayraadka Puntland la gashay Range Resources in uu is-casiley Lukas H. Lundin oo ahaa madaxweynihii shirkadaasi CANMEX ilaa 1996, waxaana lagu bedeley ninkii heshiiska la soo galay Range Resources ee magaciisa la yiraahdo Mr. Richard Schmitt. Sharraxaad lagama bixin sababta isku soo beegtay is casilaada madaxweynihii shirkadda CANMEX ee reer Sweden iyo heshiiska ay la gashay Range Resources. Mase Ogtahay in shirkadda CANMEX aysan ilaa hadda lahayn website u gaar ah oo laga heli karo akhbaarteeda ama taariikhdeeda. A. Lundin Lukas & Ian H. Lundin waxaa dhalay Adolf H. Lundin oo loo tirinayo in uu ahaa maskaxdii ka dambeysey shirkada macdan qodista ee CANMEX, iyo shirkada macdan/shidaal qodista ee LUNDIN waxana uu September 30, 2006 Adolf H. Lundin  ku dhintay magaalada Geneva ee dalka Switzerland halkaas oo uu deganaa. Lukas oo sida kor xusan uu dhalay Adolf ayaa ahaa madaxweynaha shirkadda macdan qodista ee CANMEX, waana ninka uu xusay Gaagaab mar uu la hadlayey baarlamaanka Puntland,  inkasta oo uusan xusin in mr. Lukas uu shirkadaas madaxweyne nimadeedii iska casiley shan maalmood oo keliya markii ay kasoo wareegtey  heshiiskii dhex maray Range iyo CANMEX ee kusaabsanaa khayraadka Puntland.

CANMEX MINERALS CORPORATION was incorporated on March 29, 1993 under the laws of British Columbia. Its principal business activities are the acquisition, exploration and development of mineral properties in Mexico. Read Here...

Agaasimaha Guud ee Wasaaradda Macdanta iyo Biyaha (WMB), Axmed Ibraahim Suldaan ayaa xaqiijiyey in wasaaraddiisa ay la soo xireertay shirkadda lagu magcaabo Lundin Petroleum ee laga leeyahay dalka Sweden, shirkaddaas oo WMB kala hadashaday shatiga (ama laysanka) sahaminta batroolka.

Isagoo ka jawaabayey warar ay baahisay warbaahintu ee la xiriirey in WMB ay ku dhex jirto qorshe ah in  batroolka iyo gaaska Somaliland ay heshiis ama qandaraas kula geleyso shirkadda reer Australia ee Range Resources iyo jaalkeeda ka hawl gasha Puntland ee Africa Oil iyo shirkadda Lundin Petroleum, waxa uu Axmed Ibraahim Suldaan qiray in wasaaraddiisa ay wada xiriireen Lundin, waxana uu sheegay in wararka warbaahinta ay wax run ka yihiin, gaar ahaan in WMB ay warqad u qortay Lundin oo weydiisey in ay caddayn ka bixiso meesha ay ka taagan tahay Range iyo Africa Oil. Laakiin Suldaan waxa uu beeniyey in in wasaaraddiisu ay wax xiriir ah la yeelatay Range.

"Lundin waxa ay si qeexan noogu sheegeen in aysan wax xiriir ah la lahayn haba yaraatee shirkadahaas la xusay (Range & Africa Oil). Haddii ay caddaato in shirkadda Lundin ay wax xiriir ah la leedahay Range/Africa Oil ama saamileyda danaha ka leh Puntland, wasaaradda (Macdanta iyo Biyaha) wax ay ku darsan doonto ma jirto shirkaddaas Lundin," ayuu yiri Axmed Ibraahim Suldaan.

Agaasimaha Guud ee WMB oo hadalkiisa sii watey waxa uu yiri "Waa qayb ka mid ah hawlaha wasaaradda in ay wax ka ogaato ama baaritaan/su'aalo weydiiso shirkadaha danaynaya in ay ka hawl galaan Somaliland, waxayna wasaaraddu xaq u leedahay cidda ay la xaajoonayaan."

Suldaan oo faahfaahin dheeraad ah bixinayey waxa uu yiri: "Heshiis lama gelin Lundin, mana siin (shirkadaas) wax shati (laysan) ah oo ay kaga hawl geli karaan dalka. Xiriirkii na dhex maray (shirkadda) Lundin waxa keliya oo uu ahaa is-barasho rasmi ah iyo akhbaar, sida xaqiiqada ahna wax war dambe ah kama maqal shirkaddaas in muddo ah."

Haddaan halkaas kaga gudubno tarjumadii, oo aan faallo kooban ka bixino, aan marka hore is weydiino su'aasha hoose:

Maxaa ka jira in Shirkadda Lundin aysan Wax xiriir ah la lahayn Africa Oil?

Sida ku cad qormada sare, shirkadda Lundin Petroleum waxay sheegtay in aysan wax xiriir ah haba yaraatee la lahayn shirkadda Africa Oil. Haddii ay Lundin hadalkaas tiri, waxaa halkaas ka muuqata sida shirkadaha usoo sahan tegey dhulka Soomaalidu degto ay iska dhaadhiciyeen in dadka dega Geeska Afrika aysan waxba akhrin ama adduunka la socon. Malaha madaxda Soomaalida ayaan wax akhrin!

Xiriirka 'Lundin Petroleum' iyo 'Africa Oil':

Si aan u fahamno xiriirka labadaas shirkadood, waxaan dib ugu laabaneyaa markey taariikhdu ahayd March 29, 1993 xilligaas oo ay ahayd markii shirkadda CANMEX MINERALS laga diiwaan geliyey magaalada Vancouver ee gobolka British Columbia ee galbeedka dalka Canada. Shirkadaas waxaa loo asaasay in ay macdan ka baarto dalka Mexico. Haddii aad u fiirsatid CANMEX waxa laga soo gaabiyey CANADA + MEXICO.

Shirkadaas waxaa lagu tiriyaa in uu maskaxdii asaastay lahaa Adolf H. Lundin oo ahaa mulkiilihii shirkadda Batroolka ee reer Sweden ee LUNDIN PETROLEUM. Shirkadda CANMEX waxaa markey taariikhdu ahayd Sept 24, 1996 madaxweyne u noqday Lukas H. Lundin [oo uu dhalay Adolf H. Lundin], waxana uu madaxweyne u ahaa ilaa Oct 17, 2006 oo aan arki doono sababtii uu isku casiley.

Lukas H. Lundin, jagada madaxweynaha shirkadda CANMEX ka socokow, waxa uu ahaa Agaasimaha iyo xubin ka mid ah qaanbixinta shirkadda LUNDIN PETROLEUM laga soo bilaabo sannadkii 2001 ilaa hadda. Waxa kale oo shirkaddaas Lundin Petroleum guddoomiye ka ah walaalkiis Ian H. Lundin, laga soo bilaabo 2002.

Lukas H. Lundin intii uu ahaa madaxweynaha shirkadda CANMEX, waxa ay shirkaddaasi wada xaajood la gashay shirkadda RANGE RESOURCES ee laga leeyahay Australia. Wadahadalkaasi waxa uu ku saabsanaa in CANMEX iyo RANGE uu dhex maro heshiis ku saabsan sidii ay u qaybsan lahaayeen saxiixii ay Range ka haysatey madaxda Puntland ee ku saabsanaa baaritaanka khayraadka dabiiciga ah ee kujira Puntland 100%.

Bidix: Lukas & Ian H. Lundin| Sawirka: lundin-petroleum

Wadahadalkaasi waxa uu si rasmi ah u soo shaac baxay October 11, 2006 markaas oo warsaxaafadeed ay soo saartay shirkadda Canmex Minerals ay ku sheegtay in ay heshiis is afgarad ah la saxiixatay Range Resources oo ay heshay xuquuqda 80% baaritaanka dooxada Nugaal iyo Dharoor ee Soomaaliya (Puntland).

October 17, 2006 oo ay dhawr maalmood oo qura ka soo wareegtey heshiiskii is afgarad ee RANGE iyo CANMEX ee kusaabsana bartoolka iyo macdanta Puntland kaddib, ayaa warsaxaafadeed ka soo baxay Canmex Minerals waxa uu shaaca ka qaday in shirkadaas loo sameeyey madaxweyne cusub oo ah Mr. Richard Schmitt. Arrintaas ayaa ka dambeysey kaddib markii uu maalintaas is casiley Lukas H. Lundin oo Canmex madaxweyne ka ahaa ilaa Sept 24, 1996.

Dadka odorosa siyaasadda Geeska Afrika waxay muujiyeen sababta keentay markii heshiiska Puntland dhacay in shan (5) maalmood kaddib uu jagadii madaxweynaha shirkadda CANMEX iska casilo Lukas Lundin in loo fasiri karo in magaca Canmex laga weeciyo reer Lundin, maadaama xilligaas ay shirkadda aabaha u ah ee LUNDIN ay wadahadal kula jirtey dalka Itoobiya, wadahadalkaas oo kusaabsanaa heshiis la xiriira dhulka Soomaali Galbeed in meelo kamid ah shirkadaasi Lundin batrool ka baarato. Qorshuhuna uu yahay in dadka Geeska Afrika deggan loo tuso in Lundin iyo Canmex aysan xiriir lahayn.

Heshiiska (Itoobiya-Lundin) oo 7dii November 2006 ka dhacay magaalada Addis-ababa waxaa kala saxiixday wasiirka Ethiopia u qaabilsan tamarta iyo macdan qodista, Alemayehu Tegenu iyo Ian H. Lundin iyo agaasimaha guud ee shirkadda Lundin qaybteeda loogu magac daray "Lundin East Africa BV". [Jaanyo 15, 2008 waxay Addis Fortune sheegtay in shirkadda reer Sweden ee Lundin Petroleum ay si firfircoon uga hawl gasho Sudan iyo Somaliland. Wasaaradda Macdanta iyo Tamarta Itoobiya waxay jariidadaas u sheegtay in ay heshiis la saxiixanayaan shirkaddaas.]

Sidaas daraadeed in magaca reer Lundin laga saaro shirkadda CANMEX waxay u muuqatay mid siyaasad ahaan muhiim ugu noqon karta shirkaddaas.

Intaas laguma joogin'e waxaa magacii laga bedeley CANMEX, maadaama magacaasi uu asalkii ahaa CANAD + MEXICO, iyada oo dhulka hadda heshiiska lala galayna [CanMex/Ranger & Puntland] uu yahay AFRICA waa in magaca ay taasi ka muuqato.

Si taas loo hirgeliyo, Agoosto 17, 2007 ayey ahayd markii warsaxaafadeed ka soo baxay madaxweynaha hadda ee shirkadda Canmex, Rick Schmitt, uu shaaca ka qaaday in laga bilaabo Agoosto 20, 2007 magacii Canmex loo bedeley Africa Oil.

Janaayo 29, 2007 madaxweynaha shirkadda Canmex (oo la baxday Africa Oil), Rick Schmitt, waxa uu jariidada reer Australia ee Sydney Morning Herald si qeexan ugu sheegay in saamiga Canmex ay boqolkiiba 13.6% leedahay shirkaadda Abalone Capital, taas oo xiriir toos ah la leh Lundin Petroleum.

Halkaas waxaa ka cad xiriirka CANMEX iyo LUNDIN.

Hadalkii Agaasimaha Wasaaradda Macdanta iyo Biyaha Maamulka Somaliland:

"Lundin waxa ay si qeexan noogu sheegeen in aysan wax xiriir ah la lahayn haba yaraatee shirkadahaas la xusay (Range & Africa Oil). Haddii ay caddaato in shirkadda Lundin ay wax xiriir ah la leedahay Range/Africa Oil ama saamileyda danaha ka leh Puntland, wasaaradda (Macdanta iyo Biyaha) wax ay ku darsan doonto ma jirto shirkaddaas Lundin," ayuu yiri Axmed Ibraahim Suldaan.

Haddaba, Su'aasha ku habboon in la weydiiyo mudane Suldaan waxay tahay sidee ayseysan Somaliland xiriir ula lahayn RANGE, mar haddii ay xiriir leeyihiin CANMEX iyo LUNDIN. Maadaama CanMex ay u xuub siibatey Africa Oil, iyadoo aysan qarsoonayn xiriirka ka dhexeeya Africa Oil iyo Range Resources.

Agaasimaha Wasaaradda Macdanta iyo Biyaha ee Hargeysa waxaa kale oo mudan in la xusuusiyo in maamulka Puntland ay labaatan (20) cisho guduhood [Oct 11- Oct 31, 2006] markii ay xiriirka la yeesheen CANMEX ay ku caddeeyeen in Canmex ay hoos timaado Lundin.

Haddii aad doneysid in aad wax badan ka ogaatid taariikhda shirkada CANMEX (AFRICA OIL), booqo: http://www.sedar.com/

October 31, 2006 ayey ahayd markii Wasiirka Maaliyadda maamulka Puntland, Maxamed Cali Yuusuf (Dr. Gaagaab) oo la hadlayey golaha baarlamaanka Garoowe uu caddeeyey in shirkadaha ay heshiiska la galeen ay ka mid tahay shirkad ka diiwaan gashan Canada laakiin asalkeedu yahay Swedish, waxana uu sheegay in shirkaddaas mulkiilihii lahaan jirey uu dhintay oo uu kala wareegey wiilkiisa.

Adolf H. Lundin oo sida kor ku xusan loo tirinayo in uu ahaa maskaxdii ka dambeysey shirkada macdan qodista ee CANMEX, iyo shirkada macdan/shidaal qodista ee LUNDIN PETROLEUM waxana uu September 30, 2006 (Adolf H. Lundin) ku dhintay magaalada Geneva ee dalka Switzerland halkaas oo uu deganaa. Lukas oo uu dhalay Adolf ayaa ahaa madaxweynaha shirkadda macdan qodista ee CANMEX, ilaa uu iska casiley (October 17, 2006), waana ninka uu xusay Dr. Gaagaab.

Su'aasha ugu dambaysa waxay tahay: Maamulka Somaliland ma sii wadi doonaa heshiisyada mugdigu ku jiro ee shirkadaha Batroolka, mase waa ka joogsan doonaan! - Taariikhda ayaa taas qori doonta.

Waxaa dhammaaday waagii ama waqtigii laga aaminsanaa in Afrikaanku aysan wax akhrin, waxaa hadda dhiman in shacabku la xisaabtaamo madaxda iyo xukuumadaha Afrikaanka si loo gaaro horumarka ay u oomman yihiin dadweynaha ku dhaqan Afrika, gaar ahaan Geeska Afrika.

• Akhri: G/Sare Nuur Cadde Ma aqbali Doonaa heshiiska Range iyadoo aan Baarlamaanka Baydhabo ansixin Sharciga Batrool DFKMG...

Tarjumadii iyo faalladii SomaliTalk.com

Qoraallo hore oo laga qoray CANMEX halkan ka akhri (English)

Faafin: SomaliTalk.com | Feb 13, 2008 | Updated: Feb 14, 2008

Kulaabo bogga  www.SomaliTalk.com  © www.SomaliTalk.com

La soo xiriir: