DEKEDDA BOOSAASO OO AY KU SOO FOOL LEEYIIN LABO DOONYOOD OO LA SHEEGAY
IN AY HUB KA KEENAYAAN YEMEN....
- Ilo wargal ah ayaa sheegay in hubkaas loogu talo galay in lagu
muquuniyo shacabka Puntland, laguna ilaaliyo shirkadaha Batroolka ee
Puntland heshiiska la gashay iyo in lagu dheereeyo xukunka madaxweynanimo ee
Gen. Cadde Muuse ilaa 2013...
Boosaaso, Feb 11, 2008: Warar laga helay ilo wargal ah ayaa tibaaxay
in magaalada Boosaaso ay kusoo fool leeyihiin laba doonyood oo la sheegay in ay
sidaan hub laga soo raray dalka Yemen.
Warku waxa uu tibaaxay in arrintan ay ka danbeysay
ka dib markii GEN. CADDE MUUSE uu xilkiisii madaxtinimadda
soo dhawaaday (Jan 8, 2005 - Jan 8, 2009) asagoo ka ballan qaaday Odayaal
uu shir u qabtay (horraantii Febraayo 2008)
in uu xilka sii hayn doono ilaa 2013 iyo uu jiro qorshe ay soo jeediyeen
shirkadaha sheegay in ay batrool kabaarayaan Puntland oo ahaa in shacabka
Puntland xoog lagu muquuniyo, shirkadahaas bixiyey lacag arrintaas lagu
fuliyo. Si rasmi ah weli looma oga in lacagta hubka lagu soo gaday ay tahay tii
khilaafka dhalisay ee ay bixiyeen shirkadaha Batroolku.
Waxaa warku wuxuu tibaaxay in hubkan uu toos gacanta ugu gali doono madaxweynaha
DGPL, Maxamuud Muuse Xirsi.
Arrintan ayaa lagu tilmaamay in ay caddeyn u tahay in xukunka Puntland
uu sii hayn doono Gen. Cadde Muuse afar sano oo kale maadama aysan cid ka hor imaan kartaa jiri karin.
Dekedda Boosaaso oo lagu sawiray dayax gacmeed | isha:
GoogleEarth.
Arrimahan is-huwan ee ah hadalka Gen. Cadde Muuse u sheegay odayaasha iyo hubka
la sheegayo in uu ka soo degayo Boosaaso ayaa ku soo beegmeya dhawr (ilaa 4) bilood ka
dib mar uu C/laahi Yuusuf garoonka magaalada Garoowe ka sheegay
in: Cadde Muuse uusan madaxtinimadda ku helin si fudud, balse
uu u soo jabhadeeyay. G/sare C/laahi Yuusuf oo hadalkiisa sii watay ayaa
yiri hadeynu aniga iyo Cadde Muuse runta ka hadalno waxaa dhexdeena ku naf waayay dhallin yaro
badan (oo ah ilaa 350). Hadalkaan ayaa
waxaa dhageysanaayay dhammaan isimadda, waxgaradka, iyo shacab weynaha magaaladda Garoowe. Arrintan oo la yaabeen
dad badan oo maqlayay hadlkaas.
Ilo wargal ah waxay tibaaxeen: "Hubkan la sheegayo waxaa ka soo raray magaalada Sanca ee dalka
Yemen Cali Cabdi Awaare oo ah wasiiru-dowlaha Iskaashiga caalamiga ah ee xukuumadda Gen. Cadde Muuse
uu dhowaan soo magacaabay, oo
maalmahan ku sugnaa dalka Yemen.
Xafiiska Mataaxtooyada Gen. Cadde Muuse oo ka hadlay safarka Awaare ku tegey
Yemen ayaa war uu faafiyey February 6, 2008 waxaa lagu sheegay in:
Wasiiru-dowlaha Madaxtooyada ee arrimaha xiriirka caalamiga iyo arrimaha
Bulshada, mudane Cali Cabdi Awaare, ayaa beryahan waxa uu booqasho howleed ku
joogay Dalka Yamen. Wasiirka ayaa intii uu joogay dalkaasi Yamen waxa kulamo
kala duwan la yeeshay qaybaha kala duwan ee dalkaasi Yamen. Mudane Cali Cabdi
Awaare ayaa waxa uu Febraayo 6, 2008 la kulmay wasiirka arrimaha Dibedda ee
Jamhuuriyada Yamen, Dr. Abuubakar Al-Qirbi, kulankan ayaa waxa wasiirka ku
weheliyey qunsulka Guud ee Soomaaliya Mudane Mukhtaar Maxamed Xasan (Mukhtaar
Jeyte). Waa sida uu hadalka u dhigay xafiiska madaaxtooyada Gen. Cadde Muuse.
Cali Cabdi Awaare oo la kulmay Dr. Al-Qirbi, Yemen Feb
6, 08. Sawirka: Madaxtooyada DGPL.
Mukhtaar Jeyte, Awaare iyo Al-Qirbi | Feb 6, 08, yemen: Sawirka: Madaxtooyada
Puntland...
Cali Cabdi Awaare oo Idaacada Codka Maraykanku ay (Feb 6, 2008) wax ka weydiisey
ujeedada safarkiisa Yemen ayaa sheegay in uu la kulmay Wasiirka Kalluumaysiga
iyo Wasiirka Arrimaha Dibadda Yemen, arrimaha uu kala hadlayna ay ka mid
ahaayeen tahriibayaasha ka soo dhoofa Xeebaha Puntland, taas oo weriyuhu
weydiiyey maxay Yemen ka qaban kartaa dadka soo tahriibaya maadaama dhulka ay ka
soo dhoofayaan uu yahay Puntland.. [Waraysigaas
Dhegeyso 'mp3')..
Dawladda Yemen waxay u muuqataa mid dan weyni ugu jirto in uu sii jirto
xukuumada Gen. Cadde Muuse, maadaama ay tahay xukuumad aan ka war hayn waxyaabah
ay Yemen ka samaynaso xeebaha u dhexeeya Jasiirada Suqadara iyo Caluula, halkaas
oo wararku tibaaxeen in yemen ay baaritaan shidaal ka wado, gaar ahaan aaaggaga
loo yaqaan Block 92, 94, & 95.
Hubka la sheegayo in uu kusoo wajahan yahay Boosaaso ayaa waxaa walaac ka
muujiyey shacabka Puntland.
Dadka deggan Puntland qaar ayaa waxeey ku leeyihiin "madaxtinimadda
haloo daayo Cadde Muuse haddii kale bur bur aynu u diyaar garoowno". Waxaase jira in guud ahaan shacabka Puntland aysan wax kalsooni ah ku qabin xukunka
Gen. Cadde Muuse oo dib u dhac weyn, kala-faquuq, musuq-maasuq, nin-tooxsi, cabsi gelin, dhaqaale xumo, waxbarasho la'aan iyo ammaan darri ka dhalatay intii uu xukunka Puntland hayey Janaraal Cadde Muuse.
Dhanka kale waxaa safarka Cadde Muuse ku tegey Addis Ababa (Febraayo 5,
2008) ku wehliya S/Guuto C/laahi Saciid Samatar oo uu dhowaan ku wareejiyey
gacan ku haynta dhammaan aammaanka Puntland, sida Booliska, Nabadsugidda
(sirdoonka) iwm. Arrintaas oo dad badan shaki gelisey maadaama uu (S/Guuto
C/laahi Siciid) dhowaan heshiis qarsoodi ahaa la soo galay shirkadaha sheegta in
ay Batrool ka baarayaan Puntland - heshiiskaas oo ka dhacay magaalada London ee
dalka UK, laguna dhamays tiray magaalada Dubai ee Imaaraadka Carabta, iyadoo
lacagtii ugu horeeysay oo dhan $200,000 Dollar lagu wareejiyey Wasiirka
Amiga DGPL [S/Guuto C/laahi Siciid] ka hor intii uusan Boosaaso ku soo laaban
Jan 21, 2008. Inkasta oo lacagtaasi ay khilaaf ka dhex
dhalisay madaxda sare ee Puntland dhexdooda, haddana waxaa loogu talo galay in
lagu muquuniyo shacabka Puntland si aysan wax su'aal ah uga keenin heshiisyada
ay Puntland la gashay shirkadaha shisheeye, loona dhereeyo waqtiga
madaxweynanimada Gen. Cadde.
Waxaa kale oo jira in dhowaan uu madaxweyne ku xigeenka Puntland, Xasan Daahir (Afqurac), uu idaacad ka hadasha Boosaaso u sheegay: in aan laysku mashquulin cunto dad makhaayad laga siiyo ka dibna la dhaho
'musharax ayaa ahay', qofkii doonaaaya in uu musharax noqdo Laascaanood marka hore
ha soo xoreeyo. Hadalkaas Afqurac ayaa waxaa loo arkay in ay dhabar jab ku yahay
musharaxiinta hantidooda ku bixiya sidii ay isugu sharraxi lahaayeen jagada
madaxweyna-nimo ee Puntland, kuwaas oo dad weynaha maalin walba makhaayadaha cunadda ka siiya marka ay qorshahooda soo bandhigayaan, ama dadka la hadlayaan.
cabaaskk
cabaaskk@hotmail.com
somalitalk.com
Faafin: SomaliTalk.com | Feb 11, 2008 | 
Daabaco
Boggan | Print
Kulan Ku Saabsan Batroolka oo Addis Ababa uga
socda Yusuf, Cadde Muuse & Nuur Cadde: