Gen. Cadde Muuse oo Tabco Hordhigaya Col. Nuur Cadde - Waa Batroolka
iyo markale...
Cadde Muuse oo doonaya in uu si degdeg ah ku ogaado mowqifka uu
ra'iisul wasaaraha cusub ee DFKMG ka qaadanayo heshiisyada Puntland ee
Batroolka iyo shirkasdaha uu wato Cadde Muuse oo muran cusub ka dhaliyey
Gobolka bari.....
Nov 22, 2007 oo ah markii la magcaabay Nuur
Cadde waxaa Cadde Muuse Garoowe ku booqday wafti ka socda
shidaal baarista
Madaxtooyada DGPL ee Garoowe.... Sawirka:
GoogleEarth
|
Magaalada Garoowe waxaa Khamiistii Nov 22, 2007 soo gaarey wafti ka
socdey shirkadda Africa Oil Corp (AOC) oo loo aqoon jirey Canmex
Minerals Corporation. Waftigaas oo uu hoggaaminayey madaxa
shirkadaas, Richard (Rick)
Schmitt.
Waftigaasi oo ka soo degey Boosaaso ayaa si halhaleen
ah gawaari loogu soo qaaday Garoowe si ay isla maanta ula kulmaan
madaxweynaha DGPL, Gen. Cadde Muuse.
Waxaana wararku sheegeen in waftigaasi markii ay ku
soo dhowaayeen Garoowe in qaar loo leexiyey xagga ceelka Conoco, qaarna
toos loo geeyey Garoowe si ay ula kulmaan Gen. Cadde Muuse. Kulankaas oo
waqti kooban qaatay kaddib waxaa waftigii shirkadaasi ay isla maanta
(Khamiistii Nov 22) loo qaaday Garoonka Conoco, halkaas oo ay ka
dhoofeen.
Dadka siyaasadda u dhuun daloola ayaa kulanka Gen.
Cadde iyo waftiga shirkada AOC waxay ku tilmaameen mid lagu soo beegay
magcaabista ra'iisul wasaaraha cusub ee DFKMG, Col. Nuur Cadde, maadaama
la ogyahay in ra'iisul wasaarihii hore ee DFKMG uu jagadaas ku waayey
khilaaf la xiriira xagga Batroolka, gaar ahaan heshiisyadii Puntland
(sida uu Cali Maxamed Geeddi ka qiray waraysi uu siiyey
Raadiyaha
Codka Maraykanka).
Sidaas dareed. kulanakan Garoowe ee Gen. Cadde iyo
shirkadaha sheegaya in ay batrool baarayaan ayaa loo arkaa mid ra'iisul
wasaaraha cusub, Col. Nuur Cadde, ay Puntland ku xusuusineyso in
arrintii keentay khilaafkii Prof. Geeddi iyo Col. Yuusuf, (iyo Prof.
Geeddi iyo Col. Cadde) ee la xiriirtey batroolka ay tahay in uu go'aan
cad ka qaato, si loo ogaado mowqifkiisa ku aadan heshiisyaad Batroolka
ee Puntland la gashay shirkadahaas..
Arrinta kale ee meesha ku jirta ee waftiga
shirkaddaasi ay ula kulmeen gen. Cadde ayaa lagu macnayn karaa maadaama
shirkadda RANGE Resources (ee ay jaalka yihiin AOC) ay saamiyadeedii
suuqa Australia aad hoos ugu dhacayaan tan iyo markii uu Gen. Cadde
Muuse uu kalfadhigii 19aad ee baarlamaanka DGPL (Oct 31, 2007) ku yiri
hadalkii ahaa "Wax badan ayaan ka hadlay kaabayaal dhaqaale
iyo... waxaasi waa dhammaadeen, ma jirto.. cirka ayaan soo dumineynaa oo
waxaas ayaan keeneynaa, wax aan idiin hayo ma leh...."
hadalkaas o loo qaatay in uu ak haray shirkadaha Batroolka.. Markaas
ayaa saamiga shirkadaas hoos u dhac weyni ku yimid.. Kulankan cusub ayaa
markaas lagu macnayn karaa in Puntland ay weli dooneyso jiritaanka
heshiisyadii shirkadahaas.
Arrintaas waxaa muujinaya qoraalo la isku
weydaarsadey shabakadda (hotcopper.com.au) oo ah meesha ay xogta
isku dhaafsadaan dadka saamiyada ku leh RANGE Resources, qoraaladaas oo
muujinaya warar laga soo xigtey madaxtooyada DGPL oo ku qoran AfSoomaali
iyo Af Ingriis oo u muuqda kuwo kala duwan (Warka Af Ingriiska waxaa
loogu talo galay in ay akhristaan dadka saamiyada ku leh Range iyo
AOC..... Wararkaas ka akhri
halkan].
Muranka Cusub ee Shirkadahu ka dhaliyen G/Bari....
Waxaa maalmahan Puntland ka socdey, gaar ahaan Gobolka bari, is
abaabul beeleedyo oo ku aadan shirkadda Range iyo AOC.
Abaabulka ayaa soo shaac baxay kaddib markii koox ka socda
shirkadahaasi ay isku dayeen inay macdan ka baartaan aagga meesha lagu
magcaabo HANTAARA iyo BACAAD oo dhanka bari ka
xigta magaalada Boosaaso. [HANTAARA waa meeshii baaritaan lagu sameeyey
1954 lagu ogaadey in ay ku jirto macdanta Yuraaniyuumka
(Uranium)].
Markii ay arrinta cusub ee shirkadahaasi ku tegayaan aaggaas ay ka
war heleenbeesha Disiishe ee degta meesha lagu bagcaabo Bacaad, ayey soo
abaabuleen ciidan beeleed ka hor taga dadka ka socda shirkaas ee isu
deyeyey macdan qodashada.
Arrintan ayaa reer Puntland soo xusuusineysa murankii ay
shirkadahaasi ka dhaliyeen aagga magaalada Majayahan (oo ah meel lagu
hubo macdanta qaalig aah ee TIIN-KA), halkaas oo iska hor imaad ka
dhacay ay dad Soomaaliyeed ku dhinteen.
Saamiyada RANGE ee suuqa ganacsiga
Australia oo maalmahan aad hoos ugu dhacay...
 |
Xoghayntii Shirkadda Range oo is Casishey:
Qoraal ay maanta khamiis(Nov
22, 2007) shirkadda Range Resources u dirtay suuqa ganacsiga
Australia ayey ku cadaysaty in xoghayntii shirkadaasi, Ms Joanna
Kiernan, ay jagadaasi iska casishey. Shirkaddu ma faahfaahin sababta
keentay is casilaadaas.. Waxaana booskaas xoghaynta shirkada la wareegey
madaxa shirkaddaas Range, Mr Peter Landau.
Col. Nuur Cadde Maxaa Hor yaal:
 Haddii
arrintu tahay sida hadalada dadku ay isla dhexmarayaan Baydhabo oo ah in
Dowlada Ethiopia iyo Maxamed Cumar Xabeeb {Max’ed Dheere} ay heleen
Fursadii labaad, sababtoo ah Dowlada Ethobia ayaa waxay xiriir hoose la
soo sameysay Max’ed Dheere, islamarkaana ka dhaadhicisay in col. Nuur
Cadde ay la shirtagaan, taasoo la sheegay markii uu la kulmaayey
Madaxweynaha DFKMG C/llaahi Yuusuf uu in u sheegey Beelaha Mudulood in
Beesha Caalamka ay wataan Nuur Cadde.. Haddii xaalku sidaas yahay
markaas arrinku waa JUGJUG MEESHAADA JOOG...
Markaas marka laga hadlayo Batroolka Soomaaliya, waa
arrin siyaasad ahaan aan si fudud loo turxaan bixin karin haddii aan
lala iman mowqif sugan oo u cuntami kara shacabka Soomaaliyeed.
Haddiise arrintu aysan sidaas ahayn, oo Col. Cadde uu muujiyo in uu
awoodi karo in uu Itoobiya ka saaro Soomaaliya, caddeeyo in Soomaalida
dhul ka maqan yahay, isla markaasna uu Batroolka Soomaaliya u xilsaaro
dad aqoon u leh, oo uu dalka ka saaro shirkadaha beenta ku soo geliya
Soomaaliya oo inta ay sheegaan in ay shidaal baarayaan dalka kala baxa
macdanta, oo uu heshiisyada shirkadaha lala gelayo ay noqdaan kuwo aan
qarsoodi ahayn, markaas waxaa dhici karta in uu xal ka keeno soo
saarista Batroolka iyo ka faa'iidaysiga khayraadka dabiiciga ah ee
Soomaaliya...
Waxaa kale oo muhiim ah in ra'iisul wasaaraha cusubi
uu ku baraarugsanaado in tartan xoog leh oo xagga khayraadka Afrika ah
uu ka dhex socdo Galbeedka iyo Bariga adduunka.
Madaxweynaha Shiinaha Hu Jintao oo
madaxweyanaha DFKMG Abdullahi Yusuf
Ahmed kula kulmay magaalada Beijing ee caasimada Shiinaha Nov. 7,
2006. C/Laahi Yusuf waxa uu ka qayb galay kulankii loogu magac daray Iskaashiga
Afrika iyo Shiinaha (FOCAC) oo qabsoomay Nov. 4-5, 2006. |
Col. Nuur Cadde sidee ka yeelayaa heshiiska
Shiinaha
Madaxweynaha DFKMG, Col. Cabdullaahi Yuusuf waxa uu
mar sii horeysey heshiis xagga Batroolka ah la galay shirkad lagu
magcaabo CNOOC oo ay leedahay dawladda Shiinaha.
Waxaase jira warar sheegaya in markii uu aad u sii
xoogaystey murankii Batroolka ee u dhexeeyey C/Laahi Yuusuf iyo Cali
Geeddi in madaxweynaha DFKMG lagu qanciyey in uu ka haro heshiiska uu la
galay shirkadda Shiinaha, Puntland-na ku qanciyo in ay faraha ka qaadaan
shirkadaha reer Australia iyo Sweden, oo markaas soo celiyo shirkadihii
heshiiska la galay Dawladii Maxamed Siyaad Barre, ka hor 1991. Sidaasna
lagu saaro Cali Maxamed Geeddi oo watey shirkado yaryar (Kuwait Energy
iyo Medco ee reer Indoniisiya)..
Lama oga fikirka hadda ee col. Yuusuf ee arrimaha
Shiinaha iyo Galbeedka oo ku loo-lamaya Afrika. Waxaase jirta fikir
oranaya haddii Cabdullaahi Yuusuf sii wado xiriirka sokeeye ee uu la
leeyahay shirkadaha Shiinaha, markaas maaulkiisu meel ma gaari doono.
Sidaas oo kale weli lama oga fikirka col. Nuur Cadde
ee ku aadan shirkadaha Shiinaha.
Isku soo wada duub-oo, waxaa aad muhiim ah in Col.
Nur Cadde uu fahmo in arrinta batroolka Soomaaliya iyo mowqifka uu ka
qaadanayo uu ku xirnaan doono inta uu sii ahaan karo ra'iisul wasaare
DFKMG. Sidoo kale waxaa muhiim ah in uu fahmo taageero uu ka helo
shacabka Soomaaliya in ay ku xiran tahay mowqifka uu ka qaato ciidamada
Itoobiya ee ku sugan Soomaaliya. Haddii col. Nuur Cadde uu ku guul
daraysto labadaas qodob (Batroolka iyo Itoobiyaanka jooga Soomaaliya)
markaas waxa uu mari doonaa wadadii Prof. Geeddi.
Faafin: SomaliTalk.com | Nov 22, 2007
| 
Daabaco
Boggan | Print