Gabaygan waa gabay jawaab u ah gabay uu baafin u bixiyay saaxiib abwaan xasan garaad oo dhawaan ku soo baxay inta badan shabakadaha af soomaaliga lagu qoro ka dib waxaan jeclaystay isaga oo abwaanku codsaday qof weliba siday ula muuqato baadida abwaanka ka maqnay inuu la baafiyo inaan ra,yigayga sidaan u arkay u sheego  aniga oo ku tilmaamay baadidaas qarankii umada soomaaliyeed oo dhamaantiis hawada ka baxay sida  muuqaalkii haykalka dowladnimo, magacii wadanka, astaantii iyo calankii, baasaboorkii soomaalida, dhaqankii iyo dhaqaalihii oo ay hada marxaladu marayso in diintiina nin weliba meesha uu doono u adeegsado iyada oo ilaahayna balan qaaday inuu ilaashanayo waxbana aan laga bedelay balse waa aakhiro saman oo meel kasta arintu way gashay bal hadaba gabaygii
   
 
   Bidhaan Qaran

• Ba,da gabay ball aan mariyo baadsho xarafkeeda
  Bajinteeda suugaanta iyo buundadiyo dawga
  Bismilaahi waa magac allee bilow wanaagiiye
  Bidhaan weeye khayrloo belada lagu xijaabaaye
   
  Gabay waa badheedh oo xaqa lagu bikaacshaaye
  Burhaan eebahay weeye   samaha lagu badhaadhaaye
  Marna waa bilaashiyo xumaan lagu basbeelaaye
  Marna waa bilkayd iyo su,aal lagu bariistaaye
  Marna waa bishaaroo dadkaa loogu baaqaaye
  Marna waa buruud oo xumaha lagu badbaadshaaye
  Marna waa biriish oo runtaa looga baxayaaye
  Bal aan mariyo maantoo kaluu baabsan leeyahaye
   
  Ma badbaado ruuxii xumaha buun u tumayaaye
  Muda waxuu barqaystaba marbaa buugga loo rogiye
  Bellaayaada  ninkii baaniyee beenta ehel mooda
  Ee booli quuta ee xumiyo baadilka u heesa
  Mar uunbaa bidhaantiisa iyo  bilig la waayaaye
  Baydkuu  lahaa iyo qabrigaa lagu buquujaaye
  Bahdiisana  ma jiro ruux markaa boos la gelayaa
   
  Afartaa  sidii loo bartay been ma ka ilaashay
  Baydkii abwaan lagu yiqiin boos ma abaaray
  Bilaash looma xaytee bidhaan quruxsan maw yeelay
   
  Bulshadeena oo buug aqoon baadiyaha joogta
  Barashada islaamkiyo quraanka badisa diinteeda
  Sawtii belaayada cadiyo biritish soo duulay
  Baadari talyaaniya sowkii badaha soo jiidhay
  Boortaqiis dhashiisii wataa beledka soo buuxshay
  Bandar iyo magaalo ay dhiseen beledyo waawayne
  Dhaqankeenii ay buufiyeen booska laga saaray
   
  Inagoo birtiyo seefta iyo waran ku bootayna
  Oo aan bilaawaha boggiyo beerka hoos gelina
  Bunduq  rasaas uu baray beliyo hoogoo dhan
  Basbaaska ay nagu rideen manta nagu baahay
   
  Berigaa ragbaa diidanaa booday oo nacaye
  Barsane iyo xertiisii waa kuwii beegsadee galaye
  Waa kuwii banaanada ka raray beeja waynaha e
   
   
  Bashiir iyo ragiisiina ay  boodh ka kiciyeene
  Birta waa kuwii lagu bilqay ee maydku buuxsamay
  Waa tii biritishkii laga raray beledka soomaale
  Sayidkii bilaawaha la dhacay boqonya wayntiiye
  Baadiye beled waa kuwii buunka loo wacaye
  Waa tii belaayadu dhacday ee booska laga saaray
  Badda waa kuwii magansaday ee la baacsadaye
   
  Bedelkoodii bay qaar madoow nagu bareen beene
  Kuwa buundadoodii watiyo barashadii gaalka
  Oo boogahoodii leh iyo beenta iyo tuugo
  Oo aan ka baydhine jidkii buuxiiyaa jira e
   
  Afartaa sidii bilaha khayr baaq ma ugu sheegay
  Boorintii abwaan lagu yiqiin boos maka abaaray
  Bilaash looma xaytee bidhaan quruxsan maw yeelay
   
   
  Garaadoow adigaa baafiyey oo baadhay sheekada e
  Adigaa baadi kaa maqan tahay oo beena aan odhane
  Adigaa murtida baahiyay oo boosinkeed helaye
   
  Beertaada guurtay  ee baxdaye canabku uu buuxshay
  Iyo geela baadida ah ee boobka lagu qaaday
  Iyo gabadh bidhaanteeda weli aad baadhayso
  Bal aan faaladeed bixiyo oo buriyo xaalkeeda
  Balbal iyo  walaac baa dadkii badidood qaadeene
  Balse waa su, aal bilicsanoo maanku buuxsamiye
   
  Qarankiyo bidhaantii dalkiyo calan buluuglayda
  Bulshadeenii soomaaliyee geeska bari joogtay
  Maabkaan ka baadhay oo malaha buurad iyo muuqe
  Booskeedii niman baa gatay oo beeso dhaafsadaye
  Niman bower iyo xoog wataa baando keensadaye
   
  Gumaysaa u baxay oo ma jiro ruux baxsanayaaye
  Buul iyo sar  beer   iyo cariish baadiye-iyo tuulo
  Bananka iyo duurka badda-iyo  webiga boociisa
  Meel baydhsan iyo buurta iyo bacaddaadaa yaala
  Intaba beec ayaa lagu ridayoo bound la dhaafsaday
  Bangiyaa la dhigay rahantii waa la baabsadaye
   
  Bulshadiyo dadkii waa birayn ama inuu boodo
  Baxo oo banaanada u qaxa buubo gebigiisba
  Baabacaha mid laga gooyo iyo boqonka taagiisa
  Iyo biidhe qaate aan ogayn bixisadaa taala
  Oo beeso loo daadiyaa baarcad foofsadaye
  Maandeeq banaan laga helyoo booli lagu qaad
   
  Inta aad hurdada bogan garaad  eed riyada baafin
  Barbarkaaga weeyee  intaad jiifto buulkaaga
  Beertii maqnaydiyo hashii baadidii gabadha
  Bidhaantooda waad sugi bari saadanboo idile
  Ama baafi oo baadi doon qarankan boos waayay
  Ama buurahaa sare ka fuul beladan xiimaysaa
  Ama kaba baqooloo garaad baasaboor doono
  Dhulkan beecsan yaan lagugu qaban boolisbaa jira, e
   
  Afartaa bidhaan ii baxdiyo barashadaydii dheh
  Basarkii abwaan lagu yaqaan booskii ma abaaray
  Bilaashan looma xaytee bidhaan quruxsan maw yeelay
   
  Badidiisa hadal waa bilaash baydka uun dila,e
  Intaasaan kusoo baabayaa  buuradkii gabaye .
   

Fiiro Gaar:- Waa Kan Gabaygii hore linkigan ka aqriso
https://somalitalk.com/web/tag/garaad/
 
Waa Qalinkii iyo Hall_abuurkii
Cabdiraxiin  Hilowle Galayr
abdirihiin1@hotmail.com