Cajeb!!! 

Aadan Maxamed

naaleeye2008@hotmail.com 
 

Ummad waliba waxay leedahay hab ay u keydsato ama u madhxisato soo yaalkeeda, si ay dhaxal ugu reebto jiilalka soo koraya ee mustaqbalka. Soomaalidu waxay aad ugu caantahay suugaanta oo ah maktabadda ay ku keydiyaan taariikhdooda oo jiilba jiil u gudbiyo. 

Haddaba innagoo ka wada dheregsan waxa ay ummaddeennu waayahan dambe ku sugantahay, ayaan isku dayi doonaa inaan waxa jira ku soo bandhigo gabay aan ku magacaabay Cajeb. Gabaygu wuxuu ku halqabsanayaa Maxamed Cali Cibaar oo ka mid ah suugaanyahannada in badan wax ka qoray, kana maansooday, marxaladdan qallafsan ee la soo gudboonaatay ummaddii Soomaaliyeed. 

Waa kan gabagii Cejeb ee akhris wanaagsan: 
 

1. Cibaarow nin caanaad tahoo, curiya suugaane
2. Anna caynka maansada Allaha, Caalimkey baraye
3. Runta kama cabsoodoo xaq waa, inan caddeeyaaye
4. Cillad baa ayaamahan jirtiyo, ceebta tow darane
   
5. Waa kaa dadkeennii is cunay, ee is caydhsadaye
6. Cirkii roobba laga waa markey, nabad ka caageene
7. Cabbiroo wax ii sheeg illeyn, waan cajabayaaye 
8. Soomaali cudur baa ku dhacay, caabuq aan hadhine
9. Caaqilkii dhamaa iyo kuwii, caymin jiray waaye
   
10. Caadaqaate goortuu bataan, layska celineynin
11. Cisigeedii waa kaa  lumoo , ceynkii bow go’aye
12. Waa taa is caasiday dadkina, kala carraabeene
13. Qolo waliba haddey calan sitaan, calal ay jeexdeene
14. Waa taa cidlada ay degtiyo, ciirsili’idaase
15. Cuntadii  sideedii iyadoo, bahal cantuugaayo
16. Waa taa ciyaartii la tumi, weli  caweyskiiye
    
17. Cabbiroo wax ii sheeg illeyn, waan cajabayaaye 
18. Culimadu waxay fari jireen, camalka kii roone
19. Cilmigoogaa loo aayi jiray, casharkey dhiibaane
20. Colaaddiyo waxay damin jireen, balada caabboone
21. Cadaawuhuna kuma dhiirran jirin, carradey joogaane
22. Maantase kuwaa caamadee, kala cadhoonaaya
23. Ee curyaamadii laayay aan, carar awoodeynin
24. Waxay caawa raacdeynayaan, cidi ma suureyne
25. Cadligiyo wanaaggii ka tage, cayn kastuu yahaye
    
26. Caalimiin dar noo sheegtayoo, cabbaya dhiig maati
27. Iyo qaar curraafyaa jiroo, uu cirfiid hagiye
28. Cabbiroo wax ii sheeg illeyn, waan cajabayaaye 
29. Intii cowska lagu muransanaa, iyo caleen daaqa
30. Ee cuntiyo lagu dirirsanaa, wax aan calool buuxin
31. Ciiddeenni niman baa hantiyay, oo ku ciilbaxaye
    
32. Cadow halisa iyo waxa fadhiya, cudud shisheeyaade
33. Cutubyaana weli soo socdoo, lagu casuumaaye
34. Cawaaqibka nalala maagganyahay, caaq midaan garanne
35. Colkan reerka dabargoynayeen, cunugna reebeynin
36. Ee canshuurta weli loogu dari, dumar caruusiina
37. Waa caado soo korodhayoo, nalaku caayaaye
38. Cabbiroo wax ii sheeg illeyn, waan cajabayaaye 
    
39. Baddeennii khayraadku u camiray, een cidina quudeynin
40. Ee uu dahabku ceegaagi jiray, ciidda gudaheeda
41. Nimanbaa maraakiib cashaqoo, madhiyay caydkiiye
42. Cudur iyo sun bey keenayaan carro-sankeenniiye
43. Colal baaba lagu soo dhuriyo, ciidan xoog badane
    
44. Iney cad-cad u goostaan waa taa loo calaamadinnoo
45. Ceeryoon hadduu yahay dhulkaan, caanka ku aheyne
46. Cabbiroo wax ii sheeg illayn, waan caabayaaye 
47. Ummaddii Casiis iyo ka baqi, Caadilka abuuray
48. Ee uu Ilaah caqli ku ladhay, waa is celisaaye
    
49. Calaamadaha ii muuqda iyo, cirirka gowdiida
50. Markaan caalamkaa eegay iyo, siduu u ceeshaayo
51. Kuwa aan waxbaba caabudeyn, baan la ceyn nahaye
52. Cibaadadiba waa laga tagoo, caasi loo badaye
53. Haddaan Eebbe ina caymineyn, cidi ma joogteene
54. Ciqaab soo degtiyo waxan ka baqi, cadho Ilaaheeye
55. Cabbiroo wax ii sheeg illeyn, waan cajabayaaye 
    
56. Bukaannada cabaadaaya iyo, carunka hooraaya
57. Camoolaan wax arag iyo, waxaa caddilan waayeelba
58. Caruuraha haqanayiyo waxaa, curaddo naafoobay.
59. Cadradaha dagaagee badhkood, duurka ku cirreystay
60. Iyo kumankan soo caariyey ,haaddu ku casheyso
61. Cagta hoose meesheynu naal, iyo culeyskeedu
62. Inkastoo ay ciil badantahoy, caajis igu beertay
63. Allahayow ninkuu Caabidoo, cabanayaan ahaye
64. Caawimaad adaan kaa rabnaa, caawa naxariise
    
65. Caafimaad adaa heli karoon, kaa codsanayaaye
66. Rabbiyow na ceyntee adaa, ka hufan ceebaale.