Madaxweynaha DFKMG Sheikh Shariif: Majiro Khilaaf u dhexeeya Xubnaha ugu sareeya DFKMG

Sh. Shariif Sh. Axmed ayaa September 30, 2009 ka hadlay xarunta CSIS (Center for Strategic and International Studies) ee Washington DC.

Hadalkii uu halkaas ka jeediyey waxa uu kaga hadlay ururadii soomaray Soomaaliya burburkii ka dib, oo salka ku hayey qabiilka, waa sida uu hadalka u dhigay’e.

Waxa kale oo uu ka hadlay in mucaawino buuran aan ilaa hadda la siin xukuumaddiisa.

Madaxweynaha DFKMG waxa uu sheegay in uusan jirin khilaaf u dhexeeya xubnaha ugu sareeya xukuumaddiisa, isagoo arrintaas ka hadlayey waxa uu yiri:

“Waxaan rabaa in aan idiin sheego beryihii ugu dambeeyey waxaa aad dadku ay uga hadlaayeen khilaaf u dhexeeya dawladda dhexdeeda in uu jiro, laakiin waxaan idiin sheegayaa idiin xaqiijinayaa in uusan jirin, haddana waa laga dhawaajiyey, majirin, kala qaybsanaan iyo khilaaf dawladda soo dhexmaray marna ma jirin, waxaa la ahaa marwalba isku aragti, isku hadaf, gaar ahaan madaxda ugu saraysa oo guddoomiyaha baarlamaanka iyo maxay ahaato ra’iisul wasaaraha si joogto ah ayaan u leenahay shirar iyo wada tashi, maalina ma dhicin wax aan isku khilaafno, marka waxaan aaminsanahay wararkaasu in ay yihiin warar loo adeegsanayo dawladda in lagu wiiqo.”

Waxa uu hadlay ciidanka DFKMG oo uu sheegay in hubka ay haystaan iyo kaalmada ay helaan in ay yihiin kuwo kooban, taas oo keeneysa in ay gudan waayaan hawshii la rabey in ay gutaan, ayuu yiri. “Marwalba waxaa loo baahanayaa dad cusub oo soo tababarta oo ku soo biira ciidanka, maxaa yeelay waqti walba waxaa dhaca dhimasho iyo dhaawac” ayuu yiri. Waxana uu sheegay in hubka Ciidanka DFKMG uu yahay hub jabhadeed ee uusan ahayn hub dawladeed, “hub dawladeed waa la yaqaan ayaan u malaynayaa.”

Hadal dheer oo uu jeediyey kaddib waxaa la weydiiyey su’aalo. Dadkii su’aala weydiiyey waxaa ka mid ahaa gabar Soomaaliyeed oo sheegtay in ay ahaan jirtay taageere Shariif, ay ka qayb qaadatay sidii ciidamadii xasuuqa geystey ee Itoobiyaanka looga saari lahaa Soomaaliya. Laakiin, ayey tiri, ma doonayo hab-maskaxeed in aanan daacad u ahayn, oo aan dheho wax kasta waa malab iyo caano, waxaan daremaya in ay jirto dayacaad, waxaan doonayaa in aan weydiiyo Sheikh Shariif uu aad ugu feejignaado arrimaha bini’aadamin ee soo wajahday geeska Afrika oo ay ilaa 8million soo foodsaartay macaluul, iyo in 5 million ay barakaceen, iyo in uusan ka aamusin Ciidamada Itoobiya oo markii ay doonaan gelaya oo ka baxaya Soomaaliya, kuwaas oo ku xad gudbaya jiritaanka dhulka Soomaaliya, taas oo taageero siinaysa kuwa ka soo horjeeda.

Markii uu arrintaas ka jawaabayey markii uu in ka jawaabay ayuu yiri “gabadha weli madaxa ayey luleysaa. Arrinta Itoobiyaanka ayaad rabtaa in aan ka hadlo… annaga dawladaan aragtideedu waxay tahay colaad Soomaaliya iyo Itoobiya ka dhex jirta mar walba waxay keeneysaa dhibaatadii oo sii socota, annaga marka dhinaceena in aan qaadano wax kasta oo nabad lagu heli karo in aan qaadano, baahida nabadda waa lawada qabaa laakiin annagu waa uga baahi badanahay, sida qofka caadiga ah uu u fikiro hadday madaxdu u fikirto iga rumaysta wax badan ayaa xumaanaya, marka Islaamka marka laga fikirana marka laga hadlaayona waxaa la yiraahdaa tillaabo kasta oo la qaadayona waxaa la yiraahdaa maxaa ka dambaynaya, maxay dhali kartaa, marka maadaama Soomaaliya iyo Itoobiya ay colaadoodu waqti dheer soo socotay in aan u jeedsano in aan xal kusoo dabaalno, oo xataa wax aan dhibsanayno ay dhacaan habka aan ku xallinayno in uu noqdo waxaan ma haboona waxaan waa dhibsanaynaa waxaan ma jeclin sidaas in ay noqdaan, laakiin aysan noqonin si aan u helo caadifadiina keliya intaan soo istaagno magaroofanka aan wixii aan rabnay ka sheegno waxaan aaminsanahay inay taas keeni karto dhibaatooyin ka duwan, markaa sidaas aad u dadaaleysid ayaan u dadaalaynaa, sida aad u dareemeysid ayaan u dareemeynaa, laakiin waxaan is leenahay meesha aad joogtiin waa xasaasi waxay u baahan tahay si ka duwan dadka caadiga ah in aad u fekertiin si maslaxada dadka loo xaqiijiyo, waxaan rajaynayaa in aad iga qanacday.”

Hadalkii Sheikh Shariif iyo su’aalahii weydiiyey:

Halkan ka dhegeyso (AfSoomaali, ka bilaabanaya Daqiiqadda 5:20)

Transcript (English)../pdf (CSIS)

Daawo Video (English)

Tixraac: CSIS website