3-dii bisha Feebaraayo ayaa Baarlamaanka DFKMG ee Soomaaliya kalfadhi uu yeeshay waxa uu ku daraday Mudo saddex sano ah kadib markii sidaa ay kula taliyeen wadamo ka tirsan urur gobaleedka IGAD iyo guddiga dastuurka ee Dowladda Federaalka hase yeeshee arrintaani ayaa waxaa ka soo horjeestey Beesha Caalamka ayagoo ka bixiyey aragtiyo kala duwan oo ku saabsan xilli kordhisashada Baarlamaanka Soomaaliya.

Dowladda Mareykanka ayaa ku tilmaantay xilli darsashada Baarlamaanka mid la doonayo in Soomaaliya aysan ka dhicin wax isbedelo ah, waxa uuna Mareykanku ku tilmaamay arrintaan mid keeni karta in Soomaaliya qalalaasihii ka jiray uu sii laba kacleeyo, waxa uuna u soo jeediyey Baarlamaanka in ay dib u eegaan arrintaasi si loo helo sida uu sheegay wada shaqeyn dhex marta Dowladda Federaalka iyo Beesha Caalamka, waxaa kale oo iyana arrintaan qaylo dhaan ka diray Dowladaha Midowga Yurub oo sheegay in xil kordhisashada Baarlamaanka Soomaaliya aysan waxba soo kordhineyn isla markaana ay Xaaladda Soomaaliya uga sii dareyso.

Dowlada Ingiriiska ayaa ku tilmaantey xilli kordhisashadaas mid laga qoomameeyo isago sheegey in Go’aankii uu qaatey Baarlamaanka uu ahaa mid aan laga sameeyn wax la tashi ah  wuxuuna keeni doonaa in uu xumaado  xiriirka Beesha Caalamka iyo Golaha Baarlamaanka Dowladda Federaalka

Beesha Caalamka oo iyadu bixiso kaalmada ugu balaaran ee Dowladda Federaalka ayaa sidoo kale waxaan arrintaan ka hadlay wakiilka Qaramada Midoobey ee Soomaaliya Agostino Mahigo oo sheegay in xilli kordhisashada Baarlamaanka Soomaaliya ay ahayd mid lagu degdegay isagoo sheegay in loo baahnaa in mudo laga baaraandego si loo helo wadashaqeyn u dhexeysa Qaramada Midoobey iyo Dowladda Federaalka, hase yeeshee Guddoomiyaha Baarlamaanka Shariif Xasan Sheekh Aadan intii uusan ka ambabixin Garoonka Diyaaradaha xili uu ku sii jeeday dalka Jabuuti ayaa waxa uu sheegay in Sababaha ay ugu darsadeen xili kordhisashadaasi ay tahay mid Baarlamaanka uu ku doonayey in uu sii laba-laabo hawsha uu u hayo shacabka Soomaaliyeed, isagoo meesha ka saaray in xili dambe uusan Baarlamaanka Soomaaliya ku darsan doonin waxa uuna hoosta ka xariiqay in saddexda sano ee soo socoto uu Baarlamaanka Soomaaliya ka shaqeyn doono sidii loo ansixin lahaa dastuurka Soomaaliya iyo u gogol xaarida afti Doorasho oo dalka ka dhacda.

Dowladda Talyaaniga oo xiriir dhow la leh Dowladda Federaalka ayaa sheegtay in xili kordhintaan Baarlamaanka DFKMG Soomaaliya ay tahay mid aad looga xumaado, Talyaaniga waxa sheegay in tani ay keeni karto in Dowladaha daneeya arrimaha Soomaaliya faraha kala baxaan Soomaaliya isla markaana ay joojiyaan kaalmadii ay siin jireen Dowladda Federaalka, sidoo kale Midowga Afrika ayaa si taxadar leh uga hadlay xili kordhisashada Baarlamaanka isagoo sheegay in loo baahnaa in si weyn looga fiirsado xili kordhintaasi.

Ugu dambeyntiina dadka Soomaaliyeed ayaa iyagu qaba in xili kordhinta Baarlamaanka Soomaaliya ay tahay mid ay ka warqabeen beesha Caalamka waxayna ku tilmaameen hadalada kasoo yeeray beesha caalamka kuwo boor isku qaris ah oo la doonayo in ummadda Soomaaliyeed lagu jawhareeriyo, waayo ayay yiraahdeen labo maalin ka hor intaan lagu dhawaaqin xili kordhinta Baarlamaanka Soomaaliya ayaa wadamada laysku yiraahdo IGAD waxay soo jeediyeen in ay haboon tahay in xili kale loogu daro Baarlamaanka Soomaaliya waxay shacabka soomaaliyeed ay yiraahdeen “ Waa ka xunahay , waa lagu deg degey , waa laga fiirsanaa iyo ereyo kale oo dhamaantood ah kuwa Boor isku qaris ah” waxayna sheegeen in aysan jirin Dowlad  ama  Ururada Caalamka iyo Dowladaha Daneeya mid toos u tiri Waa in Barlamaanka soomaaliya uu dib uga laabto Xilli kordhisashadaas iyadoo Guddoomiyaha Baarlamaanka uu beesha Caalamka hore uga dhaadhiciyey  in ay adag tahay in mar kale dib loo soo xulo Baarlamaanka Soomaaliya.

W/D Amiin Yuusuf Khasaaro

E-Mail  amiinkhasaaro@hotmail.com

– HeshiiSKA Saddex Aflaha ahaa ee Dhexmaray TFG iyo Shirkadda SKA

– Mubaarak ma bixi doonaa siddii Bin Caligii Tuuniisiya??