W.T Maxamuud Axmed Cabdalle (shine)

Email: mabdalle@gmail.com

July 26, 2012

Hordhac:

Dastuurka la rabo dhowaan in si xooga lagu marsiiyo Ummadda Soomaaliyeed abwaannadu maxay ka yiraahdeen? Akhris wanaagsan.

1. Dastuurkaa la dhoobdhoobayee Mahiiga soo dhiibay
2. Waa dhaxal wareeg ubadkayaga lagu dhibaatayne
3. Dhulkayaga ninkii muran geshoow diidnay dhinacaaga
4.  
5. Odayadu dhambaalkay direen waa mid dhumuc weyne
6. Dhaliishii aqoonyahannadaa weliba sii dheere
7. Ninkii diintayada dhalan rogoow diidnay dhinacaaga
8.  
9. Dhaddig iyo labood wax u dhaxayn nooma dhaadhicine
10. Dhaqammada la soo waaridiyo dhagarta hoos taalla
11. Dhafoor taabashada laasimoow diidnay dhinacaaga
12.  
13. Dhalashada shan sano uun ku hano dhab u degaan weeye
14. Wax loo dhaarin Madaxweynanimo talada loo dhiibo
15. Kii wacad shisheeye u dhigtoow diidnay dhinacaaga
16.  
17. Dhudhummada midkii laga qabtee dhacay masaakiinta
18. Ee dhugux ka siiyee malyaan dhururi gaadhsiinin
19. Ee weliba xil u dhololayoow diidnay dhinacaaga
20.  
21. Cadowgii dhulkaygii kol hore dhinaca loo gooyey
22. Maantana badday dhiganayaan kii hore u dhaafnay
23. Dhaabaddaa hadimo kii wadow diidnay dhinacaaga
24.  
25. Dhimirkii qabyaaladi gashaa qaran ka dheeraaye
26. Dhaandhaan dantiisa u dhanqalan waa damiir dhumaye
27. Midkii kala dhoweystoow shacbiga diidnay dhinacaaga
28.  
29. Dhabba nabada, dhaymiyo maslaxo, dhalinta waanwaanta
30. Dhug midaan u qabin oo nin kale dhaamankuu raraya
31. Dhiiglaawe magac doonayoow diidnay dhinacaaga
32.  
33. Afrikaanka soo dhoobtayee Xamar dhaloonqeeyey
34. EE dhoorle amarka u hayee dhacanta siinaayo
35. Dhosoqluhu midkuu dheeg socdoow diidnay dhinacaaga
36.  
37. Mid dhiggiisa hoos jooga oon ceeb ka dhiidhiyinin
38. Irbad dhuub ma geliyaha nin kale qalimmadow dhiibtay
39. Ee dhagar shisheeyaad watow diidnay dhinacaaga
40.  
41. Digtoor dhookirkaan dhaadihayn dabinka loo dhaabay
42. Aqoongaabka dhiishii caqliga sida dhadhaabeeda
43. Ee sida dumaal loo dhaxloow diidnay dhinacaaga
44.  
45. Afartaasi waa iga dhambaal dhiillin iyo waano
46. Xaqa dharabka lagu awadayaa waa midaan dhicine
47. Qofkii ay dhibaysoow ka dirir ama dhug haw yeelan
48.  
49. Dhoobada dalkeennaa nin wali dhuro ku taamaaye
50. Dhan walbaba naflahan duullimaad nagu dhardhaaraaya
51. Soomaaliyeey dhugo adaa lagu dhibaatayne
52.  
53. Dhulka baaxadda leh ee Ilaah fidiyey dheeggiisa
54. Nin waliba dhankuu ka arrinshaan loogu dhiganayne
55. Dhuddii nala ku uumay huryadu dhabaqsanaysaane
56.  
57. Ummadaha ku dhaqanee aralada soohdimaha dhaabtay
58. Dhisme dawladeed baw agban iyo dhidib aan liicayne
59. Innana waa is dhinac rooraynaa sida dhurwaagiiye
60.  
61. Waxan hore u dhicin oo adduun dhabannadii haysto
62. Dal dadkiisii dhoobada cuneen ubadkii dhuun yeedhshey
63. Nin walbaana dhuub boqornimiyo dhawri madaxweyne
64.  
65. Afartaasi waa iga dhaliil dhiillin iyo waano
66. Xaqa dharabka lagu awadayaa waa midaan dhicine
67. Qofkii ay dhibaysoow ka dirir ama dhug haw yeelan
68.  
69. Dhambuukaha isgarab roorayiyo geyshka wada dhaatay
70. Dharandhoorridiyo Garabcaddaa dhiigga wada quuta
71. Nabsi dheelmatiinoow adduun dhagartii soo maaha?
72.  
73. Dhisme maammul goboleedku waa kala dhantaal uune
74. Wada dhigaha loolkii ka jabay dhaxanna kaa awdin
75. Nabsi dheelmatiinoow adduun dhagartii soow maaha?
76.  
77. Dad dhulkoodii laga gawdhiyoo dhagi gawaan jiifa
78. Oo dhalasho kii ugu xigey dabaqyo dhoobaayo
79. Nabsi dheelmatiinoow adduun dhagartii sow maaha?
80.  
81. Dhabta halaq la saartiyo Amxaar gogosha loo dheeho
82. Keenyaan hablaha loo dhisiyo dhaanto lagu sooro
83. Nabsi dheelmatiinoow adduun dhagartii soow maaha?
84.  
85. Afartaasi waa iga dhaliil dhiillin iyo waano
86. Xaqa dharabka lagu awadayaa waa midaan dhicine
87. Qofkii ay dhibaysoow ka dirir ama dhug haw yeelan 
88.  
89. Allahayoow adaan dheelliyayn laguna dhaafayne
90. Adaan taladu kaa dhuumanayn xaqa ka dheeraane
91. Soomaalida dhabbada toosan mari dhuudhi baa galaye
92.  
93. Dhoylaawayaashiyo Allow dhaafi magalluudka
94. Dhoomaha xammaalkiyo Allow dhaafi gega roorka
95. Soomaalida dhabbada toosan mari dhuudhi baa galaye
96.  
97. Alloow dhool san noo di’i dhulkii waakan baylahaye
98. Alloow dhabatanimmadiyo ka saar gaaja dhalandhoolka
99. Soomaalida dhabbada toosan mari dhuudhi baa galaye   

W.T Maxamuud Axmed Cabdalle (shine)

Email: mabdalle@gmail.com