Baasaboorkii hore ee cagaarka ahaa wuxuu ku dambeeyaa ama lagu tagaa Maamulka la magacbaxay Somaliland, hase yeeshee dadka Soomaaliyeed ee ka baxaya Garoonka Aadan Cadde ee Magaalada Muqdisho kuna sii jeeda Gobalada dalka gaar haan Soomaaliland way qariyaan Baasaboorka cagaaran hase yeeshee marka ay ka degaan Magaalada Hargeysa ayay dib ula soo baxaan, arrintaas ayaa sabab u ah Waaxda socdaalka Soomaaliya oo maamulka Somaliland u aqoonsan mid ka mid ah Gobalada Somaaliyeed sidaasi darteed ay dadku tegi karaan Baasaboor la’aan.

Haddii aan ka soo gudubno Baasaboorkii Cagaarnaa waxaa hadda dalka ka shaqeeya Baasaboorka cusub ee E-Passport oo lagu tiriyo in uu ka mid ah Baasaboorada casriga ah, waxaana haatan bilowday in si aad ah loo qaadanayo gaar ahaan xiliga Xajka oo loo diyaargaroobayo, Xarunta Waaxda Socdaalka ayaa ah mid aad u mashquulsan, waxayna dadku doonayaan in ay qaataan Baasaboorka cusub, mar aan tegay Xaruntaasi ayaan wax badan ka ogaaday qaabka loo bixiyo Baasaboorka cusub, waxayna dadka qaar ii sheegeen in ay dhibaatooyin kala duwan kala kulmaan bixinta Baasaboorkaasi.

Marka Baasaboor la bixiyo waxaa waajib ah in qofka la siinayo in uu ku sugan yahay Xarunta Waaxda socdaalka iyo Jinsiyadaha si loo ogaado inuu yahay Soomaali ama xaq u leeyahay in Baasaboor la siiyo, hase yeeshee Waaxda Socdaalka waxaa ka jira Barnaamij loogu magacdaray Online oo ah in qof maqan uu soo dirsado Sawir isla markaana loo sameeyo Baasaboor kadib marka uu lacagta ku shubo Shirkadda Xawaaladda Dahabshiil, sidoo kale qaladaadka jira waxaa ka mid ah in dadka ku nool maamulka Somaliland ee doonaya in ay qaataan Baasaboorka cusub ee ay xaqa u leeyihiin in ay helaan waxay aadeegsadaan farsamooyin badan, qaarkood waxay la soo xiriiraan eheladooda oo ku sugan Magaalada Muqdisho iyagoo soo dirta sawiradooda iyo qarashaadka ay ka dooneyso Waaxda Socdaalka Soomaaliya iyagoo doonaya in ay ka baaqsadaan qarashaadka uga baxaya safarka.

Xarunta Waaxada Socdaalka waxaan kula kulmay dhowr qof oo inta lacagtii Dahabshiil ku shubay haddana dib uga laabtay in ay Baasaboor goostaan, waxayna Xarunta u joogeen in loo celiyo Lacagahooda maadaama aysan xiligaan diyaar u aheyn in ay Baasaboor goostaan, Agaasimaha Waaxda Socdaalka ayaa u sheegay dadkaasi in lacag celin ah aysan jirin mar haddii la bixiyo, muran dheer kadib waxaa loo sheegay in lacagtaasi ay bixin karto Wasaaradda Maaliyadda ee Dowladda Federaalka, hase yeeshee iskadaba noqnoqod badan kadib waxay isaga quustaan in ay dib u helaan lacagahooda.

Qaladaadka kale ee ka jira qaabka loo gooyo Baasaboorada ayaa waxaa ka mid ah iyadoo qofka raba in uu deg deg ku helo Baasaboor loo sheego in uu bixiyo lacag dheeraad ah, waxaana meesha ka baxaya dadkii faraha badnaa ee safka ugu jiray inay si cadaalad ah ku helaan Baasabooradooda iyadoo si cadaalad daro ah looga hormariyo dad kale oo bixiya lacago lagu sheegay in adeeg dheeraad ah lagu qabanayo.

Inkastoo Waaxda Socdaalka iyo Jinsiyadaha ay dadaashay haddana waxaa u dhiman in ay saxdo qaladaadkaas faraha badan ee aan kor ku sheegnay si loo dhowro xuquuqda Muwaadinku leeyahay isla markaana Waaxda Socdaalka waxaa looga baahan yahay in ay la socoto qaabka ay ku shaqeeyaan shaqaalaha ka hawlgala Waaxda Socdaalka.

W/D Amiin Yuusuf Khasaaro

E-Mail amiinkhasaaro@hotmail.co.uk

E-Mail amiinkhasaaro@yahoo.co.uk.