08/25/2011
Email: mabdalle@gmail.com

ASC: Waxan ilaaha raxmaanka ah kor ahaaye ka baryayaa inuu ummadda Soomaaliyeed ee ay wiiqeen abaaraha, colaadda iyo cudurradu, uga miciino oo raxmaad u shubo, boggooda subag isu mariyo, talcuusahana ka samata bixiyo, aammiin!. Gabaygan oo soo baxay 08/25/2011 waxa abwaanku ugu ducaynayaa dalkii iyo dadka Soomaaliyeed inay ka raystaan abaarta, cudurka  iyo colaadda daba dheeraatay, akhris wanaagsan.

Halkan ka dhegeyso Gabayga:

1. Ha’da Maanso hooyaale gabay kuma hadaaqeene
2. Hoggaankaba u goo baan lahaa haamaddiisaba’e
3. Hannaskiyo abaarahan dadkii wada halaakeeyey
4. Ninba haatan helid iyo awood heeggan waw yahaye
5. Hodonkoow rucdiga naga dul qaad adigu noo hiili
   
6. 
   
7. Ummaddii harraad baa jariyo halas abaareede
8. Halistiyo colaadahan allow ka hinjiyoo dhaafi
9. Nabad baa hoyaad lehe rabboow nagu hanuun khayrka
10. Rabboow roobka soo hooriyoo harada noo buuxi
11. Cirku heego malahoo dhulkii waa halwanayaaye
12. Hogoshii gu’sooriyo la waa hilinkii dayreede
13. 
    
14. Heermoo dad iyo duunyadii waa huf beel taniye
15. Eebboow nasriga haybaddale hodanka soo meeri
16. Hooggiyo colaaddan is barkaday lagu hagaasowye
    
17. Maatada qaxootiga ku horan waa hunguyiyo ceebe
18. Waayeel hanqaarmiyo carruur habaqtamoo ciiri
19. Hagran maysid adiguye Allow hodanka soo meeri
20. Afartaa hadyaad duca ah iyo hirar nabaaddiino
21. Hilibka I damaqaayiyo dareen huriyey laabtayda
22. Huqda aan dhammaanayn qalbiga hibashadiisii dheh
23. Hodonkaan durraansaday Allow adigu noo hiili
    
24. 
    
25. Maantay habboon tahay haddaad hagar baxaysaane
26. Gacma wada jir bay hawli hano ku hab samaataaye
27. Soomaalinnimo waxa u huroo heeggan ugu ahaada
28. Hoo iyo walaal bay rabaan hiilo gacaleedee
29. Nin haleelo geel maalayoo gacalku hoomaayey
30. Hadhuub gaal u quudhayn martida hoo aan oranynin
31. Marbuu haama gooyaha bakhayl soo habeen dhixiye
32. Hoo iyo walaal bay rabaan hiilo gacaleedee
33. Ubad ay darxumo haysatoo gaajo la hamuumi
34. Hooyada halyaygay dhashiyo hanaddadii weydey
35. Kolkaan halacsadaa baa wadnuhu ila hugleeyaaye
    
36. 
    
37. Hoo iyo walaal bay rabaan hiilo gacaleedee
38. Belaayadu intay huruddo baad samo hoyaaddaaye
39. Habeen bay masiibadu dhaxdaa waa hadh labadiiye
40. Ilaahay halkuu kuu gartana hubanti weeyaane
41. Hoo iyo walaal bay rabaan hiilo gacaleedee
42. Afartaa hadyaad duca ah iyo hirar nabaaddiino
43. Hilibka I damaqaayiyo dareen huriyey laabtayda
44. Huqda aan dhammaanayn qalbiga hibashadiisii dheh
45. Hodonkaan durraansaday Allow adigu noo hiili
    
46. 
    
47. Hanti baan arkaayaa la yiri haqab tir weeyaane
48. Horor iyo waraabaan arkaa hoobsadoo cuniye
49. Hadimaa ku ladhan deeqda ay Yurub hibaysaaye
50. Madaxdeennu waxay haybiyaan waxay hidiidaane
51. Soomaalida habaar baa ku dhacay hanaddadeediiye
52. Haldoorkii ka madhayoo qurbay ka hawisaayaane
53. Waxay uga hayaameen dalkii hoolifliyo liide
54. Hodonkoow rucdiga naga dul qaad adigu noo hiili
    
55. 
    
56. Hanaqaaddayoo ceebtayada nacab ku haasawye
57. Hutuu kulay ku tahay aadamuhu nagu hitaataye
58. Waxa hoyga noo yaal nabsigii eed habaar qabe eh
59. Hodonkoow rucdiga naga dul qaad adigu noo hiili

WT Maxamuud Axmed Cabdalle (shine)

Email: mabdalle@gmail.com