W.T Maxamuud Axmed Cabdalla (shiine)

07/01/2011

Dhammaan waxan salaamaynaa shacabka Soomaaliyeed meel kastoo ay joogaan. Waxan halka idiin ku soo gudbinaynaa maanso la magac baxday U hubsada wadaaddow oo uu tiriyey Maxamuud Axmed Cabdalla (shiine), maansadan oo waano ah ku socota wadaaddada dagaallada ka wada geyiga Soomaaliya.

Afeef: Maansadan cid goonniya oo lagu aflagaadeeyey ma jirto, waxay si hufan uga hadlaysaa wadcyiga dalkeennu ku sugan yahay. Maansadu waa nasteexayn iyada ayaa is fasiraysa, akhris wanaagsan.

Wuxu yiri:

1. U hubsada wadaaddoow
2. Inta aan halaag dhicin
3. Dadweynaha hanuunshoo
4. Tawxiidka hodanka ah
5. Ku hagaaja khayrkoo
6. Idinkoo u hawl galay
7. Himilada u daaddega
8. Heeryada gumaystaha
9. Hinjin maayo qoriguye
10. Haasaase gobannimo
11. Jihaad waxad ku hanataa
12. Kolka ay habboontee
13. U hubsada waddaadoow
14. Inta aan halaag dhicin
15. Hayalkiyo maslaxaddiyo
16. Hilow iyo walaalnimo
17. Ma huraan dadkeeniyo
18. Soomaali waa hayb
19. Waa hilib ku wada yaal
20. Lafta dhabarka haysee
21. U hubsada wadaaddoow
22. Inta aan halaag dhicin
23. Culumada horseedka ah
24. Haaraanka lagu falay
25. Hadimada qarsoon iyo
26. Hebelkaasi waa gaal
27. Murtad weeye halis wada
28. Hal karaanle maahee
29. U hubsada wadaaddoow
30. Inta aan halaag dhicin
31. Heemaalka calankiyo
32. Hillaaciisa midabkiyo
33. Xiddigtaa ku hoos taal
34. Waa haybaddeennee
35. Geesiyaa huqdoodiyo
36. Haniyaha bar loo jaray
37. Axmed Guray u hoyayoo
38. Sayid Maxamed kama harin
39. Xalanaa ku haan togay
40. Faarax baa hog ugu dhacay
41. Kumanbow naf hurayoo
42. Halgan weyn u soo galay
43. Abwaannow hibeeyoo
44. Maanso ugu hadaaqoo
45. Kanna siib kan hoo saar
46. Murti hodana uga tegey
47. Aniguna higgaad gabay
48. Ha’da kuma bakhaylee
49. U hubsada wadaaddoow
50. Inta aan halaag dhicin
51. Hungadii qabiilkiyo
52. Colaaddii hulaaqdee
53. Ku hab tiri dalkeennaa
54. Wuxu haad halyey cunay
55. Maatada la heeree
56. Hambo aan la reebayn
57. Hoog kaloo kasii daran
58. Mad-hab lagu huf beeliyo
59. Islaam loogu habar waco
60. Daafad uma heleynee
61. U hubsada wadaaddoow
62. Inta aan halaag dhicin
63. Hoolifle Afrikaaniyo
64. Haanraawe dhidar iyo
65. Cadow kuu hamuun qaba
66. Hoygeenna waxa tuban
67. Waxa gaal harjadayee
68. U harraadan dhiigoo
69. Raqda soo hawaawiray
70. Hiyigiisu dumi yahay
71. Quwad lagu horjoogsado
72. Soomaali uma harin
73. Hor ilaahna taa ogin
74. U hubsada wadaaddoow
75. Inta aan halaag dhicin
76. Hana qaadka diintiyo
77. Hammigii Rasuulkii (CSW)
78. Halkankii illaa SHAAM
79. MASAR lagu hareer maray
80. TURKI lagu haleeloo
81. Andaluus hoyaatimay
82. Hilin loo yagleeliyo
83. Caqli lagu hagaa jiray
84. Rag helaad leh baa waday
85. Hoobaaqda qaarkeed
86. Nafta oo la halakayn
87. Hindisaha kumay jirin
88. U hubsada wadaaddoow
89. Inta halaag dhicin.

W.T Maxamuud Axmed Cabdalla (shiine)
Email: mabdalle@gmail.com

…

Bogga Maansadii Doodwanaag
http://www.somalitalk.com/maanso/