Golaha Wasiirada Dowladda Federaalka KMG Soomaaliya oo maanta yeeshay shir aan caadi aheyn

• War ka soo baxay Xafiiska Afhayeenka Xukuumada
  C/qaadir Maxamuud Walaayo

Mogadishu, October, 19, 2009——- shir aan caadi aheyn oo ay maanta isugu yimaadeen Golaha Wasiirada ee Dowladda Federaalka KMG Soomaaliya oo lagu qabtay xarunta Dowaladda ayaa waxaa Goluhu si buuxda ugu ansixiyay Heshiis Idaari ah ee dhex maray Dowladda Federaalka KMG Soomaaliya iyo Shariikadda (Price Water House Coopers Associates Africa Limit) iyadoo shirka uu guddoominayay Ra’iisul Wasaaraha Soomaaliya Dr. Cumar Cabdirashiid Cali Sharmarke.

Shirka Golaha Wasiirada wuxuu si weyn u lafaguray Ajenda ka kooban saddex qodob oo ay ka mid ahaayeen Heshiiska dhex maray Dowladda iyo Shirkadda Price Water, toosinta Maamulada Dakhliga Kharaj Bixinta, Ciidanka iyo Goboladda iyo Maamul u sammeynta Gobollada degmooyinka Dalka.

Meel marinta Heshiiska wuxuu ka dambeeyey dood qoto dheer oo Golaha Wasiirada ay halka ka soo jeediyeen. Heshiiskaas oo ka kooban dhowr qodob waxaa qodobadiisa ugu weyn ka mid ah in Beesha Caalamka iyo Deeqbixiyeyaasha ay maanta wixii ka dambeeya yabooha Maaliyadeed ee Dowladda Soomaaliya u soo mariyaan shirkaddaas.

Isla heshiiska wuxuu Dowladda Soomaaliya u oggolaanayaa inay marka ay doonto ay baaris ku sameyn karto Diiwaanka lacag qabashada ee shirkadda iyadoo hadduu yimaado murran ka yimaada labada geesood lagu kala bixi doono Rugta ganacsiga ee caalamiga ah ee ku taal magaalada Paris oo Soomaaliya ay xubin ka tahay (International Chambers of Commerce in Paris). Rugta ganacsiga ka sokow, waxaa kaloo labada dhinac ay ku kala bixi karaan si saaxiibtinimo leh.

Qodobada Heshiisku ka kooban yahay waxaa ka mid ah in Dowladda Soomaaliya ay Tacdiil ku sammeyn karto Heshiiska marka ay baahi sidaas ay timaado iyadoo la sheegay inay xisaabta socota ay imminka ku jiraan yabooh ay bixiyeen Dowladdo dhowr ah kuwo kalena laga filaayo inay ku soo shubmaan.

Dowladda Soomaaliya waxaa xiriir Maaliyadeed oo toos ah oo laba geesood ah ay la smmeysan kartaa wadamada ay saaxiibka ama Walaalaha yihiin. Lacagaha ka sokow, shirkadda waxay Shaqaalaha Dowladda ka caawin doontaa aqoonta habka Diiwaangelinta iyo ururinta Dakhliyada, Kharashyada iyo Maamulka iyo Maareynta xisaabaadka si shaqaaluhu u yeeshaan Karti, Hufnaan, Tayo, Tamar iyo Maareynta Maamulka.

Qodobada labo oo ah toosinta maamulada Dakhliga, Ciidanka iyo Gobollada iyo Saddex oo ah maamul u sameynta Gobollada iyo degmooyinka Dalka waxaa loo Igmaday Madaxweynaha Dowladda Federaalka ee Soomaaliya Mudane Sheekh Shariif Sheekh Axmed iyo Ra’iisul Wasaare Cumar Cabdirshiid Cali Sharmarke inay iyagu go’aan ka soo gaaraan.

Afhayeenka oo saxaafada la hadlaya

Ra’iisul Wasaaraha Soomaaliya, Dr. Cumar Cabdirashiid Cali Sharmarke inta ay dooduhu socdeen wuxuu mar kasta halkaa ka bixinayay toosin iyo caddeyn faahfaahsan.

Xafiiska Afhayeenka Xukuumada
C/qaadir Maxamuud Walaayo