Puntland oo Loo Sameeyey Wasaarad Cusub ee Batroolka iyo Macdanta oo
Aan Lahayn Wasiir-ku-xigeen...
- Wasaaradda cusub ee batroolka Puntland waxaa wasiir looga
dhigay Xasan Aloore oo hore u sheegay in ay Puntland xiriirka u jari
doonto dawladda (FKMG) haddii Baarlamaanka Baydhabo ansixiyo
sharciga hordhaca ah ee Batroolka Soomaaliya..
Warbixin iyo Faalladii SomaliTalk.com | Dec 16,
2007
Wareegto uu December 15, 2007 soo saaray madaxweynaha Dowlad
Goboleedka Puntland,
Maxamuud Muuse Xirsi (Gen. Cadde Muuse) ayaa shaaca ka qaaday in
Puntland loo sameeyey Wasaarad Cusub oo qaabilsan 'Batroolka iyo
Macdanta' [Ministry of Oil and Minerals].
Xasan Aloore, Wasiirka wasaarada cusub ee Batroolka iyo Macdanta
Puntland ee la sameeyey Dec 15, 2007 |
Wareegtada oo leh "Xeer Madaxweyne Lr. 197" ayaa Wasaaradda
Batroolka & Macdanta waxaa loo magacaabay in uu Wasiir u noqonayo Xasan
Cusmaan Maxamuud (Xasan Aloore), laakiin wareegtada laguma xusin cidda
wasaaraddaas u noqon doonta Wasiir-ku-Xigeen, taas oo la is weydiinayo
sababta. Waxaa xusid mudan in
Wareegtada Gen. Cadde Muuse lagu xusay dhammaan Wasaaradaha Puntland (oo
la isku shaandheeyey) oo ka kooban 15 Wasaaradood in mid kasta ay leedahay Wasiir iyo ugu yaraan
hal-Wasiir-ku-xigeen, marka laga reebo Wasaaradda Cusub ee Batroolka &
Macdanta oo la xusay Wasiirka oo qura oo aan lahayn Wasiir-ku-xigeen.
Xasan Cusmaan Maxamuud (Xasan Aloore), wasiirka cusub, waxa uu ahaa
madaxa waaxda macdanta iyo tamarta ee Puntland, waxa uu ahaa kii hore u muujiyey in haddii DFKMG soo
faragashato heshiisyada Batroolka ee Puntland in markaas DGPL ay
kalsoonida kala laabaneyso DFKMG. Gaar ahaan waxa uu si toos ah Aug 20,
2007 waraysi uu siiyey Reuters ku weeraray Ra'iisul wasaarihii hore ee
DFKMG, Cali Maxamed Geeddi, waxana uu Xasan Aloore xilligaas yiri:
"Geeddi ololayntiisu waa sharci darro, waxaana xiriirka u jari doonaa
dawladda (FKMG) haddii baarlamaanku ansixiyo sharciga hordhaca ah
"Draft" ee Batroolka"... "Sharciga Batroolka Soomaaliya ee la sheegay in
laga ansixinayo Baarlamaanka lagama yaqaan halkan, sidaas daraadeed
waxba kama khuseeyo Puntland haba yaraatee."
Sharcigaas uu ka hadlaayey Xasan Aloore weli waxa uu hor yaal golaha
Baarlamanka DFKMG ee Baydhabo, lagama gaarin wax xal ah.
Nov 22, 2007 oo ah markii la magcaabay Nuur
Cadde waxaa Cadde Muuse Garoowe ku booqday wafti ka socda
shidaal baarista...
|
Marka la eego arrimahaas, waxaa muuqata ifafaalo ah in DGPL la maagan
tahay Ra'iisul Wasaaraha Cusub ee DFKMG, Col. Nuur Cadde, xeelad la mid
ah tii ay hor dhigtay Cali Geeddi, waa haddii col. Nuur Cadde uu faraha
la galo heshiisyada Batroolka Punland, isla markaasna uu Baarlamaanka
Baydhabo ansixiyo heshiiska batroolka ee ay soo diyaariyeen shirkadihii
gacan saarka la lahaa Geeddi.
Gen. Cadde Muuse waxa uu magcaabista wasaaradda cusub ee 'Batroolka &
Macdanta Puntland' kusoo beegay xilli uu Col. Nuur Cadde uu soo dhisayo
Wasiiradiisa cusub.
Col. Nuur Cadde, waxa ugu weyn ee hor yaal waxaa ka mid ah in uu
go'aan ka gaaro wixii uu ka yeeli lahaa sharciga batroolka Soomaaliya ee
lagu soo diyaariyey magaalada Malindi ee dalka Kenya. Isla markaasna
go'aan ka qaato wixii uu ka yeeli lahaa heshiisyadii ay Puntland
lagashay shirkadaha batroolka Sahamiya. [Xusuusnow sida kor ku suxan
haddii uu heshiisyada Puntland faragashado, haddii uusan go'aan ka
gaarina waxa uu u muuqan doonaa ra'iisul wasaarihii fadhiidka ahaa...]
Waxaa kale oo Col. Nuur Cadde hor yaal in uu go'aan ka gaaro sidii uu
ka yeeli lahaa heshiisyadii Batroolka ee ay isku khilaafeen col. C/laahi
Yuusuf iyo prof. Cali Geeddi ee midna watey Shiinaha kankalena watey
Kuwait.
Haddii uu arrimahaas dhayalsado, Col. Nuur Cadde, waxaa muuqata in uusan ka ood sokayn doonin meeshii
uu maray jaallihiis prof. Cali Maxamed Geeddi.
 Dhanka kale, December 12, 2007 ayey ahayd markii uu is-casiley
Wasiirkii Kalluumaysiga iyo Khayraadka Dabiiciga, Saciid Maxamed Raage,
isagoo sheegay in Is casilaadiisa ay qayb ka ahayd sida loo maamulay
Batroolka & Macdanta. Waxana uu markaas uu isi casiley waraysi uu siiyey
idaacadda 'British Broadcasting Corporation' ku sheegay "Waddamada
caadiga ah ee nabaddu ka jirto ayaa macdanta la isku dilaa, oo
khayraadka-dabiiciga ah la isku dilaa, marka iyadoo wadanka aan
amnigiisu fiicnayn in la yiraahdo macdan ayaa la baarayaa waxaan u
malaynayaa in ay caqliga uga fogtahay... Odaygiina, maadweynahana (Cadde
Muuse) arrimahaas aad iyo aad ayaanu isugu afgaran weyney..." [Eeg
halkan]
Col. Nuur Cadde waxa uu Axad December 16, 2007 shaaca ka qaaday in uu
dib u soo dhisi doono xukuumad aad uga tiro yar tii hore, isla markaasna
uu wasiirada kala bar ka keeni doono Baarlamaanka dhexdiisa, barka
kalena baarlamaanka bannaankiisa...
Ka Dhegeyso halkan...
col. Nuur Cadde oo la hadlaya Saalim Caliyow oo dhegeysanaya
Maqaaladii Dadweyna ee isbedelka Xukuumada Cadda"
Gen. Cadde Muuse oo Isku Shaandheeyey Golihiisii Wasiirada
 Wareegto
ka soo baxday madaxweynaha DGPL, Gen. Cadde Muuse, ayaa shaaca ka qaaday
in uu isku shaandheeyey golihiisii wasiirada, isagoo bedeley wasiirkii
kalluumaysiga ee is casiley oo lagu bedeley wasiirkii waxbarashada Axmed
Saciid Aw Nuur.
Wasiirada cusub waxaa ka mid ah C/rashiid Jaamac Warsame
(Arr.Gudaha), C/laahi Siciid Samatar (amniga), Xasan Maxamed Jibriil
(Qorsheynta), iyo
Xasan Cismaan Maxamuud oo wasiir looga dhigay Wasaaradda Cusub ee
Batroolka & Macdanta.
Isku shaandhaynta waxaa jagadoodii waayey Cali Cabdi Awaare
(wasiirkii Dawladaah Hoose iyo horumarinta reer miyiga) oo la tirtiray
wasaaradaas iyo wasiirkii
Qorshaynta Cabdi Salaad.
Wareegtadii hoos ka akhri:
DOWLADDA PUNTLAND EE SOOMAALIYA
XAFIISKA MADAXWEYNAHA
Xeer Madaxweyne Lr. 197 ee December 15, 2007
kuna saabsan dhismaha golaha cusub ee xukuumadda DGPL
Madaxweynaha Puntland,
Markuu arkay : Dastuurka Puntland
Markuu garowsaday : In isbeddel lagu sameeyo golaha xukuumadda
DGPL
Markuu tixgeliyey : Duruufaha siyaasadeed ee ka jira Puntland
Markuu la tashaday : Madaxweyne ku xigeenka Puntland
WUXUU XEERIYEY :
I. Magacaabidda xubnaha golaha xukuumadda ee kala ah :
1. Wasaaradda Caddaaladda & Arr. Diinta
C/risaaq Yaasiin C/le, wasiir
Maxamuud Faarax Maxamuud, wasiir ku xigeen
2. Wasaaradda Arr.Gudaha
C/rashiid Jaamac Warsame (Barkhadle), wasiir
Ibraahim Cartan Ismaaciil, wasir ku xigeen
Axmed Aadan Carab, wasiir ku xigeen
3. Wasaardda Amniga & DDR
S/Guuto C/laahi Saciid Samatar, wasiir
Faarax Cabdi Axmed, wasiir ku xigeen
Yaasiin Cali C/le, wasiir ku xigeen
4. Wasaaradda Maaliyadda
Maxamed Cali Yuusuf, wasiir
Yaasiin Cartan Maxamed, wasiir ku xigeenka Dakhliga
Xasan Cabdalla Xasan, wasiir ku xigeenka Maamulka
5. Wasaaradda Qorshaynta & Iskaashiga Caalamiga
Xasan Maxamed Jibriil, wasiir
Cali Axmed Cali, wasiir ku xigeenka Qorshaynta
C/laahi Maxamed Barre, wasiir ku xigeenka Iskaashiga Caalamiga
6. Wasaaradda Hawlaha Guud & Gaadiidka
C/laahi Cali Xirsi, wasiir
Nuur Xasan Faarax, wasiir ku xigeen
Cali Maxamed Warsame, wasiir ku xigeen
7. Wasaaradda Ganacsiga & Warshadaha
C/Samad Yuusuf Maxamed, wasiir
Cabdi Yaasiin Xirsi, wasiir ku xigeen
8. Wasaaradda Xanaanada Xoolaha, Beeraha & Deegaanka
Cali Jaamac Faarax, wasiir
Xasan Daahir Maxamuud, wasiir ku xigeenka X.Xoolaha
Max’ud Max’ed Sh.Ibraahim, wasiir ku xigeenka Beeraha & Deegaanka
9. Wasaaradda Batroolka & Macdanta
Xasan Cusmaan Maxamuud, wasiir
10. Wasaaradda Kalluumaysiga, Dekedaha & G.Badda
Axmed Saciid Aw Nuur, wasiir
C/weli C/raxmaan Geyre, wasiir ku xigeenka Kalluumaysiga
C/qaadir Muuse Yuusuf , wasiir ku xigeenka D & G.Badda
11. Wasaaradda Shaqada & Dhalinyarada
C/Nuur Cilmi Maxamuud, wasiir
Cali Axmed Faarax (Naaji), wasiir ku xigeen
12. Wasaaradda Caafimaadka
C/raxmaan Saciid Maxamuud, wasiir
C/raxmaan Diiriye Shuuqe, wasiir ku xigeen
13. Wasaaradda Waxbarashada
Maxamuud Bile Dubbe, wasiir
Cabdi Maxamed Maxamuud (Goobbe), wasiir ku xigeen
Keyse Cawil Ladane, wasiir ku xigeen
14.Wasaaradda Warfaafinta & Dhaqanka
C/raxmaan Maxamed Saalax, wasiir
C/qaadir Geelle Maxamed, wasiir ku xigeen
15. Wasaaradda H.Haweenka & Arr.Qoyska
Caasha Geelle Diiriye, wasiir
Buraale Yuusuf Weris, wasiir ku xigeen
Jaamac Xirsi Faarax, wasiiru dowlaha Amniga
II. Xeerkani wuxuu dhaqan gelayaa markuu Madaxweynuhu saxiixo
Maxamuud Muuse Xirsi
Madaxweynaha dowladda Puntland,wuuna saxeexay. ###
Faafin: SomaliTalk.com | Dec 15, 2007
 Gen.
Cadde Muuse oo Tabco Hordhigaya Col. Nuur Cadde,
ra'iisul wasaaraha cusub: Wafti ka socda shirkada Africa Oil Corp ayaa
Gen. Cadde kula kulmay Garoowe...
Akhri...
|
Daabaco
Boggan | Print