ALLA DOWLADNIMO FOGAA! JUG JUG
MEESHAADA LA JOOG.
![](fahad2.jpg)
Fahad
Yaasiin Xaaji Daahir
fahadsom@gmail.com
:::FAALLADII ISNIINTA EE
FAHAD:::
Isniin:
Mar 6, 2006
Waxaan u safray
Baydhabo si'aan uga qayb-galo furitaankii shirkii Barlamaanka, jidka dheer ee
Xamar iyo Baydhabo udhaxeeya ayaan qaaday, waxaana kala kulmay dhibaato badan,
oo ay ugu badan-tahay tira-badnida Isbaarada, iyo nabad-galyo la'aanta goobaha
qaarkood.
Intii aan jidka sii hayey waxaan isa su'aalay.
Haddii adigoo shacab ah aad riski intaas le'eg u galayso, si'aad usoo aragto
halka ay Dowladdii Soomaaliya ku shirayso, intee in le'eg ayey Dowlada ku
qaadanaysaa inay iyagoo wada socda ay soo maraan jidkaas, si'ay u xaliyaan
xaallada Soomaaliya.
Bal u fiirso, shacabkii, iyo dadweynihii qaarkood
waxay joogaan caasimadii, dowladuna mudo sanad iyo xoogaa ah ayey marba degmo u
guuraysaa, tolow shacabku ma sidaas ayey ku sii jiri-doonaan? Dowladuna ma
sidaas ayey usii guur-guuri-doontaa?
Nasiib-wanaag ama nasiib-xumo, anigu ma'aanan
booqan Jawhar, waxayse Xildhibaannada qaarkood qireen, Baydhabo iney ka
fiicantahay Jawhar, waayo waa magaalo weyn, oo adeegyo badan laga heli-karo.
Waxaanse shaki ku jirin, Muqdisho iney kasii wanaagsan-tahay, waase goorma? Waa
marka shacabka Xamar jooga ay is xilqaamaan, oo ay dareemaan in umadda
Soomaaliyeed ay sugayso, loogana baahan-yahay abuurista nabad-galyo lagu
kalsoonaan karo.
Haddii aad aragto hoolka shirka lagu qabtay,
waxaad isleedahay Mudanayaasha Barlamaanka iyo madaxda saraba, waxaa daacad
ka'ah iney wax qabtaan, oo ay xal abuuraan. Waa goob aanan u qalmin iney noqoto
xitaa iskuul hoose, ama aanan lagu qaban-karin shirar iska caadiga ah, waxaase
shaki iiga jiraa, bisaylkaas Siyaasiga ah inay gaareen inta badan Xildhibaanada.
Halla shiro. Fadhigii Barlamaanka hala qabto.
Madaxdii sare oo dowlada oo dhanna hakasoo wada qayb-gasho. Laakiin intaas oo
dhan maxaa ku xiga? Maxaa suuragali kara. Maxaa sababay iney hada is ogolaadaan?
1.
Madaxweyne
C/Laahi Yuusuf markii la doortay kadib waa is tijaabiyey, wuxuu is moodsiiyey
inuu muruq wax ku xalin-karo, ciidamo ajnabi ah ayaan keenayaan, qofkaan hubka
dhigin, waa laga dhigayaa, sidaas ayuu ku dooday, taasi waxay dhashay, inuu
marti ahaado, oo uu shirar caalami ah ka qayb-galo, sidii uu u fakarayeyna ay
miro dhali-weyso. Muddo kadid waxaa laga-maarmi waayey in Shariifka heshiis
qalin ku saxiix ah lalagalo.
2.
Shariif Xasan
markii la doortay isna waa is tijaabiyey, wuxuu is moodsiiyey in Xamar uu
xalin-karo, dagaal-oogayaasha joogana haduu faataxo u maro ay qaadanayaan, oo ay
maamul iyo nabad samaynayaan. Wax walba oo Madaxweynaha kasoo yeero waa diiday,
wuxuuse markii danbe ku qancay xamar inuusan isagu waxba ka qaban karin, isku
day kasta oo uu sameeyayna waa fashilmay, oo waa laga fashiliyey. Yaa ka
fashiliyey? Bal adba!
3.
R/Wasaare
Cali Maxamed Geeddi markii la magaacaabay, nin karmeed dantiis aqood ah ayuu
noqday, hawshiisuu ka watay, xiriirkiisa ayuu sii xoojiyey, sidii beesha
caalamka dhaqaale looga heli lahaa ayuu wakhtigiisa ugu badan siiyey, taasi
waxay dhashay, inuu is waayo, oo muranka siyaasada gudaha ay ku soo uruuraan
duqowda kale, ilaa lagaaray in laga qadiyo heshiiskii Cadan.
4.
Wasiirrada
Xamar waxay isku dayeen iney fashiliyaan mashruucii Madaxweynaha, qaybo badan oo
kamid ahna waa ku guuleysteen, hadase iyagii ayaa xujo galay. Jawhar oo ay
shacabka ugu sheegaan inaan latagin, maalmo kadib markii uu C/Laahi kasoo baxay,
ayey shir u aadeen, illeen shaqadii ay xariifka ku'ahaayeen ayey wadaanee, oo
ah in wax walba ladiido, waxnana aan la dhisin. Intaas waxaa u dheer, iyagoo
halgan cusub abuuray, oo dagaal kula jira wax ay ugu yeereen Argagixisada.
Shacabkana waxaa lagu mashquuliyey qandaraaskaas.
Intaasba hadday dhacday. Barlamaankiina uu
Baydhabo fadhiyo. Waxaanan la dhaafi doonin in magaaladaas la camiro, hanti
badanna ay shacabkaas ka soo gasho, wakhti dheer kadibna la'ogaado inaanan waxba
laqaban, mindhaa hadana heshiis kale ayaa wadanka dibadiisa lagu soo gali-doonaa,
si hadana magaalo kale oo Soomaaliya kamid ah ay u camiranto.
Wixii nalagu yiri waa lagu dirirsan-yahay, wali
lagama heshiinin, xitaa Madaxweynaha iyo Gudoomiyuhu meel islama dhigin.
Furitaankii shirka ayuu Madaxweynuhu ku celiyey fikradii uu ku khudbeeyey 4.
bari kadib markii la doortay. JUG JUG MEESHADA JOOG SOW MA'AHAN?
Geedi waa latuurayaa. Maya bil kadib ayaa xilka
laga qaadayaa. Saas ma'ahanee, laftiisa ayaa kalsoonida lasiinayaa, oo dowlada
unbaa dib la'isugu-shaan-dheeynayaa. War mayee, Baydhabo iyo Jawhar ayaa loo
kala qaybinaya dowlada iyo Barlamaanka. Intaas oo qorshe ah ayay tahay
hadal-haynta Mudanayaasha.
Siday noqotaba, waa un isla iyagii. Mishaar ayaa
loo ogolaaday, sida kaliya ee lagu cuni karo, waa in horta intii cabbaar ah
aanan siyaasad kulul lagalin, qolo walba wa in loo qoslaa.
Ha'yadaha samafalka bixiya, sida kaliya ee lacag
badan looga heli karo, waa in meel lawada joogo, marka xaalku waa qawda maqashii,
waxse ha u qaban. ALLA DOWLADNIMO FOGAA.
Hadaad xanuun ka qaadayso rajo la'aanta Soomaaliya,
ha'akhrinin maqaalkan, ee waxaad telefan kula hadashaa qaar kamid ah xubnaha
dowlada, waliba kuwooda anan hubaysaneyn, hadaadse runta rabto, la sheekeyso
kuwooda hubaysan.
|