| w w w . S o m a l i T a l k . c o m |
|
| |||||
|
MAXKAMADAHA ISLAAMIGA AH HAL BIL HALOO QABTO.
Fahad
Yaasiin Xaaji Daahir :::FAALLADII ISNIINTA EE FAHAD::: Agoosto 22, 2005
Dadaal caalami ah iyo mid gudaha wadanka ahba waa loo galay sidii Xamar loo xalin-lahaa, intii talaabo ee laqaaday midna ma’aysan mira dhalin. Waxay ku dhawdahay iney quusasho gaarto xal u helida Muqdisho. Hadda kahor dhawr jeer ayaan tilmaanay heerka ay le’egtahay nolosha khaldan ee ka jirta Caasimaddii Soomaaliya, asalna waxaa u ah, nabad-galayda xumida ka jirta magaaladaas, oona sal dhig u noqotay dhibaatada guud ee ka jirta dalka oo dhan, maadama ay tahay ishii wadanka laga arkayey. Hadaba fool-xumadani waxay dalka oo dhan ka bixisay fikrad xun. 91dii ilaa iyo hadda Xamar ma’aysan helin hal nadaam oo ka taliya. Jabahadii U.S.C. halkii ay maamul ka samayn-lahayd waxay ku mashquushay sidii beelaha qaar loo bursan-lahaa, oo hardan qabiil ayey galeen. Ciidamadii caalamiga ah ayaa iyaguna yimid, laftooduna waxay qayb ka noqdeen dagaal-oogayaashii caasimada kajiray, waana iyagii dagaaladii sokeeye kaqayb-qaatay. Jen Caydiid wuxuu ku dhintay Xamar isagoo sheeganaya Madaxweyne Soomaaliyeed. Cali Mahdi oo ka horeeyey wuxuu wakhtigii ka dhamaaday isagoon Waqooyiga Muqdisho soo dhaafin, ilaa uu hadda gaaray inuuba siyaasadda isaga baxo. Maamulka gobolka Banaadir hala dhiso ayaa la yiri. Hogaamiyaha Liibiya Qadaafi ayaa diyaar u ahaa inuu maal-galiyo, tiina waxaa hor istaagay qaar kamid ah hogaamiye-kooxeed-yadii awooda-lahaa. C/Qaasim oo Carta loogu soo doortay Madaxweynaha dalka isna wuuba u gudbi-waayey inuu hanto hogaanka siyaasadeed ee Xamar, wakhtigiisiina wuxuu ku dhamaaday is jiid-jiidkii dagaal-oogayashii Muqdisho. Madaxweynaha haddeer Mudane C/Laahi Yuusuf isagu indhaha ayuuba kalaabay, umaba socdo ayuuba yiri, iskadaa inuu wax ka qabtee, inuu aado ayuu diiday, xalka kaliya ee uu u hayana waa in ciidan-ahaan gacanta loogu dhigo. Taasna hadday sidaas tahay, maxaa xal u ah caasimaddii Soomaaliya. Burburkii dalka kadib, muuqaalada ku soo kordhay dalka waxaa kamid ah Maxkamadaha Islaamiga ah ee ka hirgalay gobo dhawr ah oo dalka kamid ah. Guud-ahaan Maxkamaduhu waxay muujiyeen in la’abuuri karo nabad-galyo aan siyaasad ku xirnayn, oo ah in la dhiso hay’ado nabada ka shaqeeya iyagoon koox gooni ah u shaqayn, han siyaasadeedna uusan ku jirin, oo waxay tusaale u noqdeen, xal raadin aan ku dhisnayn xukun-doon. Marka lasoo hadal-qaado Maxkamahada Islaamiga ah wixii ay qabteen waxaa maskaxdaada ku soo dhacaysa tii ugu horeysay ee laga’aasasay waqooyiga Muqdisho ee uu hogaaminayey Sh Cali Dheere, deegaa-nadaas waxay gaarsiiyey nabad-galyo aan taariikhda Soomaalida soomarin. Cali Mahdi ayaa burburiyey isagoo siyaasadeeyey hawshii ay hayeen, isna inkaartii Makxamadaha ayaa ku dhacday, oo banaanka ayuu uga baxay siyaasadii. Dalka oo dhan meeshii laga aasaasay nidaamkan Islaamka ku dhisan, waxaa lagu gaaray nabad waarta, iyo kala danbayn, taasna waxaa sabab u ah laba arimood. 1. Xalka ay soo bandhigayeen oo ku salaysnaa Shareecada Islaamka, taasoo keentay iney iswaafaqaan noloshii dadka iyo sidii uu ilaahay ugu talagalay dunidan, taasna waxaa dheer danbiiluhu marka uu hubo in lagu kala baxayo caqiido iyo diin, oo aysan jirin laaluush iyo qabyaalad, wuxuu ku talagalaya inuusan galin raad danbi leh. 2. Ragga hormuudka u ah Maxkamadaha Islaamiga ah oo aan muujinin han siyaasadeed, sidoo kale aan sheeganin iney iyagu deeganadaas siyaasad-ahaan u matalaan ama rabaan iney matalaan. Taasi waxay dhashay in shacabku ka rumayso iney daawo wadaan oo kaliya ee aysan danahooda u socon.
Xamar waxaa ka dhisan ilaa dhawr Maxkamadood oo wada Islaami ah, waxayna leeyihiin hogaan midaysan oo loogu magac-daray Midowga Maxkamadaha Islaamiga ah, inta badanna iskumeel ayey wax ku wadaan. Fursadda kaliya ee maanta u furan dadka ku nool Muqdisho waa iney wakhti-siiyaan Maxkamadaha Islaamiga ah ee hadeerba awooda ku dhax leh magaalada. wakhtiganba nabad-galyada caadiga ah iyaga ayaa haga, ciddii wax laga dhaco, ama wax laga dilo, ama dhib kale sheeganaysa waxay u xukun-tagaan Maxkadamaha Islaamiga, iyagoo kahela intii ay awoodaan. Nabadda yar ee hadda kajirta Xamar waxaa qaybta ugu weyn leh, dadaalka Maxkamadaha Islaamiga ah ee ay uga hortagayaan khal-khalka amni-darrada ah ee ka jira aagaga ay ka taliyaan. Waxaan shaki kujirin, haddii fursad hal bil ah la siiyo midowga Maxkamadaha Islaamiga ah iney wax weyn ka qaban-karaan xal u helida nabad-galyada Muqdisho. Waa la ogahay saamaynta caalamiga ah ee ay yeelan-karto, waxaase taas lagu xalin-karaa marka ay Maxkamadaha Islaamiga ahi ay ku ekaadaan hawsha muqadaska ah ee ay qabana-yaan, sidoo kale qaabka ay kalsooni uga bixin karaan ineysan han siyaasadeed uga faa’iidaysan-doonin haddii ay nabada xal u helaan, waana qaabkii ayba ku soo guulaysteen intii ay hawsha u hayeen umadda. Tijaabooyin kala duwan waa loo soo galay sidii nabad looga dhigi-lahaa Xamar, kuligoodna waxay ku dhamaadeen khasaare iyo mushkilad horleh, sidaas-awgeed maxaa diidaya inaan fursad siino Maxkamadaha Islaamiga ah, si’ay wax uga qabtaan xaalada murugsan ee ka jirta Muqdisho. Fahad
Yaasiin Xaaji Daahir | fahadsom@hotmail.com
Kulaabo bogga www.SomaliTalk.com | |||||
| © www.SomaliTalk.com | |||||
| KHATARTA INTERNETKA | |||||
Daabaco
Boggan | Print
