Denmark oo muslimiinta
ku dhex nool ku eedeyneysa…
- Cabdulqani Qorane Muxammed
abdiqanim@hotmail.com
Iyada oo ay maalinba
maalinta ka dambeysa sii kordheyso carada muslimiinta ay ka muujiyaan
aflagaaddadii uu wargeyska Jyllandsposten ula bareeray nabiga s.c.w. ayaa
waxaa muslimiinta ku dhaqan Denmark soo food saaray culeys kaga yimid xagga
warbaahinta iyo axsaabta siyaasadda ee dalkan. Axsaabta siyaasadda iyo
warbaahinta oo isku dhinac kasoo jeeda, ayna ka dhex muuqato Jyllandsposten
oo ah jariidaddii bilowday baahinta sawir gacmeedyadii lagu aflagaadeeyay
nabiga s.c.w. ayaa waxay haatan ku guda jiraan isku day ay ku doonayaan in
ay muslimiinta ku nool Denmark dusha u saaraan masuuliyadda dhib walba oo
Denmark ka soo gaadhay carada shucuubta muslimiinta.
Pia Kjæsgaard |
Jens Ruhde |
Pia Kjæsgaard oo ah
bilcaanta u talisa xisbiga cunsuriga ah ee loo yaqaan Ururka shacabka
deenisha (Dansk folkeparti) ayaa ururrada siyaasadda ugu baaqday in fiiro
loogu laabto sii joogista imaamyada muslimiinta ee dalkan. Waxaa la
saadaalinayaa in qaar kamid ah a’immada muslimiinta ee ku sugan Denmark,
laga masaafurin doono dalka sida ay Pia Kjæsgård ku caddeysay bayaanay so
saartay. Imaamyadaas la filayo in la masaafurin doono oo ay qaar ka mid ah
magacyadooda ku xustay isla bayaankaas, ayey ku tilmaantay in ay yihiin kuwa
dabka cadaawadda hurinaya.
Hadalkaas ayaa waxaa
jawaab ka bixiyay af hayeenka dhinaca siyaasadda ururka Venstre ee haya
talada dalkan oo lagu magacaabo Jens Ruhde, kaasoo yiri fikraddani waa ay
wanaagsan tahay, hase yeeshee waxay aad ugu haboon tahay in aan marka hore
iska xasilinno carada muslimiinta caalamka ee haatan nagu wajahan, markaa
kadibna xisaabtan aynu dheer la galno muslimiinta ku nool dalkeenna.
Dhinaca kale waxaa
qoraallo hanjabaad dil ah loo soo diray, xubno ka tirsan ururka umuslimiinta
u qaabilsan difaaca rasuulka s.c.w. Waxaa sidoo kale dhowrkii maalmood ee
lasoo dhaafay gacan qaadyo loogu geystay meelo kala duwan, dhowr ruux oo
muslimiin ah oo ay ka mid tahay gabar Soomaaliyeed oo ardayad caafimaadka
barata ah, taasoo tababar u joogtay mid ka mid ah isbitaallada waaweyn ee
magaalada Århus. Gabadhaas ayaa dhibkaas loogu geystay agagaarka isla
isbitaalkii ay tababarka u joogtay, xilli ay isaga tallaabeysay laba qeybood
oo isbitaalka ah oo isu jira masaafo dhowr daqiiqo ah.
Madaxa tifaftiraha wargeyska Jyllandsposten
Carsten Juste ayaa ilaa iyo haatan ku adkeysanaya inuusan diyaar u aheyn in
uu cudur daarasho ka bixiyo aflagaadadii uu u geystay nabiga s.c.w. isagoo
ku andacoonaya in uusan ku qaldaneyn baahinta sawirradaas, hase yeeshee uu
ka cudurdaaranayo caradii ka dhalatay ee ay sababeen sawirrada.
Waxaa la yaab leh in maangaabkan tifaftire
ku sheegga ah halkii uu xal u raadin lahaa xiisaddan uu isagu kiciyey uu
ilaa haatan ku mashquulsan yahay, sidii uu muslimiinta ugu toli lahaa inay
sabab u yihiin dhibaatada adag ee Denmark kala soo gudboonaatay falkiisii
sheydaaniga ahaa, isagoo doonaya in eedda shacabka deenishka uu isaga
jeediyo dhinaca muslimiinta. Muslimiinta ayaa iyaguna geestooda u xarbinaya
sidii ay isaga dheereyn lahaayeen eedeymaha dusha laga saarayo iyo sidii ay
uga fakan lahaayeen dabinnada loogu daadinayo hadba meel aysan ka filaneyn.
Si kastaba arrinu ha ahaatee iyadoo ay
jirto in labada daraf aysan wali xal dhaba ka gaarin qadiyaddan, ayaa
durbaba nin ogol iyo nin is moogeysiinayaba ay u muuqatay gaalada, in wax ka
sheegga Rasuulka s.c.w. iyo muqadsaadka diinta islaamku aysan aheyn wax
kaftan iyo ku jeesjees toona gala.
Cabdulqani Qorane Muxammed
abdiqanim@hotmail.com
|
