• DFKMG oo 21ka Febraayo Geeddi' u ah Xamar, Sida uu Sheegay Geeddi
• "Kenya Ciidamo nabad Ilaalin ah uma diri Doonto Soomaaliya" W/A/Dibadda
• Golaha Amniga Ururka midnimada Afrika oo Ansaxiyay in IGAD ciidamo gayso Soomaaliya.

DFKMG oo 21ka Febraayo Geeddi' u ah Xamar, Sida uu Sheegay Geeddi

Feb 9, 2005

Wararka ugu dambeeyey ee kasoo baxaya Nairobi oo ah xarunta kumeel gaarka u ah DFKMG ayaa tibaaxay in bishan Febraayo 21keeda ay DFKMG qorshayneyso in ay bilowdo geediga ay ku aadayaan Soomaaliya caasimadeeda oo ah Muqdisho. Arintaas oo laga soo xigtey Ra'iisul wasaaraha DFKMG Prof. Geeddi.

Prof. Geedi waxa uu hadalkaas yiri maanta oo Arbaca ah, waxana uu intaas raaciyey in DFKMG ay  geeddiga ay u guurayaan "Muqdisho" bilaabayaan maalintaas (Feb 21), deedqa ay helaan ayeyna ku xiran tahay in taasi fusho sida uu cadeeyey Geeddi.

Toddobaadkii hore ayey ahayd marki ay soo bexeen waraka qeexayey in dowlada FKMG loogu deeqay lacag dhan 6 malyan oo dolar ($6 million) lacagtaas oo ay bixiyeen ururka midowga Yurub, Swedhan iyo UNDP, qarashkan ayaa loogu tala galay in ay dowlada ku maamusho howlaha guuritaanka iyo dirista wafdiyada soo qiimaynaya xaalada soomaaliya.

Ra'iisul wasaaraha DFKMG waxa uu caddeeyey in Muqdisho ay ahaan doonto caasimadda Soomaaliya sidii ay hore ugu ahaan jirtey (Beri samaadkii).

Maalmahan waxaa caasimaad Soomaaliya booqanayey waftiyo kala duwan oo uu kamid yahay guddoomiyaha baarlamaanka FKMG, kuwaas oo soo indha-indhaynaya in dawladu u guuri karto Xamar.

---

"Kenya Ciidamo Nabad Ilaalin ah uma diri Doonto Soomaaliya" W/A/Dibadda

Tarjumaadii SomaliTalk.com | Feb 8, 2005

Wasiirka Arimaha Dibada kenya, Chirau Ali Mwakwere, ayaa maanta oo talaado ah shaaca ka qaaday in aan dawladda Kenya ciidamo nabad ilaalin ah u diri doonin Soomaaliya, waxana uu intaas ku daray in ka qayb qaadashada ciidamadooda (Kenya) ee iska horimaad maleesiyada Soomaaliyeed ay wiiqi karto booska kenya ee dhexdhexaadnimada ah ee gobolka.

Mwakwere waxa uu shir jaraa'id ka sheegay asagoo jooga Nairobi in ay damacsan yihiin inay Soomaaliya u diraan qaybo korka kala socda nabada iyo in ay ciidamada nabad ilaalinta siiyaan aalad, taas oo ay ansixiyeen IGAD shirkii Abuja.

'Waxaan go'aansanay in aanaan ciidamo nabad ilaalineed u dirin Soomaaliya, balse aan u direyno kuwo nabada kor kala socda iyo cunto iyo aalad kale oo la siinayo nabad ilaaliyayasha" ayuu yir wasiirka Arimaha dinada Kenya oo kasoo laabtay magaalada Jeddah, Saudi Arabia oo uu kaga soo qayb galay shir looga wada hadlayey "argagixisada".

"Meesha ay dhacdo iyo doorka ay Kenya ka qaadaatay awgeed waxaan sii wadi doonaa in aan ahaano ubucda dhaqdhaqaada horumarinta nabadda Soomaaliya" ayuu yiri wasiirku.

Waxan uu intaas ku daray in wadamada Jabuuti, Suudaan, Uganda iyo Etoobiya ay muujiyeen ballan qaadkooda ah in ay taageeri doonaan sugidda ammaanka Soomaaliya ayagoo bixinaya ciidamo caawiya dawladda dibad jooga hadda ku ah wadanka deriska ah ee Kenya si ay ugu guurto wadanka qasan, waa sida hadalka loo dhigaye.

Waxa uu wasiirku yiri Itoobiya ayaa ballan qaaday ciidamada qalabka sida iyo aallada ugu badan, waxaana ku xiga Uganda, Sudan iyo Djibouti, kuwaas oo Soomaaliya u diri doona ciidamo militari ah.

"Waxaan ka hadleynaa waa dad iyo hub la dirayo, oo ay dhici karto in kooxo ay dhinac raacaan. Waxaa muhiim ah in anagu aanaan dhinacna raacin," ayu yiri Mwakwere.

Dawlaadda dhowaan loo dhisay Soomaaliya waxa ay ku sugan tahay Nairobi oo ah halkii lagu dhisay, sababtoo ah xaaladda ammaan ee Soomaaliya iyo ayadoo aan haysan imkaaniyaad ay xubnaha maamulka ku aadaan Muqdisho, caasimaad Soomaaliya ayaa warku ku daray.

Bishii October ee 2004 ayey ahayd markii Madaxweynaha DFKMG, Cabdullaahi Yuusuf, uu Ururka Midowga Afrika weydiistey ciidamo gaaraya 20,000 oo nabad ilaalin ah oo qabta hawsha nabad kusoo celinta dalka iyo hub ka dhigista, si ay dawlada si nabad ah ugu laabato dalka.

Waxaana la sheegay in Jimcada ay Soomaaliya aadi doonaan koox odoroseysa xaalada inta aysan halkaas ciidamada u dirin.

Hoos ka akhri AU oo cidiamada ansixisay:::

Tarjumaadii SomaliTalk.com | Feb 8, 2005 | ISHA: GUJI HALKAN...

Golaha Amniga Ururka midnimada Afrika oo Ansaxiyay in IGAD ciidamo gayso Soomaaliya.

Canab Mumtaz | SomaliTalk | Nairobi
Email: canabmumtaz@hotmail.com | Feb 8, 2005

Golaha Amniga iyo Nabad Galyada Ururka midnimada afrika (AU)ayaa kulankiisi ka dhacay magaalada addis ababa ee 24-aad, uga hadlay howlaha ciidamada ka socda wadamada IGAD ay ka qabanayaan somaliya.

 

Golahan ayaa ku sheegay qoraal ay soo saareen in ay ciidamada IGAD ay caawinayaan Dowladda Cusub qaabkii ay ku fulin lahayd howlaha adag ee ka haysta dhinaca amaanka inta laga habaynayo ciidamo ay leedahahay Soomaaliya.

 

Golahan Amaanka iyo nabad galyada ururka AU-da waxa uu fasax u siiyay ciidamada IGAD laga kala keenayo in ay la shaqeeyaan dowlada,iyagana ay ka gacan siinayaan dhinaca dhaqaalaha iyago ka dalbaday wadamada IGAD madaxtooda in ay soomaaliya garab istaagaan dowlada ay u dhiseena ay ku hubsadaan wax qabad la taaban karo.

 

Waxa ay ka dalbadeen beesha caalamka in IGAD ciidamada ay bixinayaan ee lagu taageerayo dowlada somaliya ay  gacan ka siiyaan dhinaca dhaqaalaha,taas oo wax badan kor u qaadi karta socodsiinta howlaha ay qabanayaan ciidamadan ee Nabad galyada soomaaliya.

 

Ururka waxa uu ugu baaqay in dowladda lafteeda aysan iska dhuminin fursadan ayna uga faa'idaysto shacabkeeda daalan ee nabada raadinaya,si loo dhameeyo khilaafkii siyaasadeed ee ay dagaaladda ka dhasheen.

 

Horay ayay ururka Midnimada afrika usoo saareen qoraal dheer oo ay uga hadlayeen xaalada soomaaliya iyo in loo baahan yahay in la helo ciidamo ka socda wadamada IGAD oo gacan ka gaysta Amaanka soomaaliya.

 

Madaxweynaha DFKMG ah ayaa horay uga codsaday ururka midnimada afrika in ay siiyaan 20 kun oo ciidamo ah si ay uga caawiyaan nabad ku soo dabaalida soomaaliya,balse lama hubo tirada ciidan ee ay IGAD bixin doonto.

 

Ciidamadan maahan kuwo ay isku raacsan yihiin dowalada iyo baarlamaanka,halka shacabka iyo culumada qaarkood ay ka banaan baxeen sheegeena ay dowlada ay taageersan yihiin laakiin aysan rabin ciidamo in la keeno dalka soomaaliya.

Canab Mumtaz | SomaliTalk | Nairobi
Email: canabmumtaz@hotmail.com | Feb 8, 2005