Daabaco Boggan | Print

---

---

Abwaan Maxamed Ducaale Nuux (Qays)

• Abwaan Maxamed Ducaale Nuux (Qays)
  Minneapolis, MN, USA
  Email: Qeysnuh01@hotmail.com

  ---

Gabaygan Gocasho wuxuu soo baxay 01/26/05 kadib Abwaanku markii uu arkay dhibaatabada Samsam haysata iyo Gorowshiiya la’aanta, aan looga garaabin xanuunkeeda,Waxaana gabaygaan tiriyey Abwaan Maxamed Ducaale Nuux (Qays), Gocashana waxay tiri. Qeysnuh01@hotmail.com

• Ga,da gabayga aniguba ma gelin dhowr guyoo tegaye
• Waataan ka gaabsaday beryahan godoladeedii
• Waataanba gees maray tixaha gebi ahaantoode
• Goortay xumaataan ka haray gogoldhigeedii
• Hayeeshee xalaan gelindanbeed soo gadaal naqaye
• Gocoshada I haysaan rabaa inaan gorfeeyaaye 
• Mar hadaanan goynayn tixaha gulufkan heensaysan
• Gar bay noqotay aniguna inaan xariga goostaaye
•  
• Aan gilgilo madfaca oo rasaas gowda kaga saaro
• Gamuunka intaan rido aan mariid ugu garaseeyo
• Goonyaha riyaaliyo suufigii guluf ku maageero
• Sheekadan guracantee nafluhu gaarka ka istaagay
• Wadana gaartay dunidee gees walbaba joogta
• Anigoo aan geesmarin hadaan gudub u faaleeyo
•  
• Gefkaad ina riyaaloow  gasheen waa mid gooniyahe
• Waa guuldariyo ceeb waxaad garabka saarteene
• Geel layska qaadiyo waa naqiin gawrac nimaneede
• Ilamaa gobaysane rag waa guluftamaayeene
• Godob iyo gashina waa jireen abid gefaayoowe
• Hayeeshee midaad gaysateen garasho maahayne 
• Caqligaa ku gees maray markaad gaban maxbuusteene
• Axmed baad garsiisaye xumuhu kuma gulaaleene
• Gu,giisiyo wuxuu shalayto galay waaba kala gaare
• God intuu ka dhacay buu misana gole rag joogaaye
• Halabsiga halkuu gaaray oo gacantogaaleeyey
• Mirahana ka soo guray maaha geedsaare     
• Guufanaysku ceeb kama baqayn inay gujaysaaye
• Ha ka goosto gabayada guntamay wixii ka soo gaara
•  
• Afartaa gorfeeyaye hadaan geeskalena dhowro
• Gafanuhu waqiis maanu helin geenyadoo kale                   
• Garayskuu ka jaray baa wadnuhu ii gig leeyahaye
• goofaartankiisaa naflihi wada gariireene
• goortuu ka giiguu misana goohay oo ciyaye
• sidii gool u jabay buu farxadii giisayaa weliye
• sidii buuna ugu gaafanyahay xumaha geedkiiye
• cid gargaarta may helin yartina taniyo gaabkiiye
• maxaan gabay ka tiriyaa hadaan goolna dhalanaynin.
•  
• afartaa gorfeeyee hadaan geesta kale dhowro
• garaarkeeda nimankii jaree gooyay dulaceeda
• ee aan ka gaabsane xumaha ugu gabaadyeeshay
• nimankaan geday mudantihiyo garan wanaageeda
• geenyadii galoolnayd kuwii ibaha soo gooyay
• korantana ku gubayoo wadnaha holaca gaarsiiyay
• nimankii godka u qoday yartii gu,ga aan qaangaadhin
• go,ayayda qaylada kuwii goorna deyiwaayay
• inta ay garaaceen kuwii gawda kaga saaray
• iyagay ku gaartahay waxay galabsanaayaane
• garaadlaawihii bay misana gaar ku sii tahaye
• guudweyne maba geyo hablaha geshka soo kacaye
• mid uun gaala mooyee midkale waa ka garanuuge
• rabibaa gudoonkaas ridoo gooyay taladaase
•  
• afartaa gorfeeyaye hadaan geeskalana dhawro
• gargayriyo waxgarad baan lahaa way gurmanayaaye
• Guurtiyo wasiiraan lahaa gelaya hawshaane
• culimaa gedoon  baan lahaa oo hub soo gurane
• gabdhihii hargaysaan lahaa eygay gawriciye
• gulufkay dumaan baan lahaa wuu gilgilayaaye 
• ruuxay ka goyn  baan lahaa gaada waynaha e
• Denbiguu galaayaan lahaa waaba laga goyne
• Ilmaduu ka gobosiin baan lahaa gooriyo ayaane
• ma anigaa gedaan dhowrayiyo xaajadaan gudubtay
•  
• Afartaa gorfeeyaye hadaan geeskalana dhowro
• samsameey godkaad jiifto ee guunku kugu ooday
• Gocoshada ku haysiyo hoheey gama la,aantaada
• Gidi laylka soo jeedka iyo gogosha hiifkaaga
• Gaajada ku haysiyo haraad labada gooroodba
• Garaafada ku gaartiyo wixuu cadawgu gaystay
• galiilyada xanuunkiyo walaal midab gadoonkaaga
• Gudgudaha ku weerarahayiyo dulin ku gaadaaya
• Goodkiyo abeesada ku cunay garay aduunkiiye
• Gaaliyo islaan waa arkaan gafanayaashaase
• Go,aan baana soo bixi mardhow gooray noqotaaye
•  
• afartaas gorfeeyee hadaan gobodi soo gaaro
• samsameey gacmaha taag rabaa ku gargaar geliye
• samir baad ku gaartaa waxaad goob isleedahaye
• guushana allaa kuu hayoo way ku soo geliye
• ha ka gaabin tuugmada allay guushu dabataale
• gaashaanso tawxiidku waa gaadhka noloshaane
• samirkana gudoonsoo wardiga gacal walaalayso
• aniguna garnaylkiyo magliga waan gilgilayaaye.

Abwaan Maxamed Ducaale Nuux (Qays)
Minneapolis, MN, USA
Email: Qeysnuh01@hotmail.com

Faafin: SomaliTalk.com | Jan 26, 2005

Afeef: Aragtida qoraalkan waxaa lagal xiriiri karaa qoraaga ku saxiixan

Dhegeyso Gabaygii Dardaaran Oday & Daryeel Haween | Waxa tiriyeey Cali Dhawaaq

Shuruudaha Gabayada Silsiladda Samsam

SEARCH