-
Wafdi
ka socda dowladda FKMG ah oo
booqanaya Jowhar iyo Baladwayne.
- Xaflad ay
ardeyda Soomaaliyeed ku qabteen
magaalada Karachi ee waddanka
Pakistan
Wafdi ka
socda dowladda FKMG ah oo booqanaya
Jowhar iyo Baladwayne.
Wafdigii
xaqiiqo raadinta:
Wafdigan
oo ay hogaaminayeen Gudoomiyaha Maamulka
Jowhar Maxamad Dheere iyo Wasiirka
Waxbarashada Dowladda FKMG ah ee
Somaliya Cali C/llaahi Osoble ayaa
saakay ka duulay Nairobi iyagoo ku sii
jeeda Magaalooyinka Jowhar iyo balad
wayne ee Dalka Soomaaliya.
Wafdigan
ayaa qayb ka ah wafdiyo ay dowladdu ugu
tala gashay in ay u kala dirto gobolada
dalka soomaaliya si ay ugu baahiyaan
awoodooda iyo ka kasbasho taageero
shacabka goobaha ay tagayaan.
Wafdi kan
la mid ah oo uu hogaamin doono Wasiirka
Cadaaladda DFKMG ah Aadan Madoobe ayaa
iyagana safar ku kala bixin doona
Magaaladda Bay iyo bakool,iyagoo bari
Nairobi ka Ambaxaya,si ay barnaamijka
dowlada uga soo dhaadhiciyaan dadka ku Nool
deegaanadaas.
Wafdigan
ayaa inta ay joogaan goobahaas u
kuurgalaya xaaladda siyaasadeed iyo
nabad galyo iyadoo aysan meesha ka
marnayn in ay soo sahmiyaan halkii ay
dowladdu u caga dhigan lahayd si Ku meel
gaar ahaan ah.
Wafdigan
Maanta u ambaxay Magalada Jowhar ayaa
dib ugu soo laaban doona Naiorobi ka dib
mudo todobaad ah waxayna warbixin u
gudbin doonaan Gollaha wasiiradda.
Ra'iisul
wasaaraha ayaa horay u sheegay in uu
gollahiisa wasiiradda u kala dirayo
golada dalka si ay halkaas dadka jooga
uga soo dhaadhicaan qorshaha dowlada
soona qiimeeyaan aragtooda ku aadan
nabad ku soo dabaalida dalka iyo sida ay
dowldda ula shaqaynayaanba.
Warbixintii: Canab Mumtaz | SomaliTalk |
Nairobi
Email:
canabmumtaz@yahoo.com
| Feb 16, 2005
Xaflad ay ardeyda
Soomaaliyeed ku qabteen magaalada Karachi ee
waddanka Pakistan
Xaflad si heer
saraa loo soo agaasimay, oo ay soo qaban
qaabiyeen ardeyda Soomaaliyeed ee ku dhaqan
magaalada Karachi ee waddanka Pakistaan,
ayaa waxaa xalay abbaariihii 6:30 fiidnimo
lagu qabtay hoolka xafladaha ee University
Lawn ka soo horjeedka albaabka weyn ee
jaamacadda Karachi oo ku taalla magaalada
Karachi ee waddanka Pakistan. Xafladdaan oo
ahayd tii ugu horeeysay, oo nooceedoo kalaa,
oo ay qabtaan ardeyda Soomaaliyeed ee wax
kabarata magaalada Karachi, ayaa waxay
isugu jirtay sagoontiga ardayda Soomaaliyeed
ee ka qalin jabisey sannadkaan jaaamacadaha
magaalda Karachi iyo soo dhaweynta ardeyda
Soomaaliyeed ee sannadkaan laga aqbalay isla
jaamacaddaha magaalda Karachi ee waddanka
Pakistaan.
Xafladdaan
waxaa kasoo qayb galay culuma-u-diin,
waariddiin, dhalinyaro, aqoon yahanno iyo
ardey kale oo ajaanib ah, oo isugu jirtay
Jabuutiyaan, kenyaati, sinigaal Suudaan iyo
falastiiniyiin, waxaa kaloo isna xafladdaas
kasoo qaybgalay qunsulka kenya u fadhiya
magaalada Karachi Maxammed Axmed Dhuungooye,
iyo qunsul sharafeedka safaaradda Soomaaliya
Mr. Arshad.
Waxaa ugu
horayntii furitaankii xafladda kaddib
muxaarado diini ah ka soo jeediyey Shiikh
Bashiir Axmed Salaad oo ka hadlay ahmiyadda
wax barashadu ay leedahay. Wuxuu kaloo
sheekhu uu u hambalyeeyey ardeyda qalin
jabisay iyo kuwa bilaabaya waxbarashada,
isagoo ka codsaday ardeyda qalin jabiyey in
ay dalkooda iyo dadkoodaba si daacad ah ugu
shaqeeyaan, wuxuu kaloo sheekhu xusay in
dadka aqoonta leh ay shacabku ka
kacabanayaan haddii ay ahaan lahaayee
dhaqaatiir, siyaasiyiin iyo kuwa kalaba.
Wuxuu kaloo sheekhu ku waaniyey ardeyda in
ay dalkii geeyaan cilmiga maaddigaa iyo
diintoo isku xiran ee aysan geen oo kaliya
cilmiga maaddiga ah oo kaliya, Wuxuu kaloo
sheekhu u sheegay ardaydii qalin jabisay in
ay daaweeyaan cudurka manta Soomaaliya la il
darantahay oo layiraahdo cudurka qabiilka.
Waxaa
xafladda laga aqriyey qoraal uu soo diray
siihayaha safaaradda Soomaaliya Axmed C/rixmaan
Sheikh Nuur oo isgu kasoo qayb gali waayey
xafladdaas xanuun qabtay owgiis. Siihaya
safaaradda wuxuu u mahad celiyey
dhalinyaradii soo qababan qaabisay xafladda,
wuxuu kaloo siihaya safaaradda uu
qoraalkiisa kaga codsaday dhalinyarada, in
xafladda noocaan oo kalaa ay qaban
qaabiyaan sannad walba isagoo u hambalyeeyey
ardeyda qalin jabisey iyo ardeyda cusubba.
Waxaa
kaloo halkaas kahadlay Axmed Sheelare oo
kamid ah waariddiintii xafladda kasoo qayb
galay, Axmed sheelare oo kayimim waddanka
Ingiriiska ayaa wuxuu ugu horaytii u mahad
celiyey waddanka Pakistan, wuxuuna yiri “Waxaan
u mahad celinayaa waddanka Pakistan oo ah
waddanka kaliya ee iminka soomaalida gacan
qabta, siiyana fiisooyinka wax barasho”.
Sheelare wuxuu sheegay Soomaalida ku nool
Pakistaan in ay ka faa’iidaysteen
fursaddoodii iyo waqtigooda dahabiga ah,
halka Soomaalida Yurub iyo Mareykan joogta
ay aad u dayaceen fursadahoodii. Sheelare
waxaa kaloo uu ku waaniyey aqoonyahannada ka
qalin jabiyey jaamacadaha markii ay ku
laabtaan waddanka in ay u shaqeeyaan
dadkooda iyo dalkoodaba iskana fogeeyaan
land land-ka ummada Soomaaliyeed kala
qo-qobay.
Xassan hilowle
oo ka mid ah ganacsatada Soomaalida ku nagi
waddanka Pakistan ayaa hadal dadku ay madaxa
u luleen halkaas ka soo jeediyey. Xassan
hilowle oo khibrad dheer u leh waddanka
Pakistan, ayaa talooyin siisay ardeyda cusub,
isagoo kuwa qalin jabiyeyna ugu duceyey
mustaqbal wanaagan in eebbe siiyo.
C/rixmaan
Faarax Cali oo kamid ah guddiga qabanqaabada
xafladda, ayaa isna ka war bixiyey heerarkii
ay soo martay qabashada xafladda, wuxuu
kaloo meesha kasaaray in ay san xafladdu wax
xariira lala hayn ururo beeleed iyo kuwa
siyaasadeedba ee ay tahay oo kaliya mid lagu
maamuusayo sagoontiga ardeyda qalin jabisay
iyo soo dhaweynta ardeyda cusub, taasoo
kasaartay shaki iyo mugdi dadka qaarkiis uga
jiray xafladda. Wuxuuu kaloo tilmaamay in
aysan xafladda noocaanoo kalaa ay
qabanqaabin doonaan sannad walba.
Waxaa isna
meeshaas qudbad kooban ka jeediyey c/qaadir
Maxammed Sabriye oo ku hadlayey magaca
Ardeyda qalin jabisay, wuxuuna ka
sheekeeyey C/qaadir halgankii iyo
dhibaatadii ay u soo mareen wax barashada.
Wuxuu C/qaadir yiri kula dardaarmay
ardeyda cusub in ay waqtigooda ka
faa’iidaystaan, oo aysan fursadooda ku
dhumin meelo is-istaag, wuxuuna ku
nuuxnuuxsaday C/qaadir sida ay uga go’an
tahay isaga iyo ardeyda kaloo qalin
jabisayba in ay dalkooda, dadkooda iyo
diintayadaba wax u qabanayaan markay ku
laabtaan waddankooda hooyo”.
Waxaa isna
khudbad heer saraa kasoo jeediyey halkaas
Axmed C/qaadir Cusmaan, oo ku hadlayey
magaca ardeyda cusub. Axmed wuxuu kula
dardaarmay ardeydii qalin habisey in aysan
wax barashada hal kaas ku joojin, ee ay
kasii ambaqaadaan meeshay hadda marayaan,
isagoo soo qaatay oraahda dhahaysa “Wax
barasho ma dhammaatee ninkeedaa dhammaada”.
Dhanka kale wuxuu Axmed kula dardaarmay
ardeyda cusub in ay tiigsadaan meesha ay
iminka walaalahood gaareen.
Riwaayad
far shaxan heer saraa loo sameeyey, laguna
soo fara yareystay ayaa ardeydu ku soo
bandhigeen xafladda. Riwaayddaas oo ay ugu
magic dareen “Ma anaagaa qaldan mise waa
nala qalday”, ayaa runtii ahayd mid aad
u xiiso badnayd soona jiidatay dadkii kasoo
qayb galay xafladdaas. Waxaa kaloo caruurta
Soomaaliyeed oo jeeni qaarsan calanka cirka
u eg, dhexdana ku leh xiddigta shanta gees
leh ay ka qaadeen halkaas heeso waddani ah,
oo ay kamid ahayd heesta calanka Soomaaliya.
Caruurtaasoo si hallaasi ah isgu jiibinayey
heesaha, si wacanna iskula jaangooynayey,
ayaa gilgiley dhammaan dareenka dadkii
xafladdaan isgu yimid, halkaasoo dadka qaar
la arkayey iyagoo ilmaynaya.
Ugu
danbeyntii Waxaa halkaas ka hadlay Maxamed
Axmed Dhuungooye qunsulka safaaradda Kenya
ee Karachi, wuxuuna kahadlay qunsulku
ahmidda wax barashadu ay leedahay iyo
jahliga dhibaatadiisa, qunsulku wuxuuu kaloo
ku waaniyey ardeyda qalin jabisey markii ay
dalkooda ku laabtaan in ay wax u qabtaan
dadkooda tabaalaysan, ee uu jahligu leefay.
Waxaa isna qunsul sharafeedka Soomaaliyeed
Mr. Arshad guddoonsiiyey jaa’isooyin
ardeydii qalin jabisay.
Sannadkaan oo ay ardeyda Soomaaliyeed ee
qalin jabinsay madaxa kala baxeen 20, kuwa
la aqbalayna ay foodda galinayeen 30, ayaa
waxaa lagu tilamaamay in uu yahay sannadkii
ay ugu badnaayeen ardeyda Soomaaliyeed ee ka
qalin jabisey iyo kuwa ku soo biirey
jaamacada magaalada Karachi ee waddanka
Pakistan.
W/D Suldaan
Nayruus Xaaji Aadan
Karachi-Pakistaan.
Suldan25@yahoo.com
Daabaco
Boggan | Print