• Wafdi xaqiiqo raadin ah oo ka socda Ururka midnimada Afrika iyo Jaamaca Carabta oo mogadisho gaaray Caawa.
• Shariif Xasan Sh Aadan oo Baarlamaanka Hor dhigay maanta Warbixin la xiriirta safarkiisi Xamar. 

Warbixintii: Canab Mumtaz | SomaliTalk | Nairobi
Email: canabmumtaz@yahoo.com | Feb 14, 2005

Wafdi xaqiiqo raadin ah oo ka socda Ururka midnimada Afrika iyo Jaamaca Carabta oo mogadisho gaaray Caawa.

Shariif Xasan Sh Aadan oo Baarlamaanka Hor dhigay maanta Warbixin la xiriirta safarkiisi Xamar. 

Gudoomiyaha Baarlamaanka Shariif Xasan Sh Aadan oo maanta iskugu yeeray gollaha baarlamaanka ayaa uga waramayay safarkii uu dhawaan ku tagay magaalada Muqdisho,waxa uu baarlamaanka u sheegay sidii loo soo dhaweeyay,meelihii uu booqday iyo mas’uuliyiinti uu wada hadalka la yeeshay maalmihii uu ku sugnaa halkaas. 

Warbixintiisa waxa uu ku xusay Shariif xasan in dadka soo dhaweeyay ay kor u dhaafeen boqolaal kun,dhamaantoodna ay ku faraxsanaayeen in wafdigan uu soo booqdo dowladana ay sugayeen in ay timaado caasimada si nabada hal meel looga soo wada jeesto waxa ayna balan qaadeen ayuu yiri dadkaas na soo dhaweeyay in ay ka qayb qaadanayaan dhismaha dowladda ayna taageersan yihiin. 

Mar uu ka hadlayay Gudoomiyaha baarlamaanka kulankii uu la yeeshay maxaakimta islaamiga ah ee magaalada mogadisho waxa uu sheegay in ay taageersan yihiin dowladda,laakiin ay rabaan in lagu dhaqmo KITAABKA ALLE,dowladdana aysan cadaw ku ahayn ayna kala qayb qaadanayaan dhismaha dowladda iyo howlaha amaanka caasimada. 

Shariif  xasan waxa kale oo uu sheegay in uu soo arkay 600 kun oo ah ciidankii xooga dalka ah waxayna balan qaadeen ayuu yiri difaacida dalka iyo dalkaba,ciidamaas waxa ay ii muujiyeen dowlad jacayl iyo taageero xoogan oo ay u u hayaan dowlada iyo baarlamaanka ayuu intaas ku daray waxa uuna baarlamaanka usoo jeediyay in ay ku filan yiihiin intaas hadii la qalabeeyo lana tababaro. 

Dhinaca ganacsatadda iyo siyaasiyiinta markii uu mar uu baarlamaanka uga waramayay waxa uu sheegay in ay yihiin xoog aan la xaqiri karin waxayna iisoo dhaweeyeen si heer sare ah iyagoo noo sameeyay casumaad talooyina na siiyay,waxa ay sheegeen qaarkood siyasiyiintaas in loo baahan yahay ciidamo shiheeye laakiin aan lagu soo darin kuwa safka hore hadii lagu soo darana ay sii xumayn karto xaalada amaan ee ka jirta dalka guud ahaan. 

Ugu dambayntii waxa uu baaq nabadeed u diray beelaha isku haya meelo ka mid ah soomaaliya ee dirirtu ka dhexeeyso in ay joojiyaan,una soo jeestaan nabada iyo dib u heshiisiinta iyagoo ogaanayana in laga gudbay xiligii dadka walaalaha ah ay dhamayn lahaayeen ee loo gudbay tiigsiga horumarka iyo wadada Nabad Raadinta. 

Gollaha baarlamaankana waxa uu sheegay in ay Go'aanka iyaga leeyihiin,kana soo baaraan dagaan arrimahan uu ka hadlay kadibna ay waxii ay hayaan usoo gudbiyaan isaga,si uu ula laabto mas'uuliyiinti xamar ee uu la soo kulmay. 

Waxa uu baarlamaanka u sheegay in uu caawa u ambabaxay safar dalka talyaaniga ah,isagoo ka soo qayb galaya casuumaad ay baarlamaanka u fidisay dowladda talyaaniga ee ku aadan isbarasho tala siin iyo tababar oo dhex mari doona labada dal,isagoo sheegay in ay soo laaban doonaan bishan aaqirkeeda isla xiligaas oo ku beegan 23 bishan uu dhici doono kulanka baarlamaanka.

Warbixintii: Canab Mumtaz | SomaliTalk | Nairobi
Email: canabmumtaz@yahoo.com | Feb 14, 2005