Wararkii Maanta 25/12/2004

• DR. CARAAYE: “Ra’iisul wasaaraha waxaan u soo jeedinayaa inuu dhiso dowlad ka kooban 150….

• Waxgaradka Beesha gaal jecel oo soo saaray Warqad

• Maalinta Carruuta oo laga xusay Soomaaliya
   

• Waxaa isku soo dubaridey:
  amiinkhasaaro yuusuf
  amiinkhasaaro@hotmail.com
  Muqdisho, Soomaaliya

  ---

DR. CARAAYE: “Ra’iisul wasaaraha waxaan u soo jeedinayaa inuu dhiso dowlad ka kooban 150….

(Dowladda Waxaa riday rag laf-gaab ah oo aan lahayn mustaqbal siyaasadeed)

Dr. C/raxmaan Yuusuf Caraaye (Joon) oo ka mid ah indheer-garadka Soomaaliyeed ayaa u soo jeediyay Ra’iisul wasaare Prof. Cali Maxamed Geeddi inuu dhiso Dowlad ka kooban hal ra’iisul wasaare, saddex Ra’iisul wasaare ku xigeen, 36-wasiir, 36-wasiir u dowle, 74-wasiir ku xigeen (1+3+36+36+74 = 150) si loo helo aqlabiyadda Baarlamaanka, waxa kale oo uu soo jeediyay in la magcaabo toban kale oo ka mid ah xildhibaanada si looga dhigo si ku meel gaar ah guddoomiyeyaal gobol inta laga gaarayo doorashooyinka dowladaha hoose.

Dr. Caraaye ayaa sheegay in dhaqaalaha dalka uusan qaadi karin wax ka badan dhowr iyo toban wasiir, hase ahaatee dhaqanka xubnaha baarlamaanka uu khasab ka dhigayo in la tixgeliyo rabitaankooda ilaa laga helayo doorashooyin, waxa kale oo uu sheegay in indheergaradka Soomaaliyeed iyo beesha Caalamkaba ay jecel yihiin in la koobo ama la yareeyo tirada golaha wasiirrada, hase ahaatee waxaysan xisaabta ku darin in xubnaha baarlamaanka badankood uu mid kasta yaqaan nafsaddiisa iyo waxa uu isaga noqonayo uusanna jirin nidaam lagu kala diro baarlamaanka haddii uu xilkiisa gudan waayo, isla markaasna aysan jirin cid ku qanci karta inay danta guud ka hor-mariyaan.

Dr. C/raxmaan Yuusuf Caraaye waxa kale oo uu yiri: waxay ila tahay in ragga dowladda riday ay badankood yihiin laf gaab (Minority) oo aan lahayn waxqabad siyaasadeed baarlamaankana uu xal u yahay oo uusan xaq ahay, tusaale ahaan 31-xubnood ayaa la siiyay beeshay Shanaad ma ii sheegi kartaa 90-ka degmo ee Soomaaliya degmada uu aqlabiyada ku leedahay ee laga soo dooranayo?. Waxaa intaa dheer in xildhibaannad ay ka buuxaan kuwo ka dhashay beelo waaweyn Hawiye, Dir, Daarood, Digil iyo Mirifle balse beelaha dhexdooda ku  ah Laf-gaab (Jufo yar) oo wax ku helay magacyo jufooyin yar-yar oo aan iyaga la soo dooran doonin mustaqbalka, bal ii sheeg meesha laga soo dooranayo, Zakarie, Cumar Xaashi, Caasho Axmed C/lla, C/kariim, Kaamil, Xirsi, Eng. Munye, Shariif Xasan, C/casiis, Naaji, Afrax, Bulbul, Xaaf, Bide, Cabdi Warsame iyo kuwo la mid ah fursadaha keliya ah ee ay haystaan waa inay maanta wax noqdaan ama la helo nidaam kali talis ah oo u soo maroojiya xaqa lafweynta (Majority). Weligaa ma maqashay 8-xildhibaan oo baadi cadde ah, 5-carab ah, 8-Ciise ah, 3-Meheri ah, 5-Leelkase ah, 7-Murusade ah, 4-Surre ah, 3-Jiiddo ah, 3-Boqol hore ah.

Laf-gaabtu waxba ku soo kordhin mayso xasilloonida dalka, tusaale waxaa noogu filay dowladii Carte oo xulatay iyaga hase ahaatee nidaamka ayaa ah mid baarlamaan aan ku imaan doorasho ee ku yimid xulasho qabiil laf-gaabtana u sahashay inay xubo ku yeeshaan baarlamaanka. Waxaan  u soo jeedinayaa ra’iisul wasaaaraha inuu yeesho dulqaad uuna si aad ah u kordhiyo golaha wasiirrada xilligaan ayuu ku soo af-jaray Dr. Caraaye.