Wasaaradda Gaashaan Dhigga Xukuumadda Federaalka oo sheegey in Ciidmada Kenya ay ka mid noqonyaa AMISOM laakiin kuwa Itoobiya waxay naga taageerayaan Logistigada

Iyadoo Habeenimadii Xalay Magaalada adis ababa ee Carriga Itoobiya lagu soo gaba gabeeyay Shir madaxeedkii Wadamada Xubnaha ka ah Urur Goboleedka Igad ayaa haddana Shirkaas lagu taageeray soo gelitaanka Ciidamada Kiinya ee gudaha Soomaaliya.

Ra’iisul wasaare Ku Xigeen ahna wasiirka gaashaan dhigga Xukuumadda Federaalka Soomaaliya Xuseen Carab Ciise ayaa sharaxaad ka bixiyay shirkaasi iyo go’aanadii ka soo baxay.isagoo sheegey in Dowladda Federaalka ay taageero weyn ka heshey Wadamadda ka tirsan urur Goboleedka IGAD

Xuseen Carab ayaa sheegey in Ciidamada Kiinya loo Ogolaaday in ay Xubin ka noqdaan Ciidamada Nabad ilaalinta ee AMISOM halka uu sheegey in Ciidamada Itoobiyana laga Codsaday in ay Taakuleeyaan Hawl galada Ciidama amisom, kuwa dawladda iyo Kiinya ay kula dagaalamayaan Xarakada Shabaab.

Wasiirka Gaashaan dhigga ee xukuumadda Federaalka Soomaaliya ayaa sheegey in Itoobiya ay ku soo galayso Dalka Soomaaliya Magaca Itoobiya isla markaana aysan hoos imaanayn Taliska amisom.

Xuseen Ciise Carab oo ka mid ahaa wafdigii Dawladda ku meel gaarka Soomaaliya uga qayb galay shirkaas oo uu hoggaaminayay Madaxweynaha dawladda Federaalka Soomaaliya ayaa si qoddo dheer uga hadlay shirka IGAD ee sanadkan oo intiisa badan loo hadlayay arrimaha Soomaaliya gaar ahaana sidii xarakada Shabaab looga saari lahaa Dalka Soomaaliya.

Shirka IGAD ee sanadkan ayaa sidoo kale waxaa uu soo dhaweeyay Xubin ahaanshaha Dawladda Koofurta Suudaan oo markii u horeeyay shirkaas ka soo qayb gashay.,Si kasta ha ahaatee Imaatinka Ciidamada Itoobiya ee Soomaaliya ayaa ah arrin si weyn muran u dhalisey taasoo wax la iska weeydiinayo waxa ay xaaladda soomaaliya xiligan ku soo kordhin karto Itoobiya.

Faafin: SomaliTalk.com | Nov 26, 2011