| w w w . S o m a l i T a l k . c o m |
|
|
Cali Maxamed Geeddi Wasiiradiisii mid kamida oo ugu baaqay in Hantidii ummmadda Soomaaliyeed uu ka dhacay uu u soo celiyo ee uusan kursi uga raadsan: Dr. C/casiis
Waraysiga oo dhamaystiran
"Waxaan u diyaar garoobey in aan ummadda horteeda ka markhaanti kaco dembiga uu ninkaasi galay iyo hantida qaran ee uu qaatay. Ilaahay Hortiisna waa kaga markhaanti kacayaa haddii Allah idmo...." Waxaa SomaliTalk.com waraysi la yeelatay Dr. Cabdicasiis Sheikh Yuusuf oo wasiir kasoo noqday xukuumaddii uu madaxweynaha ka ahaa Cabdullaahi Yuusuf Axmed. Dr. C/casiis waxa uu ka mid ahaa guddigii ka koobnaa 24-kii xubnood ee loo xilsaaray in ay soo xulaan baarlamaanka DFKMG ee lagu soo dhisay Kenya, ayagoo la kaashanayey odayaal Soomaaliyeed ayeyna soo xuleen xubnahii baarlamaanka. Markii la soo dhisay dawladdii kumeelgaarka ahayd waxa uu ka noqday Wasiirka Caafimaadka iyo xubin ka tirsan baarlamaankii ilaa markii dambe uu iska casiley. Dr. Cabdicasiis oo aan wax ka weydiiney arrimo badan oo ay ka mid yihiin lacagahii faraha badnaa ee xukummadda Federaalka loogu deeqay, gaar ahaan lacaagahii loogu deeqay mashruucii loo bixiyey "dib u heshiisiinta Soomaaliyeed". Waxana uu sheegay in uu wax badan kala socdo lacagahaas, gaar ahaan waxa uu sheegay in sannadkii 2006 ay dawladda Sacuudigu ay DFKMG ugu deeqday lacag gaareysey $32 million oo doolar. oo uu ogyahay kacagtaas ciddii ay jeebkeeda ku dhacday iyo sidii shacabka Soomaaliyeed loo dhacay. Dr. C/casiis waxa uu sheegay in Sucuudigu uu shardi lacagtaas uga dhigay in ay xukuumadda Soomaaliyeed ay ku qaadan karto go'aan ka yimaada golaha wasiirada (council of ministers). Waxana uu sheegay in Sacuudigu uu lacagtaas dhigay Bangiga AL-AHLI ee laga leeyahay Sacuudiga, waxaana bangiga lagu wargeliyey in lacagtaas lagu qaadi karo ogolaanshada Golaha Wasiirada DFKMG oo keliya. Markii SomaliTalk.com ay weydiisey waxa uu ahaa nidaamka u yaalay xukuumadda Federaalka ee ku aadan lacagtaas iyo cidda ay ahayd in loo dhiibo waxa uu ku jawaabay "Nidaamka ka yaalay waxa uu ahaa in qof wasiirada ka mid ah ama dawladda ka mid ah uusan ku tagri fali karin iyo in lacagtaas sida keliya ee lagu bixin karaa ay tahay qorshe ay isla wada ogolaadeen golaha wasiirada." Dr. Cabdicasiis oo ka jawaabayey su'aal ahayd lacagtaas Sucuudigu bixiyey xaggee ku dambeysey yayse gacanta u gashay waxa uu yiri: "Lacagtaasi waxay si khalad ah, oo boob ah, oo tuugnimo ah, gacantiisa u gashay ninkii markaas ra'iisul wasaaraha ka ahaa dawladda, oo ahaa Cali Maxamed Geeddi, kaas oo forgery (Been abuur) sameeyey oo uu ka dhigay in guddigii golaha wasiiradu ay isla ogolaadeen oo laacagtii baahi loogu qabo xagga amniga, xagga ciidanka, xagga shaqaynta wasaaradaha iyo xagga dib u heshiisiinta - wuxuu qoray dukuminti Forgery ah, sidaas oo weliba uusan ogeysiin wasiirkii Maaliyadda ee markaas Xasan Maxamed Nuur (Shaati gaduud), waxa uu watay (kaxaystay) nin kale oo ahaa ra'iisul wasaare ku xigeen iyo wasaaradda xanaanada xoolaha oo la yiraahdo Saalim Caliyow Ibrow...." Dr. Cabdicasiis Sh. Yuusuf waxa uu hadalka ku adkeeyey in labadaas (Geeddi iyo Ibrow): ay is raaceen iyaga oo wata been abuurkii ay ka sameeyeen golaha wasiirada - labadoodu markii hore isma raacin ee Cali Maxamed Geeddi waxa uu sheegtay in uu xanuunsanaa oo doonayo in uu Sacuudiga isku soo daweeyo, halka Ibrow uu soo maray meel kale (oo ay isugu tageen Sacuudiga) - lacagtii sidaas ayey uga soo saareen Koontadii ay dawladdu ku lahayd Bank Al Ahli ee Sacuudiga, taas oo ah xatooyo aan waafaqsanayn sharciga, ayuu yiri. "Sidaas ayuu Ra'iisul wasaarahii hore lacagta kula soo baxay isagoo caawinaad ka helay Saalim Caliyow Ibrow. Sidaas ayey ku qaateen. Cali Maxamed Geeddi ayey jeebkiisa gashay lacagtaasi." SomaliTalk markii ay weydiisey: Arrintaasi waa eedeyn weyn ee maxaad cadayn u haysaa in Cali Maxamed Geeddi lacaagtaas qaataay isagoo ka jawaabayey Dr. C/casiis waxa uu sheegay in uu hayo cadaymo dukumiinta ah, waxana uu sheegay in arrintaasi markii ay dhacday ay golahii wasiiradu la xiriireen Bangiga Al Ahli ee Sacuudiga, waxana bangigii uu markaas soo diray dukumiinti muujinaya in lacagtaas la qaatay oo ay saxiixa ku qaateen Cali Maxamed Geeddi iyo Ibrow oo u kaalmaynayey. Markii aan weydiiney waxa ay arrintaas ka qabteen golahii wasiirada ee uu ka tirsanaa Dr. C/casiis waxa uu yiri: Waxba kama aysan qaban "Waan qiranayaa in Golaha Wasiiradu aysan waxba qaban, oo waxba ka qaban in madaxdoodii oo ay ogyihiin oo tuugo hanti qaran ah samaysay oo lacagtii dawladda dhacday, taas ayada ah waan qiranayaa golahii wasiirada ee aan ka mid ahaa waxba in aysan arrintaas ka qaban."
Dr. Cabdicasiis oo ka hadlayey Kenya oo uu xilligan deggan yahay Geeddi waxa uu yiri "Dawladda Kenya waxay ila tahay in ninkaas hantida Qaranka boobay isla markaasna doonaya in dawladda jirta oo sharciga ah ku furfuro ama awooddii ugu soo laabto mar dambe si uu wax yaalahaas iyo wax la mid ah ugu kaco in dawlada deriska aan nahay - taas oo mudadii dalku burbursanaa shacabka Soomaaliyeed si wanaagsan ula dhaqantay - in ay dalkeeda ka erido ninkaas ummadda Soomaaliyeed ku ogtahay in uu hantidii qaranka uu si xaqdarro ah u qaatay oo u booqay." Waxa kale oo uu ka hadlay waxa hadda arrimahaas kala gudboon xukuumadda hadda jirta ee Sheikh Shariif iyo sidii lacagtaas wixii ka haray looga daba tegi karo. Waxana uu sheegay in uu diyaar u yahay in uu ku markhaanti furo.
Mar uu ka hadlayey sababta ku dhalinsay in uu arrintaas hadda ka hadlo Dr C/casiis waxaa hadalkiisii ka mid ahaa "Waxaan u diyaar garoobey in aan ummadda horteeda ka markhaanti kaco dembiga uu ninkaasi galay iyo hantida qaran ee uu qaatay. Ilaahay Hortiisna waa kaga markhaanti kacayaa haddii Allah idmo," ayuu yiri Dr. Cabdicasiis Sheikh Yuusuf. Waxa kale oo uu ka hadkay sidii Geeddi lagu soo doortay iyo ciddii doorka ku lahayd soo doorashadiisii oo uu muujiyey in ay ka mid ahaayeen Dawladihii IGAD. Dr. Cabdicasiis oo ka jawaabayey waxa uu u soo jeedin lahaa Geeddi haddii uu dhagaysto waraysigan waxa uu yiri: "Cali Maxamed Geediyow walaalow xoolahii aad ka qaadatay ummadda Soomaaliyeed ... oo aad uga qaadatay sharci darrada ... oo aad uga qaadatay xaq darrdada ... oo aad adigu ogtahay dukumiinti ahaan in aan u hayno haddaan nahay guddigii golaha wasiirada... celi xoolahaas oo ku celi dadkii lahaa oo ah ummadda Soomaaliyeed .. markaas iyada ah muwaadin Soomaaliyeed oo shariif ah ayaad noqoneysaa .. laakiin ma ahid hadda ee waxaad uga dhigan tahay ummadda Soomaaliyeed tuug maal ka dhacay ayaad tahay... kuuma bannaana tartan xafiis ummadda Soomaaliyeed ay leedahay.... Dr. Cabdicasiis oo aan wax ka weydiiney, waraysigiisii hore uu u siiyey SomaliTalk ee ku saabsanaa heshiiskii is fahamka, maadaama muddo ka soo wareegtey oo waxyaabo badani is bedeleen sida uu heshiiskaas u arko waxa uu yiri "Anigu sidii aan hore u sheegay waxaan u arkaa khalad weyn oo ka dhacay dawladda. Tan labaad madaxda sare ee dawladda wax baarlamaanku sharciyan u diidey in ay ayaguna baarlamaankii ku diidaan waa ku khaldan yihiin. Waxay ahayd oo ku abbaarayd in arrintan ay ummadda Soomaaliyeed qaylada ka bixisay in ay baarlamaanka u wareejiyaan oo go'aanka uu ka qaato ku aqbalaan. Waxaan ogahay in dawladda ay go'aankii baarlamaanka diidan tahay, taas oo khalad aad iyo aad u weyn ah. Waxay tahay marka oo aan ku baraarujinayaa ummadda Soomaaliyeed ay dagaalkooda wadaan oo aanay ka daalin in ay diidaan in si sharci darro ah dalkooda qayb ka mid ah lagu qaato , oo ay dagaalka wadaan, waxaana ka mid noqonayaa haddii Allah idmo dadka dagaalamaya oo diidaya sidaas, maadaama sharci dejintii laga diidey go'aankeedii wax aan ahayn in shacbigu dagaalamo oo harsanba lama arko. Dawladana diidmadii ay diideen baarlamaanka go'aankiisa waan ku cambaaraynayaa, oo waxay istaahilaan in lagu cambaareeyo - in ay u hogaansamaan ayey ahayd go'aanka baarlamaanka oo ay raacaan."
Waxa waraysigaas qaaday Maxamed Cali (Minneapolis) FG. SomaliTalk (Nairobi) waxaan isku daynay in aan waraysi la yeelano Geeddi, weli arrintaasi nooma suurta gelin. Faafin: SomaliTalk.com | Dec 26, 2009 |
|
Guddoomiyaha Baarlamaanka DFKMG oo Shaaca ka Qaaday
in Heshiiskii Dhexmaray Soomaaliya iyo Kenya uu Ku Saabsan yahay Xadayn
Badaha...
Sh.
Aaden Madoobe oo Sheegay in Baarlamaanka DFKMG yeelan doono kulan ku saabsan
Heshiiska is-afgarad
Kulaabo bogga www.SomaliTalk.com © www.SomaliTalk.com La soo xiriir: |
Daabaco
Boggan | Print
Dr.
Cabdicasiis Sheikh Yuusuf oo ahaa wasiirkii Caafimaadka ee Xukuumaddi Cali Geeddi oo u soo
jeediyey Ra'iisul wasaarahiisii xilligaas iyo kuxigeenkiisii in ay dib u soo
celiyaan lacagtii qaranka ee ay qaateen...
  Dhul-Badeedka Soomaaliya
HESHIISKII IS AFGARAD
|
