Waxaa soo kordhaya falalka cadhada ah ee ay muslimiintu –shucuub iyo dowladaba- ku dhaleecaynayaan dowladaha Denmark iyo Norway oo joornaallo ka soo baxaa aflagaaddo iyo ihaano u geysteen Rasuulka sharafta leh (sallallaahu caleyhi wasallam), iyadoo weli dowladahaasi diidanyihiin in ay si rasmi ah uga cudurdaartaan falalkaas fooshaxun ee ay geysteen.

Sucuudiga ayaa u yeertay safiirkoodii Copenhagen kaddib markii muftiga guud ee boqortooyadu hadal adag u jeediyey dowladda Denmark.

Dowladda Liibiya ayaa iyaduna albaabada u laabtay safaaraddii ay ku lahayd Denmark, iyadoo taas kaga jawaabaysa ihaanada lala beegsaday Rasuulka sharafta leh (scw).

Raysulwasaaraha Liibiya, Shukrii Qaanim ayaa sheegay in dalkiisu u arko in sawirrada ay Denmark faafisay yihiin ihaano ba’an iyo kicin mashaacirta msulimiinta oo lagau daandaansanayo Rasuulka (scw). 

Urdun ayaa iyaduna u yeertay safiirka Denmark u qaabilsan dalkooda oo saldhiggiisu yahay Sucuudiga, wuxuu Raysulwasaaruhu u sheegay “in Urdun si adag u diidantahay cayda bareerka ah ee joornaalada Denmark la beegsadeen Rasuulka (scw).

Suuriya ayay wasaaraddeeda arrimaha dibeddu ka dalbatay dowladda Denmark in ay ciqaabto kuwa diimaha ku dacadiyey iyo in aanay arrintaasi mar danbe soo laalaaban. Masuul dowladda ka tirsan ayaa laga soo xigtey in uu yidhi: “Fajaciso ayay Suuriya ku noqdeen sawirradan lala beegsaday astaanta sare ee labada ummadeed ee Carabta iyo Muslimka”

Baxrayn ayaa iyadu ilaa hadda canbaarayn uun u jeedisey dowladda Denmark iyadoo aan ilaa hadda wax fal ah ka qaadan, inkastoo ay dalbatay in sida ugu dhakhso badan wax looga qabto.

Iiraan ayaa wasiirkeeda arrimaha dibeddu dhanbaal cabasho ah usoo diray Denmark iyo Norway labadaba. Wasiirka oo sheegay in uu ku hadlayo magaca ummadda reer Iiraan ayaa warqaddiisa kaga codsaday dowladahaas in aanu mar danbe sawirradaas oo kale arkin.

Yaman ayaa iyaduna ka dalbatay Denmark in ay cudurdaar rasmi ah ka bixiso dhibkii ay geysatey. Barlamaanka Yaman ayaa bayaan uu soo saaray, kulan ka bacdi, si adag u canbaareeyey aflagaadadan.

Kuwait ayuu barlamaankeedu ku baaqay in la joojiyo xiriirka dhaqaale ee lala leeyahay dalalka Nabiga (scw) ku tacaddiyey.

Ururka Midowga Islaamka (I.C.O) iyo Jaamacadda Carabta ayaa iyaguna ku hawlan in Qaramada Midobey soo saaraan sharci mamnuucaya wax ka sheegista nabiyada iyo diimaha la raacsanyahay.

Shucuubtuna?

Ma ahan dowladaha keliya ee waxaa maalmahan danbe isasoo tarayey cadhada ay dadka muslimiinta ahi ka muujinayeen ihaanada loo geystey Rasuulka (scw). Qaabka ay cadhadooda u muujinayeen ayaa ahaa mid akal duwan.

Bannaanbaxyo farabadan ayaa ka dhacay dalal aad u badan oo muslimiin ah iyadoo ay dadweynahaasi dalbanayeen in dowladahoodu wax ka qabtaan jees-jeeska Rasuulka lagu maagay.

Qaar badan oo ka mid ah shucuubta Muslimiinta ah ayaa joojiyey iibsiga alaabaha laga keeno dalka Denmark, iyadoo ay shirkadaha waawyen ee laga leeyahaya Denmark ee ka ganacsada cuntooyinka, burcadka iyo caanaha qallalan ayay soo foodsaartay khasaaro aad u weyni. Dukaamo iyo shirkado badan ayaa iyagu joojiyey mucaamaladii ay la lahaayeen shirkadahaas reer Denmark, iyagoo gebi ahaanba joojiyey soo bandhigista badeecooyinka laga soo waaridey Denmark.

Shirkadda Arla oo iyadu ah mid si xooggan uga ganacsata dhulalka carabta lagana leeyahay Denmark ayaa qaylo afka ku shubatay iyadoo sheegtay in aanay marnaba u adkaysankarin muqaadacadan soo waajahday, khasaaro ba’ann ilaa haddaba soo gaadhey. 

Karzaay, madaxweynaha Afghaanistaan ayaa isagu istaagay mowqif aad uga fog kii laga sugayey qof muslim ah oo diintiisa lagu tacaddiyey. Booqasho uu ku yimid Denmark ayuu sheegay in uu isagu ku qancay fasiraadda ay ka bixisay Dowladda Denmark sawirrada ay faafiyeen jaraa’idkoodu.

Karzaay oo la kulmay raysulwasaaraha Denmark ayaa sheegay in uu ku qancay sharaxaadda uu isaga siiyey raysulwasaaruhu. “Saxaafaddu Denmark waa xor, cidina kama joojinkarto waxa ay rabaan inay faafiyaan, annagana Afghaanistaan hadda waa sidaas oo kale” ayuu ku daray madaxweynuhu.

JOORNAALKII NABIGA (SCW) KU TACADDIYEY OO BIXIYEY WAX CUDURDAARASHO U EG.

Jariidadda JyllandsPosten ayaa daabacday warqad ay ku sheegtay cudurdaarasho ku saabsan xad-gudubkii ay la beegsatay maqaamka Rasuulka Muxammad ah (sallallaahu caleyhi wa sallam).

Warqaddan oo lagu daabacay luqadaha Danish, Engilish iyo Carabi ayay jariidaddu ku sheegtay in si xun loo fahmay sawirradii 12-ka ahaa ee ay faafisay oo aanay iyaga ula jeedin in ay ku caydo Rasuulka ama kaga cadhaysiiso muslimiinta.

Nuqulkeeda carabiga ah, oo ku qornaa carabi aan saxnayn, ayay jariidaddu ku tidhi "waxaa muhiim ah in aanu caddayno in aanaan sawirradaas marnaba ula jeedin in aanu Rasuulka (scw) wax kaga sheegno, ama ku qiima tirno  ee waxaanu rabney in ay fure u noqdaan doodda ku saabsan xorriyadda sheegista fikirka" oo ay jariidaddu sheegtay in ay tahay (xorriyadda hadalku) mid ay ku faanayaan. Waxay intaasi sii raacsiisay "markaas ma aanaan ogayn sida arrintani xasaasi ugu tahay malaayiin muslimiin ah oo ku nool Denmar" waa sida ay hadalka u dhigtaye "kuwaas oo ah qayb aan qaybsamin oo nolosha Denmark ka mid ah".

JyllandsPosten waxay dhowr jeer ku celcelisey in sawirradan si gurracan loo fahmey oo aanay iyagu ula jeedin in ay cidna kaga cadhaysiiyaan.

Waxay kale oo sheegtay in sawirrada lagu faafiyey dunida muslimku aanay ahayn kuwii ay jariidaddu baahisey ee ay yihiin kuwo been abuur ah.

Jariidaddu waxay hadalkeedi ku sii dartay in "sawirradaasi sida muuqata ay ka cadhaysiiyeen malaayiin muslimiin ah oo daafaha dunida kala jooga, taasna aad baannu uga xunnahay"

Tifaftiraha qaybta dhaqanka ee Jariidaddan ayaa warbixin uu 29/01/06 siiyey Al-jazeera ku sheegay in ay doonayeen in ay sawirradan ku tijaabiyaan bal xorriyadda wax sheegga ee ay saxaafaddu haysato!

Waxaa mudan in la is-weydiiyo: Nabi muxammad (scw) iyo mashaacirta muslimiintu ma waxay noqdeen bakayle lagu tijaabiyo wixii la rabo?

Tifaftiraha ayaa ka jawaabi waayey markii Al-jazeera u jeedisey su'aal ah "maxaad ugu bilaabi weydeen Holicoust" oo ah xasuuqii ay yuhuuddu sheegteen in Naziyiintu u geysteen dagaalkii labaad ee dunida.

Su'aasha kale ee is-weydiinta mudan ayaa ah: hadalkaasi ma yahay mid daaweynaya ama u dhigma caydii iyo tacaddigii bareerka ahaa ee ay jariidaddu Rasuulka (scw) la tiigsatay?

Ma cudurdaarashaa mise waa fasiraad ka bixin iyo afmaroojin aan waxba ka shisheyn? Iyadoo weliba sheegtay in aanay sawirradaasi khilaafsanayn qaynuunka Denmark.

Malaayiinta muslimiinta ah ee cadhaysani miyay ku qanci doonaan hadalkan aan marnaba laga fahmayn qirasho khaladka ay galeen, ee ay muslimiinta ku eedeeyeen in ay iyagu si khaldan u fahmeen farriintii sawirradu xanbaarsanaayeen? Fahamkaas khaldan oo ay sheegtay jariidaddu in sababtiisu noqon karto is-faham la'aanta xadaaradaha, taasoo keentay in "hindisihii faafinta 12-ka sawir loo fasirtay olole lagaga soo hor-jeedo muslimiinta Denmark iyo dibeddaba. 

Su'aasha kale ee muhiimka ah ayaa iyaduna ah: maxay dowladda Denmark ilaa hadda u diidentahay in ay cudurdaar ka bixiso tacaddigan?

Majallad kristaanka lagu faafiyo oo laga leeyahay dalka Norway ayaa iyaduna sawirradaasi baahisay iyadoo weliba la beegsatay maalintii "Ciidul Adxaa" taasi oo loo fasiray daandaansi iyo ka xanaajin muslimiinta intii la doono. Ilaa hadda wax -xataa- fasiraad ah lagama hayo majalladdaas iyo dowladda toona.

W.Q: Cabdisamad Xoday | London UK
Email: Hoday30@hotmail.com
LINK: www.Somalitalk.com/xoday

Denmark: BANNAAN BAX LAGU GUBAYO QUR'AANKA

Feb 1, 2006