Fikirkiisa Guracan
baa dunida dab ka dhaliyey!!
- Dadka
reer Denmark oo hurdadii kasoo baraarugaya
Ikraam Cali Kaar
ikraam_k@hotmail.com
Afar bilood ka hor haddii
ninkan wareersan ee tafatiraha uga ah qeybta dhaqanka
wargeyska xagjirka ah ee Jyllands- Posten uu ogaan lahaa
in xaaladu gaareyso meeleysan kasoo laaban karrin ma
bixiyeen amarka iyo fikirka lugu daabcay sawiro kartuun
ah oo ay ku sheegeen iney yihiin Nabi Muxamed (NNKH).
Ugu horeyn maan jecleyn
inaan magaciisa iyo muuqaalkaasi aan soo bandhigo nin
ihaano u geystay Rasuulkeena sharafta badan ee Nabi
Muxamed (NNKH). Balse waxaa lama huraan ah in la ogaado
ugu yaraan waxa ninkan xagjirka ah ku kalifay in
malaayiin muslin ah oo dunida ku nool ka careysiiyo. Ma
naceyb uu Islaamka iyo dadkiisa u qabo baa, mise waa
ciyaar iyo jees jees u ku doonayey inuu ogaado damiirka
iyo dadnimada dadka Islaamka ah ee awal ka diiri waayey
magaca argagaxiso ee lugu shaabadeeyey looguna yeero.???
Jawaabta waxaad u badisaa tan hore oo ah in ujeedada uu ninkan
cadowga ah Alle ah u soo daabcay sawiradaasi foosha xun
ee ay tahay naceyb uu qabo Diinta Illaahey iyo
Rasuulkiisa sharafta badan ee u soo diray ummadda
Islaamka.
Magaciisa foosha xun waa
Flemming Rose waa ninka tafaftiraha qeybta dhaqanka uga
ah wargeyskii fidnada abuuray ee Jyllands- Posten. Waa
nin xagjir ah oo sida buug uu soo saaray ku sheegay
yariintiisa iney ku adkeyd in Muxamed waa Rasuulka Alle
(NNKH) uu arko Nabi ahaan. Ma jirin dadka sawirada
kartuunka ah ee ogolaaday iney sawiraan Nabi Muxamed
markii uu ula yimid afartan qof oo iyaga kamid ah, balse
labo iyo toban qof oo kaliya ay ogolaaday iney sawiraan waxa
uu ku sheegay "Sida Rasuulku u ekaan karro muuqaal
ahaan".Labo iyo
tobankaasi qof ee sawiraddii foosha xun sameeyey haatan
waa tuko cambaar leh waxey qarka u saaran yihiin fursad
kasta oo loo helo in la dilo, waxey ku nool yihiin nolol
cadaab leh oo boolisku ku hayo meelo aan la shaacin oo
qarsoodi ah. Wareysi lala yeeshay xagjirkan ayaa wax
laga weydiiyey saameynta ay ku yeelatay dalkiisa
fikradiisa guran ee ugu bareeray in ummad jirta
Rasuulkeeda caayo.
Dhacdooyinkii ugu
dambeeyey ee xiisadan abuurtay wuxuu ku sheegay iney
yihiin kuwo aan la aqbali karrin, balse wuxuu diiday
inuu dhiniciisa ka bixiyo raaligareyn buuxda. "Inaan
raaligareyn bixino waxey ka dhigan tahay gabar la
kufsaday oo la yiri raali ahow sababta loo kufsadeyna
aheyd iney soo xiratay goono gaaban" ayuu yiri isagoo ka
jawaabayey su'aal aheyd raali gareyn ma bixineysaan ka
wargeys iyo ka shaqsi ahaanba. Sida muuqatana waa nin
aan qiimo u heyn dumarka isagoo gabadha la kufsaday ee
uu sheegay iney goono gaaban soo xirtay aaney istaahilin
raaligareyn la xirriirta dhaawaca loo geystay.
Dadka reer
Denmark oo hurdadii kasoo baraarugaya
Maanta markaad eegto
banaanbaxihii nabadeed ee ka dhacay bartamaha magaalada
Kopanhagen caasimada dalkaasi Denmark wuxuu ahaa mid
muujinaya in dadka dalkaasi haatan qarow ay ku jireen
kasoo baraarugeen.
Dadkan banaanbaxaya waxaa
indhahoodii iyo maqalkoodiiba hareerayey naceyb loo hayo
iyo weeraro loo geystay danahoodii siyaasadeed iyo mid
dhaqaaleba ee ay ka lahaayeen dalalka Islaamka ee carada
weyn maanta ka soo burqaneyso. Idaacadaha iyo qeybaha
kala duwan ee warfaafinta dalkasi ayaa waxey daqiiqadba
daqiiqad soo gudbiyaan wararka ugu dambeeya ee xiisadan
abuurtan.
Wasiirka Arrimaha
Dibada dalkaasi Per Stig Møller oo isku dayey inuu
damiyo xiisada cusub ee abuurantay ayuu caawa shir
jaraa'id uu qabtay isagoo ku hadlayey afkafka
Faransiiska iyo Denish-ka sheegay qaabka ay u shaqeyso
Dimiqoraadiyad ku sheega dalkiisa ka jira, wuxuu isagoo
ilowsan dimoqraadiyada uu doonayo inuu sheego caalamka
Islaamka ay tahay mida haatan abuurtay rabshadan soo
cusboonaday ee cabsideeda wadata. Wuxuu codsaday in
wadahal lugu dhamaayo muranka jira.
"Doonimayo inaan ku noolado dal isku maleeyo inuu ka
sareeyo dunida inteeda kale" ayuu yiri Carsten Jensen oo
isagu ah suxufi Denish ah kana qeybgalayey banaanbaxii
nabadeed ee maanta ka dhacay caasimada dalkaasi."Mana
doonayo inaan ku nagaado dal raali gareynaya oo keliya
kuwa awooda leh yasanaya codka dadka liita" ayuu sii
daba dhigay hadalkiisa. Mid kamid ah jilayaasha xaga
fanka oo muslin ah ayaa riwaayad qosol leh oo u dhigayey dadkii
iskugu soo baxay banaabaxii maanta ee Kopenhagen ayaa
sheegay inuu dhib weyn ku qabo cuno qabateyntii lugu soo
rogay badoocooyinka dalkaasi.
"Waxaan isweydiiyey
maxaan nafteyda ku cuno qabateeya, waxaa isoo baxday
xaaskeyga oo Denish ah, iyadaan afar iyo toban bari oo
cuno qabanteyn ku soo rogay" ayuu yiri isagoo ka
qoslisiinayey dadkii ka qeybgalay banaanbaxii nabadeed
ee ay dadka denish-ka ah qaarkood ku soo baxeen
bartamaha magaaladaasi.
Ugu dambeyntii waxaa amaan mudan hadalkii dhiiragelinta
ahaa ee caawa uu yiri Sheekha weyn ee Al Qardaawi isagoo
ka hadlayey telefeyshinka Aljazeera,ayaa waxaa indho
indheyn ku sameeyey dadka siyaasada kala rog roga ee
wadankan Sweden waxeyna sheegeen in hadalka Qardaawi
yahay mid ahmiyadiisa u leh dadka muslinka ah. Al-
Sheekh Qardaawi wuxuu yiri "Waxaan u sheegaya reer Yurub,
anaga la'aantiin waan noolaan karnaaye, adiinku
la'aanteen ma noolaan kartaan? Waxaan awoodnaa inaan wax
walba kasoo iibsano Shiinaha, Japaan, Taylaand iyo
Maleeysiya, mana noqon doono kuwo kala daadsanaada"
Hadaba hadalkani waa mid xigmad leh oo qofkastaa fahmi
karro loogana baahan yahay Muslimiinta caalamka iney
dhiiga u daa diyaan difaacida Rasuulkeena karaamada
badan ee wargeysyada reer galbeedka lugu aflagaadeeyey
taasoo haddey sameeyaan sida hada bilaabatay uu Illaahey
u soo dejinayo faraj ay kaga baxaan mixnadan iyo sumcad
xumadan maanta ku heeereysan.
Ikraam Cali Kaar
ikraam_k@hotmail.com
Ciraaq oo Joojisey Qandaraasyadii dalalka Denmark iyo
Norway
