Badda Soomaaliya Beec ma aha (Somalia is NOT for Sale): Xildhibaan Dalxa
- Inj. Idiris "baaxadda badda Soomaaliya cabbir ahaan (inta ay
xeebta ka durugsan tahay) waxay u dhigantaa masaafo u dhaxaysa Muqdisho iyo
Garbahaaray (oo isu jira 377 km), waxaana la rabaa masaafada intaas leeg in
lagu soo koobo masaafo ka sokaysa Muqdisho iyo Afgooye.
- Qamar Haashim "Waxaa dhac lagu hayaa badda Soomaaliya iyo
Khayraadkeeda, waana arrin muddo la soo diyaarinayey oo xitaa lagu
diyaariyey xafiisyada Turkiga - Tan kale Ingriiska iyo Turkiga xiriir dheer
ayaa ka dhaxaysa kaas ku salaysan dagaalkii adduunka, waxaana jira shirkado
shidaal oo ay wada leeyihiin Ingriiska iyo Turkiga...
Waraysi iyo falanqayn ay baahisay Idaacada Alfurqaan ee aadka looga dhagaysto
Muqdisho ayaa looga hadlay boobka lagu hayo Badda Soomaaliya, waxaana waraysiga
ka qayb qaatay Xildhibaan Maxamed Cumar Dhalxa oo jooga Muqdisho, Qamar Haashim
oo Joogta France iyo Injineer Idiris Xasan Faarax oo ku sugan dalka Finland.
Prof. Dalxa oo kamid ah xildhibaanada baarlamaanka Soomaaliya - kana mid ahaa
guddoonkii baarlamaankii hore ee diidey in badda Soomaaliya la dhaxal wareejiyo
- ayaa si kulul u sheegay in dhulka Soomaaliya uusan iib ahayn ama beec
ahayn.
Waraysigii Radio Alfurqaan ka dhagayso
HALKAN ama
Halkan.
Injineer Idiris Xasan Faarax ayaa asaguna sheegay Badda Soomaaliya inaysan
ahayn 12 Mayl oo xitaa ay ka badantahay 200 oo Mayl, balse ay tahay 200
Mayl-badeed (Nautical Miles*) oo u dhiganta 370.4 kiilo mitir. Waxana uu yiri
waa in la fahmo baaxadda badda cabbir ahaan (inta ay xeebta ka durugsan tahay)
in ay u dhiganto masaafo u dhaxaysa Muqdisho iyo Garbahaaray, waxaana larabaa
masaafada intaas leeg in lagu soo koobo masaafo ka sokaysa inta u dhaxaysa
Muqdisho iyo Afgooye.
- Fogaanta u dhaxaysa Muqdisho iyo Garbahaarey waa 377 km
- Fogaanta u dhaxaysa
Muqdisho iyo Afgooye waa 30 km.
Injineer Idiris ayaa tibaaxay in Ummadda Soomaaliyeed laga doonayo inay
difaacaan una istaagaan ka hortagga qorshaha guracan ee ka dhanka ah Badda
Soomaaliya.
Qamar Haashim ayaa dhankeeda sheegtay Dowladdaha Norway, Ingariiska,
Fransiiska iyo Turkiga inay kaalin weyn ku leeyihiin boobka lala damacsanyahay
badda Soomaaliya.
Qamar Haashim ayaa Tusaale usoo qaadatay Shirkado shisheeye ah oo qaar kamid
ah ay leeyihiin dalalka ay xustay inay haddaba faraha kula jiraan khayraadka
Dalka Soomaaliya.
Xildhibaan Maxamed Cumar Dhalxa oo kamid ah xubnaha Baarlamanka Federaalka oo
isna qeyb ka ahaa Falanqeynta ayaa sheegay inay ka warheleen qorshaha socda
laakin baarlmanku aysan ogolaan doonin Badda Soomaaliya in lagu soo kobo 12
Mayl.
* Waa Maxay Mayl-Badeed (Nautical Mile)
Mayl-Badeed Waxaa waa maylka lagu cabiro badda, waayo waa mayl (mile)
ka duwan kan berriga lagu cabiro. Mile-ka badda waxaa loo yaqaan "Nautical Mile"
oo AfSoomaali ku noqonaya Mayl-Badeed, waxana uu u dhigmaa 1.85 km (ama 1,852
metres). Halka mile-ka caadiga ah ee berrigu u dhigmo 1.6 km (ama 1,609 metres).
Taas oo muujinaysa in Mayl-badeedku uu ka badan yahay Mayl-ka berriga (1852
mitir - 1609 mitir = 243 mitir). Mayl-Badeedka waxaa loo soo gaabiyaa NM
(Nautical Mile).
Badda
Soomaaliya Beec ma aha (Somalia is NOT for Sale)
Faafin: SomaliTalk.com | May 5, 2013
| 
Daabaco
Boggan | Print
