Guddoomiye Kuxigeenkii hore ee Baarlamaanka Soomaaliya Cismaan Cilimi Boqore
oo si kulul uga soo horjeestey iskuday kasta oo la doonayo in Badda Soomaaliya
lagu soo koobo 12 mayl
- SomaliTalk.com | April 29, 2013
Guddoomiye kuxigeenkii hore ee Baarlamaanka Soomaaliya, Cismaan Cilimi
Boqore, oo ay waraysi la yeelatay idaacada Alfurqaan ee ka hadasha magaalada
Muqdisho, ayaa sheegay in uu noqon doono Xildhibaanka ugu horeeya ee si cad u
diidi doono qorshe kasta oo la doonayo in badda Soomaaliya lagu soo koobo 12
mayl. Waxana uu tibaaxay "Soomaali waxaa halkaas dhigay ee burburiyey ee
baabi'yey waa wadani-nimo xumo."
 Raadiyo Alfurqaan ayaa weydiiyey in
la soo cusboonaysiiyey arrintii baarlamaankii hore ee KMG ahaa uu laalay
ee ahayd heshiiskii badda iyo faragelintii Norway ee isku dayga in badda Soomaaliya lagu
soo koobo 12 mayl, iyo sida arrintaas baarlamaankii hore u wajahay.
Cismaan Boqorre waxa uu ku jawaabey "Baarlamaankii hore markii la horkeenay arrinta
(Badda) waxaan ka mid ahaa guddoonkii baarlamaanka, waxaana ahaa guddoomiye ku
xigeenkii baarlamaanka, waxaana ahaa raggii u ugu cad-caddaa
ee arrintaas aadka diidanaa, maantana waxaan leeyahay anigoo Alxamadullilah weli
baarlamaanka ka mid ah, waxaaan noqon doonaa shakhsiga ugu horeeya ee si cad
arrintaas uga horyimaada, ee si cad u diidi doona maadaama aan xubnaha
baarlamaanka ka mid ahay."
Waxana uu hadalka kusii adkeeyey "Arrinkaasi wax socon karaya iyo wax imankaraya iyo wax Soomaali u cuntami kara midna ma aha". Markii la weydiiyey in guddoomiyaha hadda ee baarlamaanku uu haysto dhalashada
Norway oo arrintaas soo saxiixay, waxaa Cismaan Cilimi Boqore ku jawaabay:
"Asagay u taalaa adeer, asagu waa shakhsi ah afhayeenka baarlamaanka ,
wuxuuna kala mid yahay wixii baarlamaanku go'aansado, si khaas ah ama si gaar ah
guddoomiyaha baarlamaanku uma saxiixi karo heshiiskaas. Waa haddii sharciga la
dhawaryo. Haddiise sharciga la dhawri waayo, ninkii dhawri waayaa asagay u
taal." Boqorre waxa uu hadalka ku sii daray "Weligay kama waaban inaan runta caddeeyo
ama sheego, haddana kawaaban maayo. Marka waxaa weeye sirtu runtay u soo noqon,
beentuna halkeedey ku hadhi. Soomaali waxaa halkaas dhigay ee burburiyey ee baabi'yey waa wadani-nimo xumo,
Soomaalida badankeedu wadani ma aha, ninkii wadani ah hadduu maqlo waxyaalaha
noocaas ah dhiigga ayaa dubaaxinaya. Waana ka tiiraan-yoonayaa, waana ka
xumaanayaa. Waxyaabaha noocaas wax la maqli karo ma aha."
"Dhul Soomaaliyeed ayaa la bixiyey, bad Soomaaliyeed ayaa la bixiyey,
gobollo Soomaaliyeed ayaa dawlad kale maamul, waxyaabaha noocaas ah wax la
aqbali karo ma aha," ayuu yiri Xildhibaan Cusmaan Cilimi Boqorre.
Faafin: SomaliTalk.com | April 29, 2013
| 
Daabaco
Boggan | Print
