Sh. C/Qaadir Nuur Faarax: Baarlamaanka Go'aan kii hore ka duwan haka qaato arrinta ku saabsan heshiiska badda.. Waraysi...

Sh. C/Qaadir Nuur Faarax: Baarlamaanka Waxaa la gudboon in uu Go'aan kii hore ka duwan ka qaato arrinta ku saabsan heshiiska badda.. Waraysi...

Diin ahaan meel ay ummad Muslim ah leedahay in laga tanaasulo TAAKO ha ahaatee ma bannaana...

"Ragga dagaalka iskala soo horjeeda ee xabadaha ridaya dhammaan waxaan leeyahay nasteexo ahaan: Walaalayaalow xabbadda joojiya, walaalayaalow Ilaahay ka baqa, walaalayaalow ummaada u naxa, walaalayaalow diinta iyo ubadka iyo dumarka iyo dhulka ha gubina, walaalayaalow yaan waddankeenu faraha ka bixin, walaalayaalow yaan cadow inaka faa'iidaysan, walaalayaalow yaan shisheeye inaku farxin, walaalayaalow dacwadaynu soo wadnay soddonka sano yeysan meesha ka bixin oo loo arag in aan nahay niman wax bi'iyay, oo la inaga aammin bixin, walaalayaalow isu tanaasula...." Sh. C/qaadir Nuur Faarax, June 13, 2009

Waraysiga waxaa qaaday Xasan Dhooye

SomaliTalk waxaa maanta (June 13, 2009) u suurtagashay in aan khadka teelfoonka ku waraysano Sh. Cabdulqaadir Nuur Faarax oo ka mid ah culimada loogu qadarinta badan yahay Soomaaliya isagoo ku sugan magaalada Garoowe.

Waxaan wax ka weydiinay baaqii ay dhowaanta soo saareen ee ku saabsanaa dagaaladii ugu dambeeyay ee Muqdisho iyo heshiiskii xadaynta badda ee dhexmaray Kenya iyo Soomaaliya. Sh. C/qaadir waxa uu dagaaladaas ku tilmaamay dagaal "fidno" ah oo u dhaxeeya dad ka wada tirsanaa saxwada islaamka, waxana uu ka digay waxa ka dhalan kara dagaaladaas.

Sh. C/qaadir waxa uu si xeel dheer uga hadlay in dagaallada ugu dambeeyey ee Soomaaliya ay ka dhalan karto in dalku uu faraha ka baxo oo cadaw kusoo laabto.

Sheikh C/qaadir Nuur Faarax oo ka jawaabayey su'aal la xiriirta in baaqii ay soo saareen ay kaga hadleen heshiiska dhex maray Kenya iyo Soomaaliya ee ku saabsanaa badda iyo in Isniinta (June 15) uu baarlamaanku ka shirayo arrintaas, waxa uu ku jawaabay:

"Arrintaasi aad iyo aad ayey noo daqantay, waxaa laga yaabaa faahfaahintiisa in aan annaga idinku nooga xog ogaalsan tihiin, laakiin markii aan arrinta maqallay iyo dhibaatada ummadda Soomaaliyeed saamaysay iyo dareenka ay abuurtay iyo waxa laga hadlaayaa in uu yahay bad aad u weyn oo Soomaalidu ay leedahay oo sida sheekadu nagu soo gaartay aan aad ula yaabanahay oo xadku soo gaarayo meel ku toosan xagga badda Merka iyo aaggaas ku aaddan. Run ahaana mar haddii saas arrintu tahay sumcadda Dawladda Federaalka ah iyo kalsoonida meel weyn ayay kaga dhacaysaa. Runtii been sheegimaayo oo haddeer marka aad i weydiisay beerka ayaa i xanuunaya arrintaas dhibkaas. Diin ahaana meel ay ummad Muslim ah leedahay in laga tanaasulo TAAKO ha ahaatee ma bannaana.... Sidoo kale kuma bannaana dhaqanka iyo wadanimadana.... arrintaas sidaas ayaan u aragnaa... faahfaahinteeda hoose anigu runtii haddee soo dhaweynteeda iyo in arrintaas laga doodo oo la geeyo meelaha looga hadlo arrimahaas oo kale adigoo weliba doodaada si fiican u ta'kiidey (adkeeyey). Arrintaasu waa arrin ummadda Soomaaliyeed aad u dhibtay. Waxaana weeye weliba haddaa waxyaalo haddaan ku iraahdo xoggaa sumcadda Federaalka haddii arrintaasi ay saas u socoto dhibaato u keeni kartoo intii la doono weeye. Haddii haatan barlamaanku uu fadhiyo oo arrintaasu aad iyo aad ayey farac u leedahay, oo barlamaanka ay la gudboon tahay in uu arrintaas go'aan ka qaato kii hore ka duwan . Arrintaas dareenkeeda waxaan la wadaagnaa ummadda Soomaaliyeed meel ay joogto.

:::BAYAANKA CULIMADA:::

Waxaan ku baaqeynaa in Heshiiska badda ee dhexmaray Kenya & DFKMG loo soo bandhigo culimaa’uddiinka iyo qaanuun-yahanno, kadibna baarlamaanka DFKMG.. Akhri

Su'aal ahayd: Maadaama aad ka mid tahay culimada waaweyn ee Soomaaliya, maxaad ummadda u soo jeedin lahayd waxa uu kaga jawaabay:

"Ummadda waxaan u soo jeedinayaa ugu dambayntii nasteexo, ragga dagaalka iskala soo horjeeda ee xabadaha ridaya dhammaan waxaan leeyahay nasteexo ahaan: Walaalayaalow xabbadda joojiya, walaalayaalow Ilaahay ka baqa, walaalayaalow ummaada u naxa, walaalayaalow diinta iyo ubadka iyo dumarka iyo dhulka ha gubina, walaalayaalow yaan waddankeenu faraha ka bixin, walaalayaalow yaan cadow inaka faa'iidaysan, walaalayaalow yaan shisheeye inaku farxin, walaalayaalow dacwadaynu soo wadnay soddonka sano yeysan meesha ka bixin oo loo arag in aan nahay niman wax bi'iyay, oo la inaga aammin bixin, walaalayaalow isu tanaasula, oo annagu wax idinkama rabno...., walaalayaalow wax allaale iyo wixii idinka dhexeeya wada hadal ku dhamaysta, anigu sidaas ayaan u soo jeedinayaa. Soomaaliwayna waxaan leeyahay in ay ka hadlaan sida culimadu u hadlayso, dadka iclaamka ka shaqeeya iyo aqoonyahankii aaway, odayaal aaway, aaway soomaalidii, in ay mowqifkooda ka qaataan oo arrimahaas ka hadlaan, oo dood ka soo jeediyaan oo xal raadiyaan, sidaas ayaan ku baaqayaa oo nasteexo kusoo jeedinayaa."