DAAWO:- VIDEO: Muhammad: Legacy of a Prophet

Daabaco Boggan | Print

Puntland oo Wada Dastuur Cusub oo Xasaasi ah....?

:::AFRICOM:::

AFRICOM iyo Qaaradda Afrika: Welwelka Afrikaanku ka Qabaan saldhigga Militari ee AFRICOM Akhri...

Soomaali Argaggaxiso ahi ma jirto- Sidaas waxaa yiri Safiirkii DFKMG u Fadhiyi jirey Itoobiya Xilligii ay Weerartay Soomaaliya...

Safiirkii hore DFKMG ugu fadhiyi jirey Addis Ababa xilligii ay Itoobiya ku duushey Soomaaliya, Cabdikariim Faarax "Laqanyo" oo Maarso 14, 2008 laga waraystay TV reer Minneapolis ayaa yiri hadalladan:

"Itoobiya shan boqol oo sano (500) oo taariikh ah oo dhibaato ah oo aan laga heshiin oo colaad ah ayaa naga dhexaysa, Itoobiya in ay Soomaaliya timaado marnaba ma aha, mana la ogolaan karo, mana la yeelayo..."

"YAA AH ARGAGGAXISO", ma dhehi karno waa dad Soomaaliyeed, xataa kuwa ka soo horjeeda Itoobiyaanka ee mabda'oodu ku salaysan yahay in ay Itoobiya la dagaalamayaan ma dhehi karo Argaggaxiso, kuwa ka soo hor jeeda Dawladda Federaalka ee mabda'oodu keliya ka soo horjeedo in ay annaga nala dagaalamaan lama dhehi karo argaggaxiso..."

"Qof Soomaali ah, oo dhalashadiisu Soomaali tahay, oo diintiisu ay Soomaali tahay, oo dhaqankiisu Soomaali tahay, oo caadadiisu ay Soomaali tahay, laguma nisbayn karo in uu yahay qof Terrorist (Argaggaxiso) ah...."

"...annagu iyo anigu iyo intii igu fikirka ah ee Dawladda Federaalka ah ka shaqaysa, ma qabno in qof Soomaali ah uu yahay terrorist, ma qabno.. ee waxaan qabnaa in uu yahay dad xaqooda u dagaalamaya ee aaminsan...."

"...waxaa loo baahan yahay shakhsiga Soomaaliga ah in aan marnaba loo nisbayn karin Argaggaxiso ayaan ka wadey...."

"Itoobiya iyo Ereteriya wax ay Soomaaliya isu dhaamaan ma jirto, laba dawladood oo danahooda fiirsanaya weeye, waxaa markaas loo baahan yahay in Soomaaliya danteeda eegato.."

• Halkan ka Dhegeyso ama halkan (mp3)
  [Waraysigii TV-ga "Somali Media" ee Minneapolis, USA]

Maarso 15, 2008: Telefishanka "Somali Media" ee magaalada Minneapolis ee dalka Maraykanka ayaa waraysi la yeeshay safiirkii hore ee DFKMG u fadhiyi jirey Itoobiya, haddana loo bedeley dalka Koonfur Afrika in uu DFKMG safiir uga noqdo, Cabdikariim Faarax "Laqanyo". Waxaana dadweynuhu si toos ah u weydiinayeen Su'aalo isagoo joogey Istuudiyaha TV-ga ee Minneapolis.

Waxaa wax laga weydiiyey Argaggaxisada iyo Soomaaliya (in ay joogto argaggaxiso).

Cabdikariim Faarax "Laqanyo" waxa uu ku jawaabey: "Erayga terrorist (Argaggaxiso) waxa uu soo baxay dhawrkii sano ee u dambeysey, iyadoo dadka reer-galbeedka ah ama wadankan Maraykanku uu aad u isticmaalayey, isagoo ku salaynayey Idolojigiisa [ideology], oo uu kula dagaalayey wixii ka soo hor jeeda Idiyadiisa (idea) ama argaggaxisa ka soo horjeeda dawladda Maraykanka, hase ahaatee waxaa inta badan dawladda Soomaaliyeed iyo mas'uuliyaynteduba ama inta badan aanu dhehnaa haddaanu dawlada Soomaaliyeed aannu nahay "Terorist Somalia", arrintaasi nasiib darro waxaa dhacday in loo qaatay ama la yiri waxa allaale iyo wixii Soomaaliya joogaba waa terrorist, marka arrintaas ayaan jeclaan lahaa su'aasha aad isiisay in aan ka bixiyo jawaab waafi ah."

Isagoo jawaabtaas faahfaahinayey waxa uu yiri: "Waxa aan leenahay annagu Qof Soomaali ah, oo dhalashadiisu Soomaali tahay, oo diintiisu ay Soomaali tahay (Waa siduu hadalka u yiri'e), oo dhaqankiisu Soomaali tahay, oo caadadiisu ay Soomaali tahay, laguma nisbayn karo in uu yahay qof Terrorist (Argaggaxiso) ah, waayo Soomaalidu dhaqan iyo ehel iyo caado uma lahan in ay argaggaxiso (terrorist) noqdaan, taasi marka waxay keeneysaa marka aan leenahay terrorist ama aanu leenahay dalkii Soomaaliya Argaggaxiso (terrorist) ayaa joogta ama terrorist (arggagxiso) ayaa dawladii la dagaaleysa, waa nasiib darro qof Soomaali ah ama mas'uul Soomaali ah haddii markaas dad Soomaaliyeed u nisbaynayo, waa nasiib darro weeye, laakiin eraygu sidii ku yimid waxay ahaydey waxaa jira dad aan Soomaali ahayn oo Soomaaliya jooga oo ajnebi ah oo ka dhuumanaya dawladahan maraykanka ama reer galbeedka, ama dhibaato ka geystey Kenya dawladda Maraykanka safaaradeedii, ama dawladda Maraykanka safaaradeedii ku tiiley Tanzaniya, kuwaas oo ku dhuumaalaysanaya Soomaaliya, iyo dad kale oo kayimid Aasiya oo runtii Soomaalida tababar ku haya waad garaneysaan dad farabadan oo Soomaali ah maalin walba in la laayo, gabdho Soomaaliyeed in la diley iyagoo jaad raadsanaya in bas lagu qarxiyey, dad is qarxinaya waa jiraan waxaas dhaqan iyo caado uma lihin, waxaa kale oo jirta dad kale oo ajnabi ah oo nagu dhax jira, waa kii sigtay madaxweynaha naftarkiisu waad garaneysaan, marka waxyaabahaasi waa dhaqan kale oo aanaan annaga caado u lahayn, marka waxaas nagula dhex jira ee na baraya ama dadka caalamiga ah ee adduunka ka imanaya ee Soomaaliya ku dhex jira ayaanu inta badan u nisbaynaa oo dhehnaa waa dad ajnabigaas terroristiga ah, laakiin qof Soomaali ah xitaa kuwa naga soo horjeeda ee......."

Halkaas markii uu hadalka marinayey ayaa waxaa weriyaha TV-ga ee hadalka qaybinayey, Cabdimaalik Askar, waxa uu Cabdikariim Faarax "Laqanyo" weydiiyey: Safiir waxaa jirey in qabqablayaashii dagaalka ee hore ay sameeyeen barnaamij la dhehi jirey 'la dagaalanka Argaggaxisada', oo ay xamar ku sameeyeen, markaas iyagu inta ay qabtaan ayey dhoofin jireen, idinkuse laakiin xamar ayaad kula dhex dagaalamaysaan markaa miyeydaan istaraatijidii uun bedelin oo wax badan aydin dhaamin dawladiinu?

Laqanyo waxa uu ku jawaabey: "Horta laba arrin ayaa Soomaaliya ka jira, erayga terrorist ayaan hadda qeexayey, laakiin cidda is haysaa waa kala gooni, waayo waad garaneysaan oo Soomaaliya waxay isku hayaan waa siyaasad, nimankan xitaa la yiraahdo Islamic Courts (Maxkamadaha Islaamiga ah), haddey yihiin Dawladda Federaalka, iyo kuwo kale oo aan la ogeyn oo mararka qaarkaad isticmaala Civil Society, inta oo dhammi waa politician (siyaasiyiin), marka ka hadli maayo ee... qofku xaq ayuu u leeyahay in uu siyaasadda Soomaaliya uu qaabka uu doono u isticmaalo oo ka qayb galo, laakiin waxaan micnaynayey erayga ah 'terrorist' , annagu iyo anigu iyo intii igu fikirka ah ee Dawladda Federaalka ah ka shaqaysa, ma qabno in qof Soomaali ah uu yahay terrorist, ma qabno, ee waxaan qabnaa in uu yahay dad xaqooda u dagaalamaya ee aaminsan...

Taas macneheedu sow ma aha in aad leedahay Soomaaliya terrorist ma joogaan, ayaa werihu weydiiyey.

Laqanyo waxa uu ku jawaabey "Maya Soomaaliya terrorist waa joogaa anaa ku dhahaaya,".... Haddana Soomaali kuma tilmaami karo (miyaad leedahay) ayaa markaas werihii weydiiyey, wuxuuna ku jawaabey: HAA (Soomaali lagum atilmaami karo), laakiin ajnebi kale oo farabadan oo dadkayagii dhaqan rogaya oo ajnebi ah oo terroirst ah ayaa jooga kuwaas ayaa loo nisbaynayaa, in ay yihiin terrorist, loona baahan yahay dadka Soomaaliyeed in ay iska qabtaan oo la dagaalaan dhaqankan la rogayo, diintan sida kale loo isticmaalayo...

Laakiin haddii aad tiri ajnebi ayaan u naqaanaa terrorist (Argaggaxiso), markaas qolada kale miyeysan dhehayn Soomaaliya Itoobiyaanba waa joogaan ee Ajnebigan iyo ajnebi kale mexey ku kala duwan yihiin, ayaa weriyihii weydiiyey.

Safiirkii hore DFKMG ugu fadhiyi jirey Addis Ababa xilligii ay Itoobiya ku duushey Soomaaliya waxa uu ku jawaabey: "Xaq ayey u leeyihiin.. HAA... iyaga naftarkoodu, laakiin wixii ajnebi ayaan kawadnaa, iyaguna ha yiraahdeen ajnebi ayaa jooga, anaguna waxaan leenahay ajnebi ayaa jooga, laakiin waxaa loo baahan yahay shakhsiga Soomaaliga ah in aan marnaba loo nisbayn karin Argaggaxiso ayaan ka wadey."

Dadweynahii soo wacay TV-ga mid ka mid ah ayaa weydiiyey su'aal ahayd "nin Soomaaliyeed oo bombaano intuu soo qaatay nin Soomaaliyeed laynaya oo bombaano isku qarxinaaya, ninkaas terrorist lama dhehi karo miyaa."

Cabdikariim Faarax "Laqanyo" waxa uu ku jwaabey "Runtii waxaa loo baahan yahay ninka Soomaaliyeed ee aad sheegeysid ee bombaanada isku soo qarxinaya, ama baabuur intii isku soo qarxiyey madaxdayadii laynaya, waa nin 'brain wash' lagu sameeyey oo Soomaali ah [maskaxda laga qabsaday], markaas haddee ninkaas ama dawladda ayaa dawlad u ah ama aniga iyo adiga ayaa walaal u ah oo loo baahan yahay in loo caqli celiyo, ma aha in aan la lammaanayno ama aan ku nisbayno kan terroristaha (argaggaxisada) ah ee wax baraya ee dalka gudihiisa u yimid ee Soomaaliya u yimid ee wax ku baraya, dabcan qofka hadduu wax laynayo si caddaalad darro ah ama terrorist waa la dhehi karaa, laakiin waxaan rabnaa mar hadii aan dawlad-nimo sheeganeyno in aan dadka kala reebno oo aannu dhallinyarada Soomaaliyeed ee u baahan in loo caqli celiyo aan u caqli celino, oo aan iyaga naftarkooda la oran kulligood terrorist waaye, laakiin dad terrorist ah oo ajnebi ah oo dadkaa dhibaataynaya ama wax xun baraya oo dalka ka buuxa ayaa jira, oo dhaqankeenii rogaya, marka dadka aan rabno in aan iska kaashanno kuwaas weeye."

Su'aal kale oo la soo weydiiyey ayaa ahayd "Markii aad ahayd Safiirka Dawladda [FKMG] Soomaaliya u fadhiya Addis Ababa waxaad ku guulaysatey in aad Soomaaliya keento Ciidamo Itoobiyaan ah oo aad u farabadan, marka hadda markaad Safiirka ka noqotay South Afrika oo aan u malaynayo waddan dhex dhexaad ah malaga yaabaa in inta aad ka dhaadhicis ay Soomaaliya ciidamo u soo diraan."

Sawirkani waa Cabdikariin Faarax oo la hadlayey Saxaafada Addis Ababa, mid ka mid ah shir saxaafadeedkiisii uu kula hadli jirey warbaahinta Itoobiyaanka markii ciidamada Itoobiyaanku soo galayeen Soomaaliya....

Waxa uu Laqanyo ku jawaabey: "Horta kuguma raacsani fikirka ah aniga shakhsiyan anigu Itoobiyaan ciidan ah aan geeyey, ama qof shakhsi ah oo Soomaali haba yaraatee oo Soomaaliya ciidamada geeyey ma jirto, Dawladda Soomaaliyeedna waa dawlad laga aqoonsan yahay adduunyada oo dhan, laba nidaam ayaa ciidan dal ku geli karaa, hab-labada dhinac isku raaceen ama hab dhinacyo badani isku raaceen, labada ciidan ee jooga ee kan afrikaanka iyo kan itoobiya labadaas sharci hab waafaqsan ayey ku galeen...." Waxa kale oo uu xusay in Soomaalidu aysan ka hadlin wixii ka horeeyey intii aan Itoobiyaanku iman wixii dhacay, waxa kale oo uu sheegay in Itoobiya waxa keenay ay yihiin Soomaalida oo heshiin weydey. Tan South Afrika wuxuu xusay in uu jecelyahay in ay Soomaaliya dhexdhexaad ka ahaato oo ciidamo u soo dirto.

Safiirkii hore DFKMG ugu fadhiyi jirey Addis Ababa xilligii ay Itoobiya weerarka xoogga weyn ku qaaday Soomaaliya waxa uu yiri "Itoobiya shan boqol oo sano (500) oo taariikh (history) ah oo dhibaato ah oo aan laga heshiin oo colaad ah ayaa naga dhexaysa, Itoobiya in ay Soomaaliya timaado marnaba ma aha, mana la ogolaan karo, mana la yeelayo..."

Gabar ka mid ah dadkii su'aalaha weydiiyey ayaa tiri mar haddii uu Laqanyo sheegay in uu isagu ogyahay in dad ajnebi ah ay joogaan Soomaaliya, si aysan sumcadda Soomaalida u xumayn dadkaas maxaa loo soo qaban waayey. Waxa uu ku jawaabey hadal macnihiisu ahaa in xogta ay helaan ay ka helaan (intelegency) ama (sirdoon) badan oo ay la shaqeeyaan oo ah dalal shisheeye. Waana lagu daba jiraa ayuu yiri in la soo qabto, laakiin ma aha dad hal meel jooga oo waa dad hadba meel u guuraya oo dhuumaalaysanaya ayuu xusay.

Su'aal kale oo la weydiiyey ayaa ahayd in uu sheegay in aan Soomaaliya argaggaxiso Soomaaliyeed joogin ama aysan jirin argaggaxiso Soomaali ah, laakiin madaxweynaha DFKMG, C/laahi Yuusuf iyo Maxamed Dheere, guddoomiyaha gobolka Banaadin, marka dagaal ka dhaco Suuqa Bakaaraha wuxuu yiraahdaa "Argaggaxiso ayaa ku jirta", marka sheyga Argaggaxiso marka ay Dawladda (FKMG) ay ku dhawaaqeyso ma waxay garab kaga dooneysaa Dawladaha reer galbeedka iyo Maraykanka, mase waa wax aan jirin oo dadkii Soomaaliyeed aan argaggaxsio ku dhex jirin, marka madaxweynuhu dorraad waxa uu lahaa waxaan dalka ka safaynayaa dad taageersan argaggaxisada dalka ku jirta, marka safiirku waxa uu leeyahay dad Soomaali ah oo Argaggaxiso ah maba jiraanba, xaqiiqdiina waa ognahay dad ajnebi ah oo argaggaxiso ah in aanay waddankeena joogin...

Cabdikariim Faarax "Laqanyo" waxa uu ku jawaabey: "Horta ma rabno in arrintu ay u ekaato mid madaxda Dawladda Federaalka dhexdooda (waxa uu yiri iyo waxa ay tiri), qof walba saddexdii sano waxa uu yiri in aan ka hadlo ma rabno.." Waxana uu hadalka kusii daray in ay tahay in dadku ogaadaan in dawladdu ay khaldami karto in ay dadku ogaadaan. Ujeedadu waxay tahay, ayuu yiri "Dad terrorist ah ma joogaan soomaaliya, YES, laakiin "Who is terrorist" "YAA AH ARGAGGAXISO", ma dhehi karno waa dad Soomaaliyeed, xataa kuwa ka soo horjeeda Itoobiyaanka ee mabda'oodu ku salaysan yahay in ay Itoobiya la dagaalamayaan ma dhehi karo Argaggaxiso, kuwa ka soo hor jeeda Dawladda Federaalka ee mabda'oodu keliya ka soo horjeedo in ay annaga nala dagaalamaan lama dhehi karo argaggaxiso..." Waxana uu intaas ku daray laakiin waa jiraan dadkale oo terrorist ah oo ajnebi ah oo annaaga nagumaadaya, laakiin waa in lakala saaraa, iyagoo wada socda oo haddana isku xiran haddana waa in lakala saaraa...

"Laqanyo" waxa uu qiray in Itoobiya aysan wax dan ah u hayn Soomaaliya, waxana uu sheegay in Itoobiya iyo Ereteriya aysan midna dan u hayn Soomaaliya, isagoo arrintaas ka hadlaya waxa uu yiri "Itoobiya iyo Ereteriya wax ay Soomaaliya isu dhaamaan ma jirto, laba dawladood oo danahooda fiirsanaya weeya, waxaa markaas loo baahan yahay in Soomaaliya danteeda eegato.."

Waxaa hadalkaasi aad uga duwan yahay hadalkii uu Cabdikariim Faarax "Laqanyo"  sheegay September 17, 2006  mar uu la hadlay jariidada gaarka ah ee Itoobiya MoFA Newsletter [Dhambaalka Wasaaradda Arrimaha Dibadda Itoobiya] ayuu waxa uu yiri: Eritrea waa in ay faragelinta kala baxdaa Soomaaliya, waxana uu intaas ku daray: xasillooni darrida ay dhalineyso ayaa iyada saamayn ku yeelan doona, waxana uu yiri: xiriirka Maxaakiimta iyo Eritrea waa garabaysi goboleed, marka uu sidaas lahaa waxa uu ku daray Dadka Soomaaliyeed waxay abaal ugu hayaan Itoobiya in ay ka shaqayneyso dhamaystirka khilaafka u dhexeeya xubnaha DFKMG dhexdooda. Sida halkaas ka muuqata xilligaas waxa uu xigsanayey Itoobiya, laakiin waraysiga cusub ee Maarso 14, 2008 waxa uu si qeexan isku miisaan u saaray Itoobiy aiyo Ereteriya, oo uu sheegay in ay danahooda fiirsanayaan.

Hadda, Laqanyo, waxa uu si cad u sheegay joogitaanka Itoobiyaanka ee Soomaaliya in ay dhibaato tahay.

Gabar soo wacday ayaa si cad u weydiisey sababta uu Laqanyo u yiri Itoobiya iyo Eretriya waa isugu mid Soomaalida, iyadoo tiri Itoobiya waxaa naga dhaxaysay colaad sannado badan ah, laakiin erertiriya nagama dhexayn, marka muxuu u simayaa labadaas, Itoobiyana ay u socoto badaha Soomaalida.

Waxa uu ka jawaabey qaybta dambe oo badaha ah, oo uu yiri maadaama ay Soomaaliya leedahay xeeb dheer (oo ka dheer 3300 km) waa in laga faa'iideysto, taasna waxay ku iman kartaa dawlad Soomaaliyeed oo dhab ah oo danaha Soomaaliyeed kala hadasha dawladaha deriska ah.

Buug laga filan karo in uu qoro Cabdikariim Faarax 'Laqanyo'

Dadweyne dhegeystey hadallada Cabdikariim Faarax "Laqanyo" ayaa sheegay in ay u arkaan hadallada cusub ee 'Laqanyo' kuwo qiyaastii 360 digrii ka duwan qaabkii uu u hadli jirey xilligii ay Itoobiyaanku soo gelayeen Soomaaliya, markaas oo uu Telefishanadda Itoobiya iyo warbaahinta Itoobiya si joogto ah ugaga war bixin jirey halka ciidamada Itoobiya marayaan. Dadweynuhu waxay muujiyeen in aan la garanayn waxa bedelay hab fikirkiisa kaddib markii laga bedeley Addis Ababa.

Shirkii jaraaid ee uu ka hadlay Prof. Kinfe Abraham.. sida sawirka ka muuqata waxaa dhinac fadhiya 'Laqanyo'

Dadweynaha qaar ayaa u qaatay haddalada 'Laqanyo' in loo tarjuman karo in madaxda Soomaaliyeed inta ay joogaan gudaha Soomaaliya ama gudaha Itoobya in aysan xor u ahayn in ay fikir kooda si xor ah u cabbiri karaan. Tusaale waxay ku muujiyeen in shir jaraa'id ay 29/12/2006 wada qabteen safiirka xilligaas DFKMG u fadhiyey Itoobiya oo ahaa Cabdikariim Faarax "Laqanyo" iyo Prof. Kinfe Abraham - (Xusuusnow xilligaasi waa markii Itoobiya soo gashay Soomaaliya). Markaas ayaa Prof. Kinfe waxa uu ku xeel dheeraaday guulihii Itoobiya ka gaartey dagaalkii 1964 iyo 1977-78 ee ay la gashay Soomaalida, isagoo yiri labadaas dagaalba Itoobiya ayaa guulaysatey, wuxuuna adeegsadey weedha "Victories" [Guul], oo uu ku celceliyey: Itoobiya dagaaladaas waxay u ahayd "Victories" [GUUL], isagoo weliba yiri dagaalladaas waxaa dhaliyey Soomaalida sheegashadooda dhulka yar ee Ogaadeenya. Waxaana waji gabax ahayd in safiirkii dalka Soomaaliya oo goobta fadhiya sidaas loo hadlay. Laakiin arrintaas markaas kama uu hadlin waayo waxa uu ku sugnaa Itoobiya.. Malaha hadda ayaa ah fursaddiisii uu 'Laqanyo' ku tilmaamayo in Itoobiya aysan dan u ahayn Soomaaliya, maadaama uusan hadda kusugnayn Addis Ababa...

• Halkan ka Dhegeyso ama halkan (mp3)

Laqanyo: Joogtaanka Ciidamada Itoobiya ay Joogaan Soomaaliya wax weyn sooma kordhinayaan...

Maarso 18, 2008: Waraysi kale oo uu Laqanyo siiyey idaacadda codka Maraykaanka isagoo markaas joogey magaalada London ee UK ayaa yiri: "Ciidamada Itoobiya in ay Soomaaliya sii joogaan abid ma ahayn wixii aan ogeyn annagu markii aan Addis Ababa joogey. Qorshaha waxay ahayd maalmo kooban in ay sii joogayaan ayuu ahaa qorshaha aan ogaa, ee ma ogey ciidan abid Soomaaliya haysanaya."

Laqanyo waxa uu intaas ku daray: "Ciidamada (Itoobiya) way ku daaheen Soomaaliya, in ay intaas kusii jiraan ma ahayn."

Waxaana wax laga weydiiyey waxa mowqifkiisa bedeley, jawaabta dhegeyso:

• Halkan ka dhegeyso.. (mp3)

Hadallo hore oo laga soo xigtey Laqanyo intii uu joogey Addis Ababa

Faafin: SomaliTalk.com | March 15, 2008 | updated: March 18, 2008

Kulaabo bogga  www.SomaliTalk.com  © www.SomaliTalk.com