Daabaco Boggan | Print

Sh. Muxamed Idris Axmad waxa uu halkan kusoo gudbin doonaa maqaal maalinle ah iyo mid asbuuci ah oo Axadda kusoo bixi doona SomaliTalk.com, insha Allah, ee sidaas la soco. Sh. Muxamed Idris waxa uu noqday madaxa golaha imaamyadana ee Woqooyiga Ameerika, iyo Iimaamkii Masjidka Assunah ee Atlanta, Georgia iyo Masjidka  ibn taymiyah ee Columbus, Ohio. Waxaana lagala xiriiri karaa Emailka: dalyaqaan@yahoo.com

Istanbuul iyo Casharada Siyaasadda Erdogaan! 2-aad July 13, 2009

Qaybta 1-aad | 2aad | 3aad  

بسم الله الرحمن الرحيم

Mahad oo dhan Ilaah baa leh Nabad iyo Naxariisina Nebigeenna Korkiisa ha ahaato.

(Aniga dartay dad & dal ha dumo)

Qormooyinkaan aan ugu magacdaray Istanbuul iyo Duruusta Siyaasiga ee Erdogaan, waxaan ugu xishay bal in Siyaasiyiinteenna Islaamiyiinta iyo qeyrkoodba ka faaiidaysan karaan (Xirfadda Siyaasadda) ee ay ku shaqaynayaan ragga hoggaanka u haya Turkiya sanadahan, anigoo aan wada taageersanayn dhammaan Siyaasaadka ay ku dhaqmayaan, haddana waxaan la inkiri Karin iney yihiin rag si xariifnimo ku jirto u ciyaaraya marka loo eego duruufaha ku xeeran iyo wadciga ay ku shaqaynayaan.

Su’aalihii taagnaa maqaalkii hore waxaan jeclahay inaan isku dayo inaan ka jawaabo, midda hore oo ah, Mexey wadanka turkiga ka qabteen Xisbiga Caddaaladdu oo keentay taageerada shacbiga turkiga?

Mexey wadanka turkiga ka qabteen Xisbiga Caddaaladdu oo keentay taageerada shacbiga turkiga?

Wadamada meelaha ugu tilmaan dhow ee laga arko waa wajiyada dibadda sida garoomada dayuuradaha ama soohdimada laga soo galo. Waxyaabaha iigu horreeyey ee aan is bedelka Turkiya ka socda ku dareemay waxaa ugu horreeyey oo aan dareemay, Garoonka Istanbuul iyo Dayuuradda THY (Turkish Airline).


Halkan ka daawo  Turkish Airline Video ka hadlaya ( waa af Turki)                      Garoonka Caalimiga ah ee  Mustafe Ataturki  

1. Garoonka Istanbuul (inkastoo nin aan necbahay magiciisa uu wato waa Ataturk) hadana wuxuu ahaa sanada ka hor intaan xisbiga caddaaladdu talada la wareegin, garoon dacdaraysan, sigaarka lagu buufiyaana indhaha iyo dhegaha kaa galo, oo aad ku neefsan kari weydo. Maanta Sigaarku waa ka mamnuuc Airporada oo dhan, iyo meelaha caamka ah oo dhan, markii wasiirka caafimaadka ee xisbiga caddaaladdu uu barlamaanka horgeeyey mooshin arrinkaa ku saabsan qaanuunna laga dhigay. Wuxuu ka mid yahay Airporku 36 Garoon Dayuuradood oo 15 ka mida tahay Caalami, Istanbuul keliya 2 airport ayey leedahay, Ankara wexey noqotay Sanadkan Garoonka Yurub ugu fiican xagga adeegga, kuwa dhex dhexaadka ah 5-10 milyan oo qof kala daabula. Mar walbana Sanadahan Dambe waxaa kusoo biirayey Airporka dhismayaal cusub, iyo adeegya cusub.
   
2. Dayuuradda Turkida ee la yiraahdo marka lasoo gaabiyo THY, wexey ahayd sanada ka hor dayuurad aan ka dhex muuqan boqollaalka dayuuradood ee adduunka ka shaqeeya, maanta THY wexey sanadkii 2008 qaaday dad ka badan 28 milyan, wexeyna leedahay 100 dayuuradood oo Airbus ah, ilaa 18 kuwa Boeing-ka ah ee safarada dhaadheer (8 ilaa 15 saac duullimaad ah) wexey ku tiigsaneysaa iney noqoto Dayuuradda ugu horreysa #1 Europe.
   
3. Wax soo saarka turkiya intii u dhexeysey 2003 ilaa 2008 waa intuu xisbigu talada wadanka hayey wuxuu sare u kacay 143% isagoo gaarey USD 742 billion.
   
4. Ganacsiga Gaarka ah (private sector) dhoofintiisu wexey gaartey 2008 USD 132 billion, iyadoo kor u kacday 179% intii u dhexeysey 2003 ilaa 2008. Waxyaabaha ay dibadda u dirto (Export) sanadkii 2004 wuxuu ahaa USD 63.2 bilyan meesha ay noqotay 2008 USD 132 bilyan.
   
5. Turkiya maanta waa wadanka 5aad xagga shaqaalaha (labor force) marka loo eego 27 wadan ee Midowga yurub ( in ka badan 24 milyan sanadka 2008) waana dhaqaalaha 6-aad ee ugu ballaaran EU, taasoo ka mida asbaabaha ugu weyn ee Yurub u diidantahay iney suuqooda soo gasho, wexey ka cabsi qabaan iney (liqdo) iyadoo taariikh hore jirto oo ah iney Cusmaaniyiintu Yurub in badan xukumeen, shacabka turkiguna waa dad aad u shaqa badan, tira badan (75) milyan, isla markaana sanca badan oo wax soo saar badan leh, gaar ahaan xagga dharka, cuntada iyo birta iwm.
   
6. Mudadii uu Xisbiga Caddaaladu hayey talada waxaa kor u kacay dakhliga muwaadinka Turkiga ah, taasoo ah mid laga dareemi karo nolosha guri walba marka siyaasadda dhaqaale ee wax soo saarka wadanku kor u koco, nolosha qof kasta oo muwaadina wey saamayneysaa. Tusaale ahaan Dakhliga qofka turkiga ah sanadkii 2004 wuxuu ahaa USD 5779 halka uu sare ugu kacay 2005 USD 7027 kadibna wuxuu gaaray 2008 USD 10436. Taasi wexey keyneysaa sababta ay u dooranayaan dadweynaha Turkigu Xisbiga Caddaaladda, kasokow inuu abtirsiinya Islaama leeyahay, waxa weeye inuu noloshoodii wax ka bedelayo, oo guri kastaa dareemi karo, in biyuhuu cabbayey fiicnaadeen, shaqadiiisi hagaagtey, lacagta soo geleysaa korodhay, caafimaadkiisa wax iska bedeleen, waxbarashadiisa fududaatay, iwm. Adeegaas bulshada ayuu Xisbigu risaaladiisa iyo ujeedooyinkiisa siyaasadda sii marsanayaa oo dhex gashanayaa, wuxuu kaloo dhex gelinayaa isbedelada uu doonayo inuu ku sameeyo bulshada Turkiga.
   
7. Mu’asasaadka Turkiya iyo Hay’adaha Dawladda wuxuu Xisbigu ku sameeyey is bedelo kala duwan oo xagga maamulka ah, dhiig cusubna waa ku shubay oo ah masuuliin iyo maareeyayaal xirfad u leh xagga maamulka, taasoo ay ka dhalatay natiijooyinka wanaagsan ee aan qaarkood soo sheegnay. Tusaale ahaan, Waxay Dawladdu asaastay Hay’ad gaar u ah arrimaha maalgelinta iyo ganacsiga dibadda laga soo dabayo, oo raacsan Xafiiska Raiisulwasaaraha, taasoo xamlad iyo dicaayad weyn u samayneysa sidii loosoo dhoweyn lahaa dhaqaalaha dibadda in la geliyo Turkiya, si dhaqaalahana kor loogu qaado, dadka Turkiduna shaqa u helaan, Dawladana wax u soo galaan, shirkadaha wadanigu u faaiidaystaan, Hay’addaasu wexey u fududayneysaa Ganacsatada dooneysa iney dalka maal gashato, heer hadda qofkii doonaya inuu maal gashado oo shati lasoo boxo, ama shirkad ganacsi furto wexey ku qaadaneysaa 6 maalmood ugu badnaan, taasoo turkiya ka dhigtay iney ka mid noqoto 15 wadan ee adduunka ugu sahlan in ganacsi ama maalgelin laga sameeyo si sahlan iyo nidaamka ugu fiican.
   
8. Wexey Dawladdu aad ugu dadaashey iney xiriir ganacsi oo kala duwan la yeelato wadamada Islaamka sida kuwa khaliijka iyo carabta guud ahaan, ama dalalka Islaamka ugu weyn, sida Indonesia oo iyada lafteedu awood weyn oo xagga sancada ah, wuxuuna sheegat wasiirka ganacsiga dibadda shir aqoon is weydaarsi oo lagu qabtay Jakarta 29/6/2009 in labada wadan aaney si fiican isu baran taasoo keentay in ganacsiga u dhexeeyaa uu yaraado (Sanadkii USD 1.6 bilyan), meesha ay ahayd iney noqoto (USD 10 bilyan), haddana waa ineynu qorshe u dejinno saddex sano gudohoodna gaarsiin karno 5 bilyan, shan sano gudohoodna 10 bilyan. Isla maalmahaas waxaa socdey shir kale oo Istanbuul ka dhacayey una dhexeeyey, Ganacsatada iyo Farsamayaqaanada Turkiga iyo Dawladaha ku midaysan ururka COMESA ee 18 dawladood oo bariga iyo waqooyiga Africa ka mida, si ganacsiga dhexdooda loo ballaariyo.

Intaas waxaan uga baxayaa wax qabadka Xisbiga Caddaaladda Turkiya xagga dhaqaalaha wadanka iyo nolosha dadweynaha Turkiga, natiijadeeda waxaa aad u muujinaya marka la eego dadweynaha iyo ra’yigooda. Wuxuu leeyahay Xuseen Baydaar oo ah carabta Turkiya:

(( Xisbiga Caddaaladda wuxuu la gaar yahay la dagaalanka fasaadka (musuqmaasuqa). Erdogan arrinka uu sheego wuu ka dhabeeyaa. Ma jiro shey uu ballan qaaday oo aanu fulin, beenna ma sheego, arrinkaas oo ay wada qirayaan taageerayaashiisa iyo kuwa kasoo horjeedaba. Waxaanan filayaa siyaasaddeeda dhaqaale ee wanaagsan darted iney doorashada helidoonto 38% ilaa 40%. Xitaa Ganacsatada waaweyne wexey taageerayaan xukuumadda Xisbiga Caddaaladda maxaa yeelay wexey dalka usoo jiidey maalgashi badan oo shisheeye ah)) Xigasho wargeyska Sharqal awsat, haddii ninkani u taageerayo Xisbiga inuu ka mid yahay taageerayaasha Islaamiyiinta, hadana carabta turkiya badankood ee deggan (Maardiin), (Andaakiya) (Seyaart) (Orfa) wexey u codaynayaa Xisbiga Caddaaladda waa Dersi.

Waxaa kaloo jira dadweyne fara badan oo aan lagu tiring Islaamiyiinta oo u taageeraya xisbiga Siyaasaddiisa dhaqaale ee bulshada usoo jiiddey degganaaan iyo dakhli fiican. Wuxuu leeyahay nin la yiraahdo Meqdaad Tekjum oo ka shaqeeya Hodheel ku yaal Istanbuul ( Anigu iskuma tiriyo inaan ahay dadka diinta ku fiican, haddana waxaan taageerayaa una codaynayaa Xisbiga Caddaaladda horayna waan ugu codeeyey, waayo siyaasadooda ayaa Bulshada waxtar u leh).  

Marka aad isha mariso Saxaafadda Turkiga iyo Qorayaasha Turkiga ee caanka ah, waxaad dareemeysaa iney dhammaan kuwooda mucaaradka iyo kuwooda taageerayaashaba isku raac sanyihiin, xaqiiqada aan la inkiri Karin ee hadleysa, lambara la taaban karana ku qoran ee sheegeysa horumarka uu ka dhabeeyey Xisbiga Caddaaladda Turkiya. Dersi: Siyaasigu waa inuu kasban karaa dadka taageersan keliya maahine kuwa mabda’ ahaan uga soo horjeeda, kuna khasbo iney ku khasbanaadaan iney qadariyaan siyaasaddiisa.

Dersi: Xisbigu wuxuu doortay inuu ujeedooyinkiisa ku qanciyo shacbiga turkiya, taageerana ka helo, hawlkarnimo iyo xirfad siyaasadeedna la yimaado, waxaa laysku deyey in lala dagaalamo oo la curyaamiyo, balse xukunka isagoo saran laga rido, laakiin uma iilan xisbigu inuu xoog kusoo dhacsado wixii laga qaaday, turkiyana dhiig u horseedo. Marar badan ayaa dhici kartey in xisbigu hubka qaato, buuraha turkiya galo, dagaalamo si uu usoo dhacsado xaqiisi laga duudsiyey. Dad badan ayaana ku taageeri lahaa. Waxaa ka mid ah:

1. Markii Arbakaan oo Xukunka haya laga tuuray.

2. Markii Xisbigii Rafaah la xirey, hadana fadiila ay furteen, oo hadana laga xiray, ka horna salaama laga xiray.

3. Waxaa ka mid ahayd, Erdogaan oo Duqqa Magaalada Istanbuul ah, in la xiray gabay uu meel khudbad ah ka jeediyey dartiis, isagoo masaajidka kasoo baxay, oo Kumanyaal reer Istanbuul ah iyo baabuurtoodu ay daba socdaan, ayuu Erdogan Xabsiga is geeyey, wuxuuna diidey in daraadiis dhibic dhiiga loo daadsho, isagoo awoodi karey maalintaas inuu yiraahdo: Tolla’ay, war maaniga taageeradaas haysta ayaa lay xiri karaa? Car yaa ku dhaca! Wuxuuna heli lahaa: Kumanyaal rasaasta isaga dhiga. Laakiin wuxuu doortay, inuu dulmiga ku sabro, dadkii Xabsiga irridiisa kusoo xoomayna wuxuu ku yiri (waa 1998): (Walaalayaal Sabra, haddeynu xaq ku socono weynu guulaysaneynaa, Turkiyana dhibkan wey ka gudbi doontaa).

4. Waxaa ka mid ahayd mararka uu dagaalami karey, markii doorashada loo diidey xukunka maxkamadda darted, dabadeedna uu meel kale iska sharaxay, hadana loo diidey inuu raiisul wasaare noqdo xukunka dartiis oo uu ku fariisiyey saaxiibkiis.

 Erdoğan Atalay                                                                                                   Necmettin Erbakan

Mararkaas iyo marar kaloo badan oo (Ciidanka iyo Cilmaaniyadduba) isku dayeen iney (dagaal) iyo (dhiig) lugaha u geliyaan xisbiga, dabadeedna awood iyo taageeraba loo helo lagu baabi’iyo, xisbigu waa ka dabaashay Ilaahay fadligiis, wuxuuna doortay dariiq nabada inuu Ajendayaashiisa Shacbiga Muslimka ah ugu qanciyo, Sabir iyo wax qabadna kaga guulaysto dulmiga cilmaaniyadda, Ilaahayna waa ku guuleeyey. Dersi: Xisbiga Erdogaan wuxuu u daneeyey Shacbiga iyo Dadka Turkiya, Dulmina wuu ku sabray isaga soo gaaray, abaalkiisiina wuxuu noqday in kuwii dulmiyey hoogaan, suuqana hadh cad ka baxaan, shacbiga iyo dalka turkiyana nabad galo, dagaal sokeeyena ka badbaado, linbintuna wexey raacday Erdogaan iyo saaxiibadiis sabirkoodi dartiis, maantana iyagaa xukuma turkiya.

Halka Islaamiyiinti (Jabhadda Islaamka Jazaair) markey doorashadii ku guulaysteen ee laga fashiliyey ay dagaal doorteen, jabhada kalena kasii dillaaceen oo buuraha galeen, takfiirna kasii dillaacay, dalkii Jazaair uu galay mugdi ay ku dhammaadeen kumanyaal shacabkii reer Jazaair, dalkiina ku naafoobey dhinac walba, Cilmaaniyadiina ay heshay fursado ay ku baabi’iso dacwadii iyo dadkeedi, khasaaruhuna wada gaarey Jazaair oo dhan, sanada badan kadibna la garwaaqsaday, lagana qoomameeyey. Sidoo kale liibiya, sidoo kale Masar, miyaaney ahayn dersi la oran karo waa muhiim, marka ay daacad kaa tahay dadkaaga iyo dalkaaga inaad wax tarto, inaan adiga dartaa dhiig loo daadin, dalna loo burburin.

La soco qaybta sadexaad insha allaah...........

 Istanbuul iyo Casharada Siyaasadda Erdogaan!  Qaybta: 1-aad | 2aad | 3aad

Dhambaall Cusub oo ka Socda Culima Waaweyn!

DHAMBAALKA  MANDELA U DIRAY SH.SHARIF & DR.C.IIMAAN!

WADAADADA SOOMAALIDU AYAAN DARANAA MA AWLAADDII AW JAAMAC BAA?!!Sh. Muxamad Idris

Mariyaa mise waa run! Waxaa isoo gaaraya dhawaq dheer oo leh: Dadow Bishaaraysta ummadii waa hesh.. Akhrr...

 Run ma la isu sheegi karaa?   Q-1aad  | 2aad | 3aad

WQ. Sh. Muxamed Idris Axmad

Faafin: SomaliTalk.com | July 13, 2009 

MALAYSIYA: Qaybtii 1aad | Qaybtii 2aad | Qaybtii 3aad | Qaybtii 4aad | Qaybtii 5aad | Qaybtii 6aad | Qaybtii 7aad | Qaybtii 8aad | Qaybtii 9aad | CALOOL XUMO:  1 | 2 | 3