Baazi: "Waxay si waxashnimo leh u dileen Jamaal"

Ibraahim Saalax | SomaliTalk.com, Denmark | July 12, 2009

Argagax, naxdin iyo yaab daran ayay ku noqotay dhammaan dadkii daawaday ama arkay meydkii Jamaal Sheekh Baana, kadib markii meydkiisa oo ay si weyni uga muuqdaan dhaawacyo waaweyn uu soo bandhigay nin u hadlayay ciidanka DFKMG, laguna magacaabo Farxaan Carsaanyo.

Haddaba, waxaa ii suurtowday inaan la kulmo Cabdulqaadir Cumar (Baazi) oo adeer u ah wiilka la dilay ee Jamaal Sheekh Baana, isagoo ii muujiyay sida uu uga xun yahay geerida naxdinta leh ee la soo gudboonaatay Jamaal, wuxuuna aad ula yaabay dhiiranaanta uu Farxaan Carsaanyo ugu dhiiraday inuu Jamaal uga xayuubiyo jinsiyaddiisa soomaalinimo, kuna sheego inuu ka yimid dalalka Aasiya.

"Si daran ayay noo xanuujisay sidii foosha xumeyd ee ay u dileen wiilkeena Jamaal, waxay falkaas weyn ku sii darsadeen inay yiraahdeen wuxuu ka yimid Pakistan ama Afghanistan" ayuu yiri Baazi oo wejigiisa ka muuqatay murugo daran, wuxuuna intaas sii raaciyay:

"waan ku qasbannahay inaan u hoggaansamo qaddarka uu gooyo Allaah (sw), hase ahaatee waxaan marnaba hilmaami doonin sidii naxariis darrada lahayd ee loo dilay Jamaal Sheekh Baana oo 20 jir ahaa, wuxuu ahaa wiil fiican oo jecel ku dhaqanka diinta, baari u ah waalidkiisa oo jecel inuu xiriiryo oo uu ka warhayo reerka, maxay u dileen, muxuu galabsaday oo intay dileen haddana u oranayaan wuxuu u dhashay Pakistan ama Afghanistan. Miyeynan Allihii abuuray ka cabsanayn. Waa hubaal inaanan cafin doonin kuwii dilay, waxaa jirta maalin ay kuwii dilay ay hor imanayaan caaddilka weyn ee Allaah (sw)", ayuu yiri Baazi oo si weyn uga tiiraanyeesan geerida ku timid Jamaal Sheekh Baana oo ku noolaan jiray gobolka Minnesota, dalka Mareekanka, laguna dilay Muqdisho July 11, 2009.

Cabdulqaadir Cumar oo loo yaqaano Baazi iyo dhammaan qoyskiisa ayay mashquulisay geerida wiilkooda Jamaal Sheekh, isagoo ii sheegay inuu isaga iyo waalidkiisa ay maantoo dhan xiriir la sameenayeen qoyska Jamaal Sheekh Baana oo ku nool gobolka Minnesota ee dalka Mareenkanka.

Ciidamada uu madaxweynaha u yahay Shariif Sh. Axmed ayaa dilay Jamaal Sheekh Baana, iyagoo kuna sheegay inuu ka mid ahaa waxay ugu magac dareen “shisheeyaha argagaxisada" ee taageera dagaalyahaniinta iyaga ka soo horjeeda ee Xisbul-Islaam iyo Shabaabka.

Inkastoo ay dalka Soomaaliya ka baxeen ciidamada sida weyn loola dagaalamayay ee Itoobiya, haddana waxaa maalmahan aan ku jirno ay dagaalo qadhaadh ka dhex-aloosan yihiin ciidamada DKMG iyo kuwa AMISOM oo garab ah iyo Xisbul-Islaam iyo Shabaabka oo iyagana garab ah, iyagoo dagaalaldan geestay qasaarooyin lixaad leh oo ay ku naf beeleen dadyow soomaaliyeed oo fara badan, halka ay ka qaxeena kumanaan Soomaali oo aan 19-kii sanno ee dagaallada sokeeye ka socday Muqdisho aanan ka qaxin magaallada.