URURKA YOVENCO IYO TARTANKA KAHORTAGA TAHRIIBTA DHALINYAARADA G/SAAXIL
Waxaa magaalo madaxda G/saaxil ee Berbera laga furay koob ama tartan kubadeed
loogu magac daray Tartanka Kahortaga Tahriibta Dhalinyarada, tartankan oo ay
maalgaliyeen ururka wadaniga ah ee YOVENCO islamarkaana ay fulinayaan wasaarada
dhalinyarad iyo ciyaaraha waxaa ka qayb qaadan doona 12 kooxood oo ah kooxaha
heerka koowaad (serio A) ee magaalo madaxda G/saaxil ee Berbera.
Tartankani maaha kii koowaad ee ururka wadaniga ah ee YOVENCO uu soo
qabanqaabiyo kana fuliyo G/saaxil balse waxaa jiray tartano noocan oo kale ah oo
ururku soo qabtay looguna talogalay in kor loogu qaado wacyiga iyo
iskuxidhnaanta dhalinyarada G/saaxil
Furitaankii tartankan waxaa kazoo qayb galay gudoomiyaha golaha deegaanka
Berbera, xildhibaano, wafti kasocday dhailnyarada iyo ciyaaraha heer qaran iyo
martisharaf kale.
Waxaa ugu horayn halkaa kahadlay isuduwaha ciyaaraha ee G/saaxil Mr Shaafici
Jaamac Aaden oo amaan usoo jeediyey uruuka wadaniga ah ee YOVENCO oo uu sheegay
in markasta ay hiil iyo hooba lagarab taagan yihiin wasaarada ciyaaraha ee
G/saahil.
Waxaa sidoo kale isna halkaa kahadlay gudoomiyaha ururka YOVENCO Eng. Ahmed
Abokor isagoo ugu horayn mahad balaadhan usoo jeediyey martisharaftii kasoo qayb
gashay xafladan furitaanka. Gudoomiyuhu wuxuu intaa kudaray in ururka YOVENCO
markasta utaagan yahay kahortagida waxkastoo dhib ku keeni kara dhalinyarada
islamarkaana ururku uu sii wadi doono tartanad noocan oo kale ah si dhalinyarada
looga mashquuliyo tahriibka, balwadaha iyo dhaqan xumada.
 
Ugu danbayntii waxaa kalmadii furitaanka halkaa kasoo jeediyey Gudoomiyaha
golaha deegaanka Mr Cabdale Moh’ed Carab isagoo amaan usoo jeediyey ururka
wadaniga ah ee YOVENCO, dhalinyaradana kudhiiri galiyey inay kafaa’iidaystaan
fursadaa qaaliga ah kana waantoobaan tahriibta iyo wixii waxyeelaynaya
mustaqbalkooda.
Tartankan oo socondoona mudo bil ah waxaa lagudoonsiin doona kooxaha ku
guulaysata jaaisado qaaliya oo isugu jira lacag iyo agab ciyaareed sida kubado,
dirays, mobilo iyo qalab kale oo farabadan.
A/rahman Ahmed
Freelance Journalist
Berbera
Tell: 4474085
raxdo_ukraine@hotmail.com
Faafin: SomaliTalk.com | May 20, 2009 | 
Daabaco
Boggan | Print
