Dhakhaatiirta soomaaliyeed ee dalka Pakistan oo cudurka Hepatitis B Virus
ka talaalay boqolaal dad ah.
Sawirada Halkan ka daawo....
Somali Medical Union (SMU) oo ah urur ay ku midaysanyihiin ardayda soomaliyeed
ee cilmiga caafimaadka ka barata dalka Pakistan ayaa waayadaan danbe wuxuu waday
wacyi galin iyo baraarujin ku aadan dhibaatada uu leeyahay cudurka loo yaqaano
Hepatitis B virus (HBV) oo ah cudur halis ah oo ku dhaca beerka.
![](20ma202.jpg)
Maadaama cudurkani yahay mid dilaa ah, khatarna ku ah caalamka ayaa
dhakhaatiirta soomaaliyeed ee dalka pakistan waxay u istaageen issuna xilqaameen
sidii ay u wacyi galin lahaayeen ugana talaali lahaayeen fayraska keena
cudurkaan bulshada soomaaliyeed ee ku dhaqan guud ahaan Pakistan gaar ahaana
kuwa ku nool caasumada wadanka ee Islamabad.
Ol ole iyo wacyi galin dheer ka dib, waxaa dhakhaatiirta soomaaliyeed oo
kaashanaya shirkad lagu magacaabo City Lab iyo GSK ay cudurkaan ka baareen
soomalida ku nool Islamabad iyagoo ka dibna ka talaalay dad gaaraya illaa iyo
250 qof oo isugu jiray waayeel, dhalinyaro iyo caruur kuwaas oo laga waayay
fayraska keena cudurkaas halka ay lix ruux oo looga shakiyay cudurkaas u direen
baaris dheeraad ah.
Talaalkaan oo ahaa mid looga hortagayay cudurkaan dilaaga ah ayaa waxaa hir
galiyay uruurka dhakhaatiirta soomaaliyeed xafiiskiisa Islamabad, waxaana aad u
soo dhaweeyay dadka soomaaliyeed ee ku nool Islamabad iyo guud ahaanba Pakistan.
Intii lagu sugnaa goobtii uu ka dhacayay talaalku waxaa dadwaynaha hadal wax tar
leh oo ku saabsan cudurkaan u soo jeediyay gudoomiyaha Somali Medical Union
(SMU) Dr Ahmed Omer oo si kooban uga hadlay wax qabadka ururka asagoo si guudna
uga hadlay cudurka (HBV). Sidoo kale waxaa halkaas hadal qiimo leh kasoo
jeediyay Dr. Khaalid Suleyman Qalib oo ah madaxa ururka qaybta Islamabad. Dr.
Khaalid wuxuu ka hadlay dadaalkii ururuku u soo maray in dadka soomliyeed ee ku
dhaqan Islamabad laga talaalo cudurkaan isagoo sidoo kalana ka hadlay wax
qabadka ururka kaas oo uu sheegay in talaalkani kamid yahay waxyaabihii ugu
horeeyay ee ururku hirgaliyay illaa iyo aas aaskiisii, balse ay rajaynayaan ka
uruur ahaan inay wax wayn u qaban doonaan dhamaan bulshada soomaalyeed meel
walba oo ay joogto gaar ahaana kuwa ku nool Pakistan.
Waxaa sidoo kale asaguna ka hadlay goobtaas Dr. Liibaan Abdikarim oo si qoto
dheer uga war bixiyay dhibaatooyinka cudurkaan, sida looga hortagi karo iyo
faa’iidooyinka talaalka. Dr. Liibaan wuxuu sheegay in cudurkaan halis yahay,
balse sida kaliya ee looga hortagi karo ama la isagana ilaalin karo ay tahay in
qofku iska talaalo cudurkaan inta uusan qaadin jeermiska keena cudurkaan.
Dhakhaatiir badan ayaa halkaas hadalo wax tarleh kasoo jeediyay, waxaana sidoo
kale ka mid ahaa dadkii iyaguna goobtaas ka hadlay Dr. Mohamoud Ibrahim Ali iyo
Dr. Qasim Abdi.
Dhamaan dhakhaatiirtaan waxay ku celi celiyeen in bulshada soomaaliyeed meel
walba oo ay joogtaba looga baahanyahay inay ka feejignaadaan cudurkaan dilaaga
ah maadaama soomaliya lagu tiriyo wadamada ugu badan ee cudurkaan caanka ka
yahay sida kaliya ee la isaga ilaalin karana ay tahay inuu qof walba deg dego u
tiigsado gaabaha cudurkaan lagu baaro baaritaankaas kadibna uu iska talaalo.
Baaritaan dheer oo la xiriira wadamada ugu badan ee cudurkaan uu aafeeyay ayaa
Pakistan waxay ka mid noqotay wadamada safka hore ku jira iyadoo la sheegay in
dad gaaraya 3 million oo qof ay la il daranyihiin xanuunkaan.
Wadamo badan oo aduunka ah ayaa la tacaalaya cudurkaan, waxaana ugu badan
wadamada dunida sadexaad oo ay Africa ka mid tahay. Wadamada la is dhihi karo si
aad ah ayuu ugu faafayaa fayraska dhaliya cudurkaan ayaa waxaa ka mid ah
soomaaliya maadaama aysan ka jirin wacyi galin iyo talaal joogta ah. Taasi waxay
sababtay in boqolaal soomaali ah ay la il daranyihiin xanuunkaan, ayna jiifaaan
hosbitaalada, mana jiraan inta badan wax caawinaad ah oo ay helaan dadkaas,
balse waxaa la is dhihi karaa dhakhaatiirta soomaaliyeed ee dalka Pakistan waa
iftiin u soo baxay umma soomaaliyeed, waxaana laga rajo qabaa inay wax badan ka
tari doonaan ama ka qabandoonaan xaaladaha caafimaad xumo ee ka jira soomaaliya.
Diyariye:
Durran Xassan-yare
Karachi, Pakistan.
duraanhassan530@hotmail.com
Faafin: SomaliTalk.com | May 20, 2009 |