Wasiirka Tiknaloojiyada iyo Cilmibaarista DKMG Soomaaliya Maxamed Cali Xagaa “…heshiiska Isfaham uma baahneyn in Baarlamaanka la geeyo…” wareysi xiiso badan

XAGAA: “madaxweynuhuna waa ka hadlay  waxaa uu yiri, arrintaasi Baarlamaanku si khaldan ayey u fahmeen…”

Wasiirka Tiknaloojiyada iyo Cilmi Baarista Dowlada Soomaaliya Xildhibaan Maxamed Cali Xagaa oo aan wareysi gaaban oo dhinacyo kala duwan taabanayey kula yeeshey Hoteel Kempinski ee caasimada dalka Jabuuti 11/09/2009-ka, intii aysan ka dhoofi, ayaa ka hadley waxa ka soo baxay booqashadii ay ku yimaadeen dalka Jabuuti, waxa u qabsoomey dowlada intii ay dalka dib ugu noqotey, halka uu ku dambeeyo heshiiskii Is-afgarad oo baarlamaanku uu diidey iyo in socdaalkooda ay sii wadanayaan iyo in kale isagoo arrimahaasi ka hadlaya waxa uu yiri:

 “safarkeenu wuxuu ahaa in labada madaxweyne ay is akh-baar weydaarsadaan waxa ku soo biirey Arimaha diinta iyo siyaasada Soomaaliya, waxyaabo fara badan oo fiicana wey ka soo baxeen oo si wanaagsan ayuu ku dhamaadey”

Xildhibaan Xagaa mar aan weydiiyey waxa u qabsoomey dowlada intii ay dalka dib ugu laabatey ayaa wuxuu yiri “waxyaabo fara badan ayaa inoo qabsoomey, inkastoo weeraro lagu soo qaadey, iyadoo bil aysan dalka joogin, deegaanada xiligan ay gacanta ku hayso nabadgelyo laysku haleyn karo ayaa ka jirta, dowladuna way shaqeyneysaa gudaha iyo dibadda guulo waaweyn bay ka soo hoysey, qayb ka mid ah mucaaradkuna wadahadalo ayaa inoo socda, magaalada muqdisho xaaladeeduna waad la socotaa mucaaradkii waxay noqdeen Idaacad ku nool, sababtoo ah waxay sameeyaan arbushaad, mana ahan xiligan kuwo awood leh oo meel qabsankara, xoogooduna maalinba maalinta ka dambeysa way sii daciifiyaan, mana jirin ujeedo siyaasadeed oo dagaal lagu hogaamiyo ee ujeedkoodu wuxuu ahaa dowlada Qoorta kaga duubnaada, arbushaadooduna wey dhamaandoontaa marka ay soo gebageboobaan Qorshayaasha dowlada ee lagu habeynayo ciidamada iyo abaabulka shacabka, nimankan mucaaradka ah shacabkii khaati ayey ka taagan yihiin mana jecla, dhowaana hadii Alle idmo caasimadu waxay kusoo wareegidoontaa gacanta Dowlada, dalkuna si tartiib tartiib ay isugu balaarin doontaa dowlada, waxaana filayaa in Ummadda Soomaaliyeed ay garab istaagi doonaan dowladooda”.

Mar aan weydiiyey Wasiirka Cilmibaarista iyo Tiknaloojiyada DKMG Md, Xagaa  Xukuumadu dalabaadkii ay u gudbisey Baarlamaanka ee heshiiskii Is-afgarad, islamarkaana uu baarlamaanku diidey ansixintiisa, halka uu ku dambeeyo arrimihiisa ayaa wuxuu ku jawaabey  “heshiiskaas arrimihiisa Baarlamaanku waa diideen, Xukuumaduna way isku raacdey, madaxweynuhuna waa ka hadlay  waxaa uu yiri, arrintaasi Baarlamaanku si khaldan ayey u fahmeen, marka xiga heshiiskaasi Isfaham uma baahneyn in Baarlamaanka la geeyo, laakiin waxaad moodaa in dad badan ay ku kiciyeen tushuush, wuxuuna noqdey arrin xasaasi ah, markii ugu dambeysey madaxweynuhu wuxuu yiri waxaanu u saaridoonaa khubaro Soomaaliyeed oo arinta is waafajiya oo mush-kiladaha ka imaanaya dadka ay u sharxaan, taasina way socotaa, xagii kale ee International-kuna waa uu ka socdaa wuuna fiican yahay”!!.

Sidoo kale mar aan weydiiyey Wasiirku in heshiiska Is-afgarad Qaramada midoobey ay go’aan ka gaaridoonto bishan aynu ku jirno marka waxa  u qorsheysan oo ay kaga jawaabayso dowlada arinkaas ayaa wuxuu yiri “walaahi xog dheeraad ah kama hayo xiligan, waxaana jooga Wasiirkii qaabilsanaa arintaas, waxaana jeclaan lahaa inaad isaga weydiiso”.

Xildhibaan/Wasiir Maxamed Cali Xagaa

Wasiirka mar aan weydiiyey su’aal ahayd Waxaa nagu maqaalo ah isku shaandheyntii uu Ra’iisul Wasaaruhu Golihiisa Wasiiradda uu ku sameeyey in ay ku timid khilaaf isaga iyo qaar ka mid ah Golihiisa Wasiiradda marka arrimahaas maxaa ka jira waxa uu ku jawaabey “taas waxay ku fiicneyd in Ra’iisul Wasaaraha la weydiiyo, laakiin aniga Xukuumada ayaan ka tirsanahay ma ogi wax khilaaf oo ka dhex jira Xukuumada, sababtoo ah Wasiir waa la dhaliili karaa Jago kale waa la geyn karaa, taasina waa awooda Ra’iisul Wasaaraha”.

Ugu dambeyn Maxamed Cali Xagaa mar aan weydiiyey Safarkiinu ma dalall kale oo caalamka ah ayaad uga sii gudbidoontaan mise dalka ayaad dib ugu noqoneysaan ayaa wuxuu yiri “Safarkeenu xiligan wuxuu ku kooban yahay Jabuuti, balse marka aan dalka dib ugu noqono waxaa laga yaabaa in safari kale la aadi doono” ayuu hadalkiisa ku soo gebagebeeyey Wasiir Maxamed Cali Xagaa.

AKHRI: Madaxweynaha DKMG Soomaaliya Sheekh Shariif oo ka Dhoofey Dalka Jabuuti (Sept 11, 2009)

Maxamed Macallin Cismaan (All-man) Somalitalk Jabuuti.
fatxumaalik@hotmail.com

Faafin: SomaliTalk.com | Friday, September 11, 2009