Ra’iisul Wasaaraha DFKMG Nuur Cadde oo Xarunta Modoowga Yurub kula kulmay  Xoghayaha Guud ee Arrimaha Amniga Mr. Javier Solana...

Brussels: Nuur Cadde oo Sheegay in aan waxba ka jirin Wararka Sheegaya in uu Tegi Doono Qaahira iyo Casmara... Waraysi...

• Waraysiga Halkan ka dhegeyso ama Halkan (mp3)

Ra’iisul Wasaaraha DFKMG ah Mudane Nuur Cadde ayaa magaalada Brussels kula kulmay Mr. Javier Solana oo ah ma’suulka u qaabilsan Midoowga Yurub arrrimaha amniga. Kulankan ayaa ka dhacay xarunta Midoowga Yurub ee European Council.

Mudane Nuur oo soo gaaray magaalada Brussels shalay subaxnimadii ayaa waxaan wax ka waydiiyay kulanka uu la qaatay Mr. Solana, waxaana ugu horreyntii waydiiyay waxa ay iskula soo qaadeen kulanka isaga iyo Javier Solana wuxuuna ii sheegay isagoo ii faahfaahinaya inuu kulankan ahaa mid ku dhamaaday  jawi wanaagsan isla markaana ay ka wada hadleen xaaladda guud ee dalka Soomaaliya iyo sidii wax looga qaban lahaa soo celinta nabad galyada  iyo arrimaha dib u hishiisiinta, Midoowga Yurubna ay gacan uga gaysan lahaayeen. Wuxuuna Mudane Cadde ii sheegay in ay dhamaan arrimahaas isku af garteen. Dhinaca kalena wuxuu Ra’iisul Wasaaraha sheegay in uu Mr. Solana ugu ballan qaaday in ay wax wayn ka qaban doonaan Midoowga arrimaha Soomaaliya gaar ahaan xagga dib u hishiisiinta iyo nabad galyada.

Ra’iisul Wasaaraha oo aan waydiiyay qaabka ay u wajahayaan dib u hishiisiinta iyo qaabka ay wada hadal ula furayaan kooxaha mucaaradka ah ayaa iigu jawaabay.. 

In ay ka go’an tahay in ay mucaaradka dowladda kasoo hor jeeda si aan kala sooc lahayn oo loo dhan yahay ay ula xaajoon doonaan ulana hadli doonaan isagoo hadalkiisa sii watana wuxuu yiri “ Mucaaradka waa dad dalka xaq ku leh waajibna uu ka saran yahay in ay wax ka qabtaan, maxaa yeelay dalka wax u qabashadiisa iyo umadda Soomaaliyeed wax u qabashadeeda annaga iyo mucaaradka waa u simman nahay oo ma kala xigno wadanka iyo dadkaba haddiise mucaaradka ay dhaliilsan yihiin wax qabadkeena dowlad ahaan amaba ay jirto in ay wax ka tabanayaan xagga awood qaybsiga annaga diyaar ayaan u nahay inaan arrimahaas ka wada hadalno, meel isla dhigno wixi dan u ah ummaada Soomaaliyeed wixii qilaaf jirana meel la isla wada dhigo” 

Nuur Cadde iyo Javier Solana, Feb 11, 2008, Brussels

Sidoo kale ayuu Prime Ministerka iiga jawaabay su’aal kale oo ku saabsanayd qaabka ay ku bixi karaan ciidamada Itoobiya iyo habka ay ku imaan karayaan ciidamada AMISOM iyo haddii uu kala hadlay Mas’uulka Midoowga Yurub in ay ka taageeraan dhinaca dhaqaaalaha ayuu iiga jawaabay waxaa uuna yiri… 

“Ciidamada AMISOM in qarash loo helo oo la soo dhamays tiro maadaama ay tirade hadda joogta ay yar tahay hore ayaa looga hadlay shirkii Madaxda Midoowga Afrika haddan waa ka wada hadalnay, ciidamada Itoobiya laakin joogitaankooda iyo bixidoodaba waxay ku xiran tahay ummadda Soomaaliyeed oo isu timaada wada hadasha mucaaradka iyo dowladda in ay wada hadlaan oo ay isla gartaan iyo ciidamadaasu joogayaan iyo in ay baxayaan waxay ila tahay go’aankii markaas la gaaro ayaa soconaaya” 

Nuur Cadde iyo Javier Solana | Feb 11, 2008

Ugu danbayntii ayaa waydiiyay waxa ka jira wararka sheegaya inuu Qaahiro wada hadal kula yeelan doono mucaaradka iyo inuu tagi doono magaaalada Casmara ee dalka Eritrea oo xarun u ah mucaaradka wuxuuna iga yiri….. 

“Run ahaantii waxba kama jiraan warkaas annaga waxaan hore u sheegnay mucaaradka inaan kula kulmi doono meel kasto ay joogaan oo aan la xaajoonayno oo aan diyaar u nahay taas horena waan u cadeynay laakiin hadda qorshe maantay go’an oo aan Qaahro iyo Casmara aan ku tagayno safarkaynaan ma jiro” 

Mudane Nuur Cadde ayaa beri kulamo la yeelan doona Baarlamaanka Midoowga Yurub iyo Sarkaalka Midoowga Yurub u qaabilsan Arrimaha Gar Gaarka  iyo Horumarinta   Mr. Louis Michel.

Waxaa xusid mudan in uu Ra’iisul Wasaare Nuur Cadde sidoo kale berri kulan la leeyahay safiirada Midoowga Yurub u qaabilsan arrimaha Amniga iyo Nabad Galyada oo loo yaqaano Peace and Security Council (PSC) kulankaan haddu dhacana waxaa Mudane Nuur Cadde uu noqonayaa Mas’uulkii seddexaad ee Afrikaan ah oo la kulma PSC waxa hore ula kulmay Madaxa Gudddiga Midoowga Africa Alpha Omar Konare iyo Ra’iisul Wasarihii hore ee DFKMG ah Mudane Cali Maxamed Geedi . 
 
Ra’iisul Wasaaraha oo ay socdaalkaan ku wehliyaan Wasiirka Arrimaha Dibadda Mudane Jangali iyo Wasiirka Maaliyada Mudane Xaamud ayaa maanta waxay la hadli doonaan jaaliyadaha Soomaaliyeed ee ku nool Yurub.

• Waraysiga Halkan ka dhegeyso ama Halkan (mp3)

Nuur Cadde iyo Javier Solana | Feb 11, 2008, Brussels Belgium

Saida Sheikh Ahmed (VIP) 
Brussels Belgium
saidavip1@yahoo.com