"BADBAADI BADDA SOOMAALIYEED" - "SAVE THE SOMALI SEAS"
Xubin ka noqo Xaruntan Cusub..
Waxaan Ummadda Soomaaliyeed la socodsiinayaa in
codsigii aan usoo jeediyay Xildhibaannada Baarlamaanka KMG Soomaaliyeed in
qaarkood aaysan la soconnin, sidaas awgeed waxaan Ummadda Soomaaliyeed ka
codsanayaa in intii la xiriirikarta Xildhibaannada Baarlamaanka KMG in aay la xiriiraan
oo ka dhaadhiciyaan in laga horyimaado Qorshahan loogu magac daray ROADMAP oo
khatar ku ah XUDUUD BADEEDKA SOOMAALIYA.
Ummadda Soomaaliyeed waa in aay wada ogaadaan in
ulajeedada ku qarsoon ROADMAP-KA arrimaha ugu waayeyn waa arrintaan ansixinta
xuduud badeedka Soomalia, taas oo ah arrin aan hadda loo joogin, oo aysan
Dawladdaan ku meel gaarka ah xaq u lahayn in ay goaamiso, inta Dawlad sax ah
laga helayo oo matasha Somalia oo idil, wax looga deg dego meesha ma yaal ,
waayo haddii la leeyahay kalluunkii Soomaaliya oo sida sharci darrada ah lagu
boobayo ayaa la idinka difaacayaa, waxaa iska cad in arrintaasi aay been tahay
sababtoo ah 20kii sano oo lasoo dhaafay ayaa la boobayey, una malayn mayo in
qorshahan loogu magac daray ROADMAP in uu wax noo xallinayo .
Waxaa hubaal ah in
uu boobku sidiisii u sii soconayo. Muraadka kaliya oo qorshahaan ROADMAP-ka laga rabo waa in sharciga
badaha Soomaaliya loo baa-basho ama loo tirtiro si loo waayo sharci kula xisaabtama
20kii sano oo kheyraadka badda Soomaaliya la boobay qashinka khatarta ahna lagu
shubayay, intaas waxaa dheer in Keenya oo ayaduna qorshahaan dabada ka riixeysa
aay u danleedahay sidii aay ku hantiyi lahaad Batroolka Badda Soomaaliya oo in
muddo ah daba carareysay in aay soo gudbisato qorshaheeda bad ballaarsiga
bacdamaa Soomaaliya loo sameynayo CABIR CUSUB oo ah 12nm.
Dhibaatada ugu weyn ee Somali haysata waxaa weeye,
aqoon darro iyo iyada oo aysan jirin cid loogu soo hagaago arrintan xuduudaha
iyo khayraadka badda Soomaaliyeed, maadaama muddadii Ku Meel Gaarku soo jirey ay
Wasiirro badan isaga dambeeyeen xilkaas, wax raad ah oo muuqdana oo ay ku qancin
karaan Ummadda Soomaaliyeedna aysan horayna uga taghin, haddana gacanta ku hayn
heshiisyadii ay horaay u gali jireen iyo kuwa hadda miiska u saran in ay galaan.
Marka la saxiixayo heshiisyada noocaan oo kale ah, waa in uu jiraa raad raac
Somali leedahay iskuna raacsantahy, iyada oo aan cid kale oo dano khaas ah leh
aan lagala l tashan, sida hadda socota oo kale oo ay indho iyo dhago inoo yihiin
kuwa raba in naloo sameeyo cabbir cusb oo ah 12nm, kii hore oo uu addunku noo
aqoonsanaana la nalaka tirtiro, iyada oo aan haba yaratee wax sabab lagu qanci
karo aysan jirin.
Sidaa darteed, waxaan soo jeedin lahaa in la isku
dayo in la sameeyo Hayad Madax Banaan oo loogu magac daro:
Xarunta Daraasaadka Qeyraadka iyo Xuduudaha Badda
Soomaaliyeed
Somali Marine Resources and Boundaries Studies
Center
Hayaddas waxaa membership ka noqon kara muwadin
kasta oo Somali ah oo ku tabarucaya aqoontiisa iyo dhaqaalishiisa si loo
ilaaliyo hantida ma guurtada ah ee ay leedahay Ummadda Soomaaliyeed, waxayna
aruurinaysaa wixii cilmi baaris ah ee horay loo sameeyey ee ku saabsan
khayraadka badda Soomaliyeed, dhinaca environmentiga, ama haraagaa khashinka
lagu daadiyo, waxay talo bixin siinaysaa si joogto ah dawlad kasta oo Somalia
yeelato arrimaha ku saabsan khayraadka badda iyo xuduudaheedaba, iyada oo ka
qaybgalaysa shir kasta oo looga hadlayo arrimaha badda Soomaaliyeed, maadaama ay
member ka noqonayaan xeeldheerayaal Soomaliyeed oo kala jooga addunka
dacalladiisa.
Hayaddas waxaa loo samayn doonaa Charter ay ku
shaqayso oo ay ku qoranyihiin: Objectives, Mission, Principles, purpose and
aims, Membership, Organs (Chairman and the Executive Board) etc.
Waxaan soo jeedinayaa in Somalitalk aay ugu tala
gasho HAL PAGE oo websitekooda ah si loogu daabaco arrimaha khuseeya Center-kaas
oo mideynaya aqoonyahannada Soomaaliyeed ee ku xeel dheer culumta badaha iyo
sharciyadoodaba, (Think Tankers), si ay si joogto ah heegan ugu ahaadaan difaaca
danaha Badda Somaliyeed, meel kasta iyo waqti kastaba. Dhaqaalaha ay ku
shaqaynaso, wuxuu uga imaan kara Tabarrucaad (donations) maadaama ay tahay NON
PROFIT ORGANIZATION.
Arrintaan haddii ay hirgasho, dawlad kasta oo
Soomaliyeed waxay helaysa meel ay ka tixraacdo arrimahan murugsan ee Baddan
Soomaliyeed ee boobka lagu hayo.
Waxaan Ummadda Soomaaliyeed iyo saaxiibadey
Somalitalk ka codsanayaa in aay gacan ka geestaan hirgalinta AAS AASIDDA
HAYADDAN KA MADAXA BANNAN DAWLADAHAN KMG ah oo sida joogtada ah isku badbadalya.
Bashir Shekh Moxamed
bashirmohamud@yahoo.com
Faafin: SomaliTalk.com | September 14, 2011
Qoraaga (Bashiir Shiikh Maxamed), waa diblomaasi Soomaaliyeed oo ka soo
shaqeeyay safaaraddii Soomaalida ee Stockholm xiligii uu safiirka ka ahaa
halgamaagii weynaa ee ee Cabdulaahi Ciise Maxamuud (Alle ha u naxariistee).
Sannadkii 1979-kiina waxa uu noqday sii hayaha (Chargé D'affaires) ee
safaaradihii Soomaaliya uga furnaa waddamada Sweden, Denmark iyo Norway.
Daabaco
Boggan | Print
