Puntland oo Markii ugu Horeysey Qirtay Lacagta laga Qaatay Shirkada
Batroolka in Wax Laga Siiyey DFKMG....
iyo Puntland oo Shirkadda Range Resources u dirtay Warqaddii ay ka sugeysey...
- Range Resources ayaa [Arbaca, 26/3/2006] Qoraal ay u dirtay Suuqa
Ganacsiga Australia waxaa si cad uga dhex muuqdey hadalkii Cadde Muuse ee in
aysan ka mid ahayn DFKMG...
- Waxa kale oo ay Range sheegtay: Dawlad [Goboleedka] Puntland waxay ku
wargelisey Range [Resources] in Warqad Furan uu daabacay Wasiirka
Tamarta ee DFKMG taas oo ahayd qoraal aysan ansixin ama ogolaan Madaxwynaha
iyo Ra'iisul Wasaaraha DFKMG
- 26 Xildhibaan oo soo saaray qoraal ay ku diidan yihiin qaabka loo
ansixiyey sharciga Batroolka DGPL...
- Xasan Aloore "DGPL kuma bakhaylin dakhligii ay ka heshay heshiisyada
sahaminta in ay DFKMG kaga difaacdo weerarka kaga imaney kooxaha
axmaqa/xamaadasaysan ee xaruntoodu tahay Muqdisho."
Talaadadii [25/3/2008] ayey ahayd markii Shirkadda
reer Australia ee Range Resources ay hakad gelisey saamiyadeedii Suuqa Ganacsiga
ee Australia, iyadoo taas sabab uga dhigtay "in ay sugeysey [ka hore
Khamiista Maarso 27, 2008] qoraal ay Puntland
ku cadayneyso xiriirka ay la leedahay Dawladda Federaalka Kumeel Gaarka ah ee
Soomaaliya."
Haddaba, isla Talaadadii [25/3/2008] ayaa Xafiiska Madaxtooyada Maamul
Goboleedka Puntland waxa uu faafiyey Warsaxaafadeed uu soo saaray
Wasiirka Batroolka ee DGPL, Xasan Cusmaan Maxamuud (Xasan Aloore), oo si
kulul u weeraraya Wasiirka Macdanta iyo Tamarta ee DFKMG, Eng. Maxamuud
Cali Saalax (Kaanje).
 Qoraalka
Xasan Aloore oo lagu soo beegay inta aan la gaarin xilligii ay qabsatay Shirkada
Reer Australia in ay qoraal ka hesho DGPL, ayaa ku qornaa af-Ingriiisi oo
keliya oo aan Af-Soomaali wadan (weli), waxana uu si qayaxay u edeeyey Eng.
Kaanje.
Aloore waxa uu qoraalkiisa ku yiri: "Wasiirka aan lahayn xafiiska uu ku
shaqeeyo, ee guurguura/safarka ku jira, waxa uu ugu dambeeyey liis dheer oo
shakhsiyaad, khaas ah ama dawladeed, oo kadeed/dhibaato ku haya jaalkayaga
(shirkadaha) oo curyaaminaya degganaanshaha iyo yoolka horumarineed ee Puntland.
Annagu ma xakuno shakhsiyaadka gaarka ah, welwelna kamaba qabno. Laakiin, Cayda
iyo Hanjabaadda Wasiirku waxay u baahan tahay cunqabatayn dawladeed shaqadiisa
uu gudan waayey iyo hab dhaqanqiisa aan ku haboonayn sarkaal dawladeed oo leh
derajadaas oo kale. Sarkaal sare oo ka tirsan DFKMG ayaa noo xaqiijiyey in
aragtida wasiirku (Eng. Kaanje) ay tahay aragtidiisa oo keliya oo aysan ahayn
Warsaxaafadeed ay ansixisay DFKMG."
- Qoraalka Aloore ee ay faafisay madaxtooyada DGPL (25/3/2008)
ma lahayn tirsi ama tixraac wasaaradeed iyo sidoo kale ma leh shaabad
Wasaaradeed. Halka qoraalka Eng. Kaanje uu leeyahay shaabad Wasaaradeed iyo
tixraac xeer Lr# Min-Energy-Mining/E/2008.3/11
oo ku taariikhaysan: Khamiis, March 20, 2008.
Hadalka la xiriira in warsaxaafadeedka Eng. Kaanje aysan DFKMG ansixin waxaa
sii faahfaahiyey qoraalka Shirkadda Range
Resources u dirtay [Arbaca 23/3/2008] Suuqa Ganacsiga ee Australia (ASX), oo lagu qoray "Dawlad
[Goboleedka] Puntland waxay ku wargelisey Range [Resources] in Warqad Furan
uu daabacay Wasiirka Tamarta ee DFKMG taas oo ahayd qoraal aysan ansixin ama
ogolaan Madaxwaynaha iyo Ra'iisul Wasaaraha DFKMG." Waxayna markaas Range
xustay in Warsaxaafadeedkii Wasiirka DFKMG [oo ay Range ku tilmaantay Warqad
Furan] in ka jawaabey Wasiirka Tamarta iyo Macdanta ee Puntland.
Hadalkaaas weli wax jawaab kama bixin col. Nuur Cadde iyo col.
C/laahi Yuusuf.
Waxa kale oo qoraalka Range u dirtay Suuqa ASX la socdey sawir muujinaya shir
dhex maray qaar ka tirsan madaxda sare ee maamulka Puntland iyo shirkaddaas (iyo
jaalkeed).
Kulan dhex maray Madaxda DGPL iyo shirkadaha | Sawirka:
ASX (26/3/2008)
Range Resources qoraalkeedii [Arbaca, 26/3/2006] waxa kale oo ay ku xustay in
2009 ay Puntland ku soo fool leedahay Doorasho. Waxaana qoraalkaas ay u dirtay
ASX si cad uga dhex muuqdey hadalkii Cadde Muuse ee ahaa "Inta laga helayo
dastuur federaal ah oo loo dhan yahay iyo dhismaha dawlad goboleedyo ku qanacsan
qaybsiga awoodaha iyo khayraadka, taageerada Dawladda Puntland u hayso DFKMG ah
sina looguma qaadan karo in ay Puntland ka mid tahay DFKMG ah - Puntland waa u
madax bannaan tahay shuruucdeeda, siyaasaddeeda iyo daneheeda."
Puntland waxay lacagtii shidaal Sahaminta wax ka siisay DFKMG....
Qoraalka [25/3/2008] ee Wasiirka Batroolka ee DGPL waxa uu markii ugu
horeysey shaaca ka qaaday in Puntland ay lacagihii ay ka heshay heshiisyada
shidaal sahaminta wax ka siisay DFKMG, isaga oo halkaas ka hadlayeyna waxa uu
Xasan Aloore qoray: "Dawlad [Goboleedka] Puntland kuma bakhaylin kharashkii ay
ka heshay Cashuurta, iyo adeegyada dekeda Boosaaso iyo dakhligii ay ka heshay
heshiisyada sahaminta si ay iyadu [Puntland] isugu difaacdo iyo in ay DFKMG kaga
difaacdo weerarka kaga imaney kooxaha axmaqa/xamaadasaysan ee xaruntoodu tahay
Muqdisho."
Range Ma Sheegin Qoraalkii ay Soo saareen 26-ka Xildhibaan...
XEER HOOSAASKA DGPL:
Habka Codbixinta Golaha WakiiladdaQodobka 13.6: Haddii codadku
laba jeer is le’kaadaan Guddoomiyaha ayaa yeelanaya cod dheeri mar
sadexaadka |
Qoraalka ay Range u dirtay Suuqa ASX kuma aysan muujin in xildhibaanno
gaaraya 26 xildhibaan ay 22/3/2008 soo saareen
qoraal cinwaan kiisu ahaa "Soo celin Xeer aan ansax ahayn",
maadaama markii loo codeeyey sharciga Batroolka ay xildhibaanadii noqdeen 21
Diidmo, 21 Ogol, 6 aamustay, oo halkii lagaga celin lahaa laba jeer, sida uu
dhigayo xeer hoosaadka Golaha Wakiillada Puntland, laakiin uu guddoomiyaha
baarlamaanku codkiisa markii koowaad ku ansixiyey xeerka.
26-ka xildhibaan oo arrintaas diidan [21 hore u diidanaa iyo 5 ku biirtay]
waxay qoraalka u direen
Madaxweynaha DGPL, Madaxweyne ku xigeebka DGPL, Xeer ilaaliyaha Guud DGPL,
Guddoonka Golaha Wakiillada DGPL, islamar ahaantaasna waxay ogeysiiyeen Isimida DGPL iyo
saxaafadda madax bannaan.
Qoraalka Xildhibaannada waxaa ku qornaa: "Iyadoo la dhawrayo dastuurka DGPL qodobkiisa 46.8, 46.10 iyo xeer
hoosaaska golaha wakiilada DGPL qodobkiisa 13.6, iyadoo laga fogaanayo in
si bareer ah loo jabiyo dastuurka iyo xeerka iyo qawaaniinta kale ee u dhigan
DGPL, waxaan guddoonka golaha wakiilada ka codsanaynaa in ay dib u soo celiyaan
xeerka horumarinta kheyraadka macdanta iyo shidaalka, waxaan kale
oo guddoonka golaha wakiilada u soo jeedinaynaa inaanay ku dhaqaaqin ku dhawaaqid
go'aan aan ansax ahayn ayna raaligalin ka bixiyaan ku dhawaaqida go'aankii ku
saabsanaa Xeerka Horumarinta Kheyraadka Macdanta iyo Shidaalka kaasoo aan
ansaxa ahayn." Waxaana saxiisay
xildhibaannada.
Daalaco Qoraalladii: Aloore: (English Keliya)
| Eng. Kaanje (English |
Somali) | 26-ka Xildhibaan: (Af-Soomaali).
Marka loo fiirsado qaabka ay arrimuhu ku socdaan, waxay Puntland u muuqataa
mid hab siyaasadeedkeeda ay majaraha u hayaan shirkado ajnabi ah, waxaase loo
fadhiya baarlamaanka Puntland sidii uu talada dalka dib ugu soo celin lahaa
shacabka Soomaaliyeed, gaar ahaan reer Puntland.
Waxa kale oo la sugayaa mowqifka uu arrinta iska taago col. Nuur Cadde,
ra'iisul wasaaraha DFKMG oo wasiirkii uu u xilsaaray arrimaha Macdanta & tamarta
(sida batroolka) ay sidaas u af jebiyeen shirkado shisheeye.
Faafin: SomaliTalk.com | March 26, 2008
| 
Daabaco
Boggan | Print
Shirkadda Range Resources oo Hakad Gelisey Saamiyadeedii Suuqa Ganacsiga
Australia (ASX)....
