Faraxaygu Ma SomaliTalk baa mise waa
Baarlamaankii aan ka tirsanaa ??? !!!
Horudhac :
Akhristoow labo Hay'adood baan muddo ka tirsanaa waa
hay'adda ama Bahda SomaliTalk oon hal caqdi ama 10
sano wax ku qoraayey iyo Hay'adda ama Baarlamaanka
Soomaaliyeed oon hal sano ka tirsanaa .
Haddana maanta waxaan isweydiinayaa keebaan
labadooda ku faraxsanahay ma Qoraaladdii Difaaca
Badda Soomaaliyeed ee Hay'adda ama Webside-ka
Somalitalk ku Baraarujiyey Ummadda Soomaaliyeed oo
labo Wareeg ahaa .
Wareegga Kowaad oo uu ku difaacay Heshiiskii is
Afgaradka ee Kiinya loo Saxiixay ama aan si kale u
iraahdo ay Kiinya naga hoos bixisay.
Kaas ooy soo dhiciyeen Baarlamaanka Soomaaliyeed
Bishii Augusto 2009 kii sidoo kale uu Ururka
Qaramada Midoobay wax kama jiraan ka dhigay Bishhii
Juun ee 2010.
Wareegga labaad oo haatan socda oo lagu
bayaaninaayey Qorshaha Wadatashigii loo Bixiyey (
Road map)ka ay Dawladdu fulineyso Halka Sannad ee u
haray.
Kaas oo lagu bayaanshay in lagu Xadeeyo Badda
Soomaaliyeed ama in loo Sameeyo EEZ oo laga dhigaayo
Territorial-ka Badda Soomaaliyeed 12nmile halka aan
Sharciyeynteenii hore aan u gudbisanay ka ahaa
200nmile.
Qorshahaas oo la doonaayo in la fuliyo Bisha
Dec,19keeda 2011, se Nasiib Wanaag mar labaad ayey
Halgamayaasha Baarlamaanka Soomaaliyeed Dul dhigeen
( YAKE ) aan la loodin karin, Markii ay shalay ka
soo saareen Sharci Diidaaya in mar labaad la xadeeyo
Badda Soomaaliyeed oo ay ku ansixiyeen Sharcigii ugu
Danbeeyey ay Dawladdii Soomaaliya u gudbisay
Qaramada Midoobay 1988.
Dhismahii Baarlamaankii hore ee Soomaaliya
Waxaa halkaas ka soo baxay lix qodob oo halaasi ah,
waana kuwan: (1)
1. In lagu
Dhaqmo Sharciga Badda Soomaaliya ee soo baxay Sanadkii 1988-dii
2. In Hay’adaha
Dastuuriga ee Kumeel gaarka ah ee dalka; sida Madaxtooyada,
Baarlamanka iyo xukuumadda aysan awood u lahayn in ay wax ka
bedelaan ama dib u eegis ama ka wada xaajood ku sameeyaan Xaduud
badeedka Soomaaliya, iyo xuduudka hawada iyo dhulka Soomaaliya.
3. Waxaa la
laalay ama la burburiyay dhammaan heshiisyadii ama is afgaradkii
Caalamiga ahaa ee lala galay Hay’ado, Dowladaha Deriska ah iyo
ururro Caalami ah iyo shakhsiyaad, islamarkaana ku saabsanaa dhanka
xadeynta badaha oo la gaaray wixii ka dambeeyay 1da bishii Janaayo
Sanadkii 1991kii.
4. Xadgudub
kasta ama gabood fal kasta oo wax loogu dhimayo xuduudaha
Jamhuuriyadda Soomaaliya berriga, Badda iyo hawada sare ee
Soomaaliya, waxaa loo aqoonsanayaa duullaan bareer ah oo lagu soo
qaaday Maaxbannaanida iyo Siyaasadda iyo Midnimadda Ummadda
Soomaaliya.
5. Xukuumad
walba oo loo igmado howsha Dalka waxaa la farayaa in ay go’aankaan
gaarsiiyaan dhamaman Dowladaha Deriska ah iyo Hay’adaha caalamiga
ah.
6. Cid walba oo
ku xadgudubta waxa ay galeysaa dambi ah Khiyaanno Qaran.
Qoddobadaas oon
kala dhicin ayaan waxaan ku muusanaabay macnaa jacleystay haddaan
Reer Xamarka hadalka u jilciyo , midka ugu danbeeya :
( Cid walba
oo ku xadgudubta waxa ay galeysaa dambi ah Khiyaanno Qaran).
Runtii waa qiyaamo
qaran in aad laaluush ku qaadato Badda Soomaaliyeed ama aad
madaxtinimo ku doonto.
Waxayna arrintaasi
tumaati ku tahay macnaa dhaawac xabbadka ku yaal DKMG ee ay Madaxda
ka yihiin Shariif Axmed iyo Cabdiwali Cali Gaas.
Haddaba Akhristoow
ma ila fahamtahay labada qolo aan ku faraxsanahay waa :
(1)
Web-sideka Soomaalitalk Difaacaha badda Soomaaliyeed.
(2)
Baarlamaanka Qaranka Soomaaliyeed oo labo mar Difaacay Baddeena.
BAAQ KU
SOCDA RA'IISUL WASAARAHA DKMG :
Waxaa hortaa
qaldamay Ra'iisul Wasaare Mudane Cumar C/rashiid oo asagoon ka
fiirsan Heshiis la galay Dawladda kiinya.
Wuxuuna Cumar
C/shiid cudurdaar ku leeyahay waxay aheyd arrin ugub ah oo la hoos
galiyey, se ta maanta lagaa sugaayo Dec,19,2011 waa mid horay u soo
dhacday oo mar labaad ah , Nabigeenuna wuxuu yiri NNKH :
( Ruux
mu'min ah god labo jeer lagama qaniino ) !!!! hadday
markii hore qatif ku dhacday maanta waa in aad indhaha Furtaa , waa
Doqonnimo in meeshii Cumar C/rashiid laga Qaniinay in aad mar
labaad farta gashato.
Arrinkaasuna waxaa
ku saleysan Maahmaahyadda Soomaaliyeed ee oranaysa :
( mar i
dagi Allah ha dago mar labaad i dagana anigaa dagan).
oo macnaheedu yahay
haddii aan reer xamarka u jilciyo : Ruuxii mar i khiyaamo allaah ha
iigaga aaro, mar labaadse anigaa doqon ah .
Mudane Ra'iisul
Wasaare inkastoo Soomaaliya ay 20 sano Burbursaneyd haddana
waxgaradkoodii intoodii badneyd wey joogaan, dhankii loo kacaba
waxaad haysataa Khubaro Soomaaliyeed oo arrinka laga hadlaayo
mutakhasis ku ah (
Dhankii loo eryaba waa gamaan xulashadiisiiye)!!!! marka
arrin kasta oo ku soo food saara waxad tiraahdaa ayaa Aqoon u leh
arrinkaas, waxaad heli doontaa Ruug Caddaa na samatabixiya.
Markasta dib ugu
laabo Sharciyadii iyo Heshiisyadii Dawladihii Soomaaliya ay galeen
ama Qoraal ka diyaariyeen, taas ayaad ku badbaadi kareysaa.
Haatan waxaa ku
horyaala Go,aankii Baarlamaaku shalay gaareen iyo Sharcigii Baddaha
Soomaaliyeed ee 1972 ee 37 iyo kii 1988 Seddexdaas la tag UN kana
hor akhri una sheeg labo arrimood oo ah :
(1)
Xuduuda Badda Soomaaliyeed Territorial Sea oo ah 200nmile.
(2) Aaga
Ganacsiga iyo khayraadka EEZ oo asaguna ah 200nmile.(2).
Maxaa
qasbay in aanaga kaliya nalagu nasduleeyo Sharciyo ay jabiyeen
Mareykanka (USA) Baddiisu Xuduud ba ma leh, Badweynta Pacific-ka
wixii Gasiirad ku taalay asaga iyo Ingiriiska ayaa iska leh ayadoo u
jirta 400nmile iyo in ka badan, Mareykanku maba saxiixin Heshiiskii
Baddaha ee QM 1982 ,
Sidoo kale
17 dawladood baan saxiixin.
Soomaaliya
wey saxiixday Heshiiskaas aydoon 200nmile aan badalin waxayna la
qabtaa 17 Dawladood oo kale oo Saxiixay se aan Hirgalin.
Baaq ku Socda Web-ka SomaliTalk :
Bahda iyo Maamulka SomaliTalk waxaad Taariikhda ka gasheen Baal dahab ah ,Gu'yaal
fara badanna Soomaali badan ayaa xusi doonta Difaaca iyo cilmi
Baarista ( Research ) aad ka geysateen Badda Soomaaliyeed (3)
Waxaan ku darsaday
Difaaca Badda Soomaaliyeed wareegga labaad Maqaal aan ugu magac
daray :
Webside-ka
SomaliTalk waa difaacaha Badda Soomaaliyeed !!!!.
Annagoon is ogeyn
ayaa Ruug caddaaga qoraha SomaliTalk u joogga Xamar Mudane : Amiin Khasaaro aan
magac saxo mudane ( Amiin Faa,ido) ayaa asaguna sheeko la yaab le ka
sheekeeyey nin ay Baabuur isla soo raaceen oo ka mid ah
Akhristayaasha web-ka SomaliTalk ayaa Amiin weydiiyey Su,aal
Maqaalkaygii u eg oo ah :
SomaliTalk kaliya
maxay u difaacdaa badda Soomaaliyeed ??? ayadoo ay jiraan 1000
webside oo Soomaalidu leeyihiin.
Runtii waa su,aal
meesha ku jirta oo na tusuneysa SomaliTalk in uu Qalmo in uu ku
Guuleysto Abaalmarin Qaran, taasna waxaan ka sugeynaa Baarlamaanka
Soomaaliyeed.
Baaq ku
Socda Baarlamaanka Soomaaliyeed :
Dhaaxaa la idinku
tilmaamay qowleysato aan waxba aqoonin, Dhaaxaa sharftiina Habar
kastaa ku tumatay (4), dhaaxaa dilaalo la idin ku tilmaamay ,
dhaaxaa fara badni aan nafci laheyn la idinku sifeeyey, dhaaxaa
Murtadiin maan gaab idin ku tilmaamay, Dhaaxaa Dhiigiina la
hunguriyeeyey amaba la baneystay oo la daadshay.
Se maanta
Tallabadaad Qaadeen waxaad muujiseen Qaranimo, Wadan Jaceyl,
Waxgaradnimo, Mas'uuliyad iyo Geesinimo aan la koobi karin,
Guuleysta ayaan idin leenahay meel kasta aad joogtaan.
Runtii ayadoo
xabadi idinka dul dhaceyso, qatan oon Mushahaar haysan,Xaasaskiinii
iyo Carrurtiinii idinka fog yihiin ,ayaad u bareerteen in aan Dalka
Difaacdaan oo sharciyo lagu meel maro soo saartaan, waxaanna ugu
Horeeya Badda Soomaaliyeed iyo Hawadeeda oo aad labo mar u
hiiliseen.
Waan soo
noqonayaa ama waan soo socdaa :
Anigoo Baarlamaanka
Soomaaliyeed ka mid ahaa muddo sanad ah jan, 2009 ilaa jan 2010 ,
iskayna iskaga casilay jagadaas oo ahaa 550 kii ugu horeeya ee
wareejiya, ayaan maanta indinku faanayaa waxa aad sameyseen,
waxaanna balan igu ah in aan Meelkasta idinku Difaaco .
Waaban idinka
maseysay waan soo noqonayaa ama waan soo socdaa kow dheh.
Waxaan maqaalkan
farxadda xambaarsan ku soo gunaanadayaa Codsi aan labada Hay'adood u
soo jeedinaayo SomaliTalk iyo Baarlamaankaba in ay isweydaarsadaan
Billad Sharafyo aniga ayaana idiin kala wareejinaaya, maadama labada
Hay'adoodba aan Dhextaal u ahaa !!!!
Waxaan SomaliTalk u
Rajeynayaa horumar iyo Daacadnimo, Baarlamaankana Guuleysta ayaan
leeyahay 335 u Codeysay Difaaca Badda Soomaaliyeed.
FII AMANI
LAAH
EX. XILDHIBAANE
:Shiikh Saahid mohamed yusuf
USA,VA
sahidyusuf@yahoo.com
(1)- waxaan ka soo
qaatay SomaliTalk.com
(2)- Aaga ganacsiga
iyo kheyraadka haatan waxaa loo kordhinayaa 350nmile.
(3)- waxaan
SomaliTalk ku baaraarujin lahaa in ay cilmi baaristooda daabacaan.
(4)- maahmaahdii habar fadhidaa lagdin la fudud !!!! ###
Baarlamaanka Dowladda Federaalka oo Gebi ahaanba
Baabi' iyey Heshiisyadii Badda ee Hore loo galey laga soo bilaabo 1-dii
Janaayo 1991 dii
Faafin: SomaliTalk.com | October 9, 2011
| 
Daabaco
Boggan | Print
