UN-ka iyo jaaliyada soomaalida oo kulan yeeshay

Kulankan oo uu heerkiisu sareeyey, loogana wada hadlayay sidii gacan wada jir ah eey jaaliyada iyo UN-ka, oo kaashana dowlada K/afrika, oga geeysan lahaayeen dhibaatada soomaalida ku heysata dalkani, ayaa waxaa jaaliyada SASA oga qeyb galay wafti 3 xubnood ka kooban, halka UN-ka uu shirka fadhiyey wakiilka u qaabilsan wadamada Afrikada Koonfureed oo lagu magacaabo Mbilinyi Abel, iyo wakiil kuxigeenka Arrimaha degdega ah, Sanda Kimbibi.

Waftiga ka socday jaaliyada soomaalida ee SASA (Somali association of south Africa), ayaa waxaa hor boodayay Axmed Dowlo oo ah agaasimaha guud ee jaaliyada. Iyo Maxamed Xakiim. iyo xubno kale, kulanka oo heerkiisu uu aad u sareeyey marka laga eego darajada madaxda ka qeyb gashay , ayaa waxaa looga hadlay sidii jaaliyada iyo Un-ka eey isaga kaashan lahaayeen wax ka qabashada dhibaatooyinka dadka soomaalida dalkani ku heysta.

SASA ayaa soo bandhigtey si qibrad iyo cilmi baarid ku dheehantahay, dhamaan macluumaadka quseeya soomaalida dalkani, iyadoo la adeegsanayay qalabka casriga ah ee darbiga shaashada ka muujiya ee (projector-ka loo yaqaan). Bandhigaasi ayay SASA ku shaacisey qoraalo iyo muuqaalo ka turjumaya si faahfaahsan heerka dhibaatada soomaalida dalkani ku nool, waxyaalaha eey u baahanyihiin, hormarka eey sameeyeen, duruufaha nololeed ee heysta dadka qaarkood iyo sida ugu haboon ee soomaalida lagu caawin karo, oo eey sheegeen in kaliya eey u baahantahay si wada jir ah in wax looga qabto . Arrimaha ugu muhiimsan ee Bandhiga SASA lagu soo qaaday waxaa ka mid ahaa arrimaha dilka, dhaca, boobka , takoorka iyo mixnadaha soomaalida ka heysta xagga sharciyada oo dad badani eey aad ugu dhibanyihiin .

Axmed Dowlo oo kulanka ka hadlay ayaa hoosta ka xariiqey in dacayaad xagga dowlada ah eey ugu wacantahay dilka soomaalida loo geysto, iyo heerka dambiyada, eeysana ka marneyn jinsi naceyb, wallow taasi eey qeyb ka qaadanayso nooca deegaanada eey soomaalidu ka ganacsato oo tuulooyin ah. Waxa uu intaasi ku daray in SASA eey wax badani ka qabatay xal u helida dhibaatada soomaalida heysata, oo uu sheegey in had iyo jeer eey kala hadlaan dowlada iyo hey’adaha eey quseeyso. Waxa uu halkaasi kusoo bandhigey tirade soomaalida dalka joogta, inta qaxootinimo loo aqoonsaday, inta warqadaha loo garaaca heysata ee aan wali qaxootinimo loo aqoonsan, tirade ardeyda jaamacadaha dhigata iyo malaha tirade ugu muhiimsan ee ah tirada soomaalida dalkani lagu diley inta la diiwaan galiyey.

Dhinaca wakiilka UN-ka mudane Mbilinyi Abel, ayaa sheegey Un-ka had iyo jeer eey diyaar u tahay wax ka qabashada dhibaatooyinka dadka qaxootiga ah ku heeysta wadamada eeysan u dhalan, waxa uu sheegey in eey dowlada ku cadaadinayaan in meel adag eey iska taagto dambiilayaasha falalka dilka geysta ee misane aanan sharciga la horkeenin, waxaa uu sheegey in UN-ka oo kaashanaya SASA iyo dowlada dalkani eey wax ka qaban doonaan dhibaatada soomaalida heysta, gaar ahaan dilka iyo dhaca, dhanka shariciyada ayuu wakiilka waftiga u xaqiijiyey in soomaalida wax weyn looga qaban doono, gaar ahaan in si dhaqso ah loo siiyo sharciyadooda marka eey codsiyada geystaan, paasaboorada lagu safro ee UN-ka, sharciga degenaanshaha rasmiga ah (Permanent Residence), iyo in qof soomaali ah oo mar loo aqoonsaday in uu qaxooti yahay, aanan darajadaasi laga xabuubin Karin sida eey horey SASA ugu doodey dad badana eey ka cawdaan, sidoo kale waxa uu qirey in bangiyada eey dadka qaxootiga hadda wixii ka dambeeya eey account-yo u furi doonaan,si eey kacagahooda ugu keydsadaan. Sida bangiga ABSA iyo FNB oo arrintaasi UN-ka eey ka shaqaysay. Waxa uu intaasi raaciyey in SASA looga baahanyahay in si baaxad leh eey ola shaqaysaa UN-ka, maadaamaa SASA eey tahay jaaliyada kaliya ee shaqaynaysay inka badan 10 sanno , qibrad iyo faham dheeraadna u leh arrimaha bulshada ku saabsan.

Gabagabadii kulanka oo albaabada uu u xirnaa, kana dhacay xarunta dalka ee Pretoria (hadda Tshwane ). Saacadana qaatay ayaa lagu soo gunaanaday jawi fiican oo degan, kulan dambe oo aan la cayimina loo balamay . si loo sii jaan qaado wax qabadka iyo hergalinta waxyaalihii laga wada hadlay.

Kulankii manta oo ka mid ah kulanada ugu heerka sareeya ee madaxda jaaliyada eey la yeeshaan madaxda UN-ka iyo Dowlda dalkani, ayaa kusoo beegmay xilli soomaalida dalkani ku nool eey soo wajahayaan dhibaatooyin fara badan , oo eey UN-ka oo magaceeda eey ku joogaan eey ka filayaan xal dhibaatooyinkooda loo helo.

C/nasir Axmed SH. Bashiir (saxansoxo). Johansburg, South Africa.
saxansoxo1@hotmail.com

Faafin: SomaliTalk.com | Feb 17, 2008