• Ciidamada Itoobiya oo fal aad u xun ka gaystay deegaanka warshaddii hore ee Caanaha
• Qaraxyo ay dad ku dhinteen oo ka dhacay saacadihii la soo dhaafay Muqdisho
• Saalax Badbaado “Nin Nambar Afar iyo Kaaraan aan dhex dhexaad ka aheyn sidee buu Soomaali isugu keeni karaa …”
• Hay’adda Manhal oo deeq raashin gaarsiisay dad ku jira Xerada Carbiska ee deegaanka Afgooye
• Dowladda Talyaaniga oo Baydhabo ka soo dejisay deeq ay ugu talagashay in dadka dagaalada ka Barakacay
• Banaanbax lagu taageerayey shirka dib u heshiisiinta qaran ee Muqdisho ka soconaya oo ka dhacay Muqdisho
• Xubnihii ugu horeeyey Gudiga isku Xirka Haweenka Soomaaliyeed oo lagu doortey Magaalada baydhabo

Ciidamada Itoobiya oo fal aad u xun ka gaystay deegaanka warshaddii hore ee Caanaha

Ciidamada Dowladda Itoobiya ee ku sugan Magaalada Muqdisho ayaa iyaga oo lugeynaya kuna hubeysan qoryo culus waxay soo gaareen guri ku yaala Warshadda Caanaha ee Degmada Hodan, waxaana xiligaasi hor kacayey Wiil Dhallinyaro ah oo indha ka xirnaa, kaas oo geeyey Guriga ay ciidamada Itoobiya falka xun ka sameeyeen.

Ciidamada ayaa markii ay guriga tageen waxay ugu tageen labo dhallinyaro ah oo la sheegay in ay ka mid ahaayeen Maxaakiimtii Islaamiga, markii labada nin gacanta ku dhigeen ayay gurigii dab qabadsiiyeen, iyagoo meel isugu keenay kitaabadii ay akhrisan jireen labada dhallinyarada ah, waxaana falkaasi si aad ah uga carooday dadkii deegaanka, kuna tilmaamay fal aad u fool xun.

Ciidamada Itoobiya ayaa labadii dhallinyaro horey u watay, ilaa iyo haddana lama garanayo meel ay la aadeen.

Bishii Juun ayay ahayd markii Ciidamada Itoobiya ee ku sugan agagaarka Kulliyaddii hore Jaale Siyaad ay halkaasi ku dileen saddex wiil oo Walaalo ah, sidoo kale Ciidamada Itoobiya ayaa Isbitaalka Shifa kala baxay dhowr qof oo dhaawac ahaa, kuwaas oo lagu tuhmayey in ay la shaqeeynayeen maamulkii Maxaakiimta Islaamiga, hase yeehsee wareegto uu dhawaan soo saaray Madaxweyne C/llalhi Yuusuf Axmed ayaa waxa uu ku cafiyey dhamaan dadkii la shaqeynayey ama taageersanaa Maxaakiimta, lama ganaranayo sababaha ay ciidamada Itoobiya iyo kuwa Dowladda u ugaarsanayaan ama u dhibaateynayaan dadkii taageersanaa Maxaakiimta Islaamiga ah. 

Saalax Badbaado “Nin Nambar Afar iyo Kaaraan aan dhex dhexaad ka aheyn sidee buu Soomaali isugu keeni karaa …”

            Siyaasiga caanka ah Saalax Nuux Badbaado oo horey xildhibaan uga ahaa Dowladdii Carta ayaa si kulul u beeniyey qoraal sheegayey in lagu daray liiska Ergada gobalada Waqooyi ee Beesha Isaaq kaga qaybgalay shirka dib u heshisiinta Beelaha Soomaaliyeed ee haatan ka socda Magaalada Muqdisho. “Liiskaas waan arkay mana garanayo cid igu darsatay, waxaana ummadda u sheegayaa in aan ka qaybgelin shirkaasi oo ah mid aan ummadda Soomaaliyeed isku keeneen” ayuu yiri Saalax Badbaado oo intaa raaciyey “Shirka haddii uu yahay shir beeleed, maxay u hogaamin waayeen odoyaasha dhaqanka ee laga yaqaano geyigeena, waan tan ay hogaaminayaan Siyaasiyin uu hormuud u yahay Cali Mahdi Max’ed”.

Saalax Badbaado waxa uu sheegay in shirkaasi uu yahay shir aan wax natiijo ahi ka soo bixi dooni, dadka hogaaminayana ay yihiin dad aan isku keeni Karin bulshada Soomaaliyeed. Mar uu la hadlayey dadka reer Waqooyiga, waxa uu yiri “Anaga ayaa haatan ka soo soconaya Muqdisho iyo xaalkeeda ee ha adinku ha isku imaanina”, Saalax Badaado waxa uu intaasi ku sii daray “Aniga kama soo horjeedi midnimada Ummadda Soomaaliyeed, waxaana jeclahay in ay midoobaan Koonfur iyo Waqooyi, waxaanse aad uga xumahay waxa ka taagan Koofurta Soomaaliya”, waxa uuna intaasi sii daba dhigay “nin u hiilinaya Nambar Afar iyo Kaaraan miyaad Soomaali isku keenaya”.

Siyaasiyiin fara badan ayaa durbaba mucaaraday shirka dib u heshisiinta Beelaha Soomaaliyeed ee haatan Muqdisho ka socda ee galay maalintii shanaad, iyadoo haatan Beelaha ay ka wada hadlayaan sidii ay u xalili lahaayeen wixii khilaafaad ah ee horey u dhex maray.

Hay’adda Manhal oo deeq raashin gaarsiisay dad ku jira Xerada Carbiska ee deegaanka Afgooye

Waxaa maalintii shalay ahayd deeq raashin la gaarsiyey dadka soo barakacay ee ku jira xerada Carbiska ee Deegaanka Afgooye, waxaana deeqdasi isku soo uruuriyey jaaliyadda Soomaaliyeed ee ku nool Magaalada Washington, waxaana qaybinteeda loo xilsaaray Hay’adda Manhal Al-Kheyriya.

Ilaa iyo 650 qoys ayaa qoyskiiba waxaa la siiyey 25 kiilo oo Bariis ah, 25 kiilo oo ah Bur ah iyo 6-Liitar oo Saliid ah, waxaana raashinkaas si weyn u soo dhaweeyey dadweynaha deegaanka oo sheegay in ay tahay deeqdii ugu balaarneed, iyagoo u mahadceliyey Jaaliyadda Soomaaliyeed ee ku nool dalka Mareykanka gaar ahaan Magaalada Caasimadda ah ee Washington.

Deeqdaan ayaa waxaa ammaankeeda sugayey ciidanka nabadgelyada Degmada Afgooye, waxa uuna sheegay Agaasimaha Hay’adda Manhal Cumar Sheekh Axmed in deeqdaani ay ugu talagaleen in la siiyo dadkaasi dhibaateysan ee ay soo barakaciyeen dagaalada, waxaa kaloo uu sheegay in maanta Isbitaalada Madiina iyo Keydsaney ay gaarsiin doonaan lacago deeqo ah oo ka timid jaaliyadda Soomaaliyeed ee ku nool dalka Mareykanka gaar ahaan Magaalada Washington.

Hooyo ka mid ah dadkii la siiyey raashinka oo u warameysay saxaafadda ayaa waxay tiri, ‘waxaan u mahadcelinayaa dadka Soomaaliyeed ee ku nool Mareykanka, waxaana ka rajeyneynaa in deeqo noocaan oo kale ah mar kale na soo gaarsiiyaan.

Dadka Soomaaliyeed ee ku nool Dibadaha ayaa waayadan dambe waxaa looga bartay in ay deeqo kala duwan soo gaarsiiyaan ummadda Soomaaliyeed ee dhibaatadu haysato, waxayna arrintaani laba jibaarantay sanadahan dambe, waayo waagii hore dadka Soomaaliyeed, waxay mucaawinooyin ka sugi jireen hay’ado samafal iyo Dowlado.

Dowladda Talyaaniga oo Baydhabo ka soo dejisay deeq ay ugu talagashay in dadka dagaalada ka Barakacay

Diyaarado siday deeq oo laga leeyahay Dowladda Talyaaniga ayaa shalay ka soo degay  garoonka Diyaaradaha ee Magaalada Baydhabo.

Deeqdaas oo isugu jiray Raashin, Teendhooyin Bustayaal Bacaha laga galo Roobka iyo daawooyin ayay Dowladda Talyaaniga ugu talagashay in loo qaybiyo dadka Soomaaliyeed ee ku barakacay dagaalada.

Deeqdaan ayaa waxaa guddoomay maamulka Gobalka Bay, waxa uuna uga mahadceliyey Dowladda Talyaaniga sida ay mar kasta u garab taagan shacabka Soomaaliyeed.

Deeqdaan waxay ka mid tahay Deeqo Dowladda Talyaaniga ugu talagashay shacabka Soomaaliyeed ee dagaalado aafeeyeen, waxaana la filayaa maalmaha soo socda in Baydhabo ay soo gaaraan diyaarado sida deeqo kala duwan.

Ma ahan markii ugu horeysay ee ay Dowladda Talyaaniga deeqo soo gaarsiiso shacabka Soomaaliyeed.

Magaalada Baydhabo ayaa waxaa gaaray dad fara badan oo ka barakacay dagaaladii dhawaan ka dhacay Magaalada Muqdisho kuwaas oo ku dhibaateysan Magaalada Baydhabo, waxaana la filayaa in maamulka gobalka Bay uu si deg deg ah u qaybiyo deeqdaasi.

Banaanbax lagu taageerayey shirka dib u heshiisiinta qaran ee Muqdisho ka soconaya oo ka dhacay Muqdisho

Maalintii shalay ahayd ayaa Garoona Banadir Statdium waxaa ka dhacay banaanbax lagu taageerayo shirka dib u heshisiinta Muqdisho, waxaana soo qaban-qaabiyey maamulka gobalka Banaadir, iyadoo ay ka qaybgaleen qaybaha kala duwan ee Bulshada, waxayna ddku intooda badan siteen fanaanado ay ku qornaayeen ha hir galo shirka dib u heshiisiinta Soomaaliyeed.

Banaanbaxaan ayaa waxaa ugu horey ka hadlay guddoomiyaha Gobalka Banaadir Max’ed Dheere oo sheegay in banaanbaxaani uu ka tarjumayo rabitaanka qaran Soomaaliyeed, isagoo sheegay in gobalka Banaadir uu ku soo dhaweynayo ergooyinka ka yimid gobalada dalka si loo muujinayo dib u heshisiin dhab ah.

Max’ed Dheere waxa uu u soo jeediyey kooxaha wax tuuraya in ay ka soo qaybgalaan shirkaan oo waxay tabanayaan halkaan ka soo jeediyan.

Shirkaas waxaa sidoo kale ka hadlay guddoomiyaha shirka dib u heshiisiinta beelaha Soomaliyeed Cali Mahdi Max’ed oo sheegay in shirka uu haatan ku socdo sidii loogu talagalay, beeluhuna ay xalinayaan wixii khilafaad ah ee horey u dhex maray.

Cali Mahdi waxa uu sheegay in banaanbaxaani uu beeninayo wararkii maalmahan la faafinayey ee ahaa in shirka dib u heshisiinta loo dhameyn ama ay koox gaar ah wadato.

W/D: Amiin Yuusuf Khasaaro
e-mail:amiinkhasaaro@hotmail.com