Si xun wax u sheegga saxaafadda qaarkeed

Nafiso Jaamac Nuur

nafisonalka@hotmail.com

Saxaafaddu waa quudiyaha maxkaxda ummadda iyadoo wararka darayga ah ee ay
ummadda u gudbiyaan laga haqab beello laakiin waa seef laba af leh, oo
haddii dhinaca xun loo adeegsado madaafiicda wax burburisa ka daran.

Idaacad loo haynweynaan jirey haatanse karamadeedii luntay baan maalin
dhoweyd ka maqlayey war ay sii deysey oo u dhignaa sidan: “Dagaal culus oo
la isu adeegsadey hubka noocyadiisa kala duwan oo xalay ka bilowday
magaalada Muqdisho”.

Warkaas waan ka naxay, waxan is iri maxay tahay belaayada xalay dadka reer
Muqdisho ku soo guuraysay? Waayo waa wax laga damqado waxyeellada ummadda
Soomaaliyeed soo gaareysa.

Haddii aan warkaas sii rogrogey oo aan ilo wareed oo kala duwan raadiyey
waxaan soo helay in wixii xalay ka dhacay magaalada Muqdisho uu ahaa kooxo
wax tuur tuuray kadibna markii dambe iska dhuuntay, inkasta oo khasaare
dhacay, ma ahayn dhacdadaasi mid sii socotey ee waxay ahayd mid qayb ka ah
rabshadaha caasimadda ka dhaca.

Waxaan soo xusuustay warkii idaacaddu siideysey ee ahaa “Dagaal culus oo la
isu adeegsadey hubka noocyadiisa kala duwan oo xalay ka bilowday magaalada
Muqdisho”. Waxaan dib u soo gocday ereyga ah ‘ka bilowday’, waana midka aan
daba socdo, waayo waa wax la wada sugayey sida kooxo ama dhinacyo keeb la
yuurur ahaa oo mar uun xabbadooda la wada dhawrayey oo isu dhaarsanaa,
waxaan ogaadey in ereyga ‘ka bilowday’ uu ku koobnaa rabitaanka idaacaddaas,
waayo idaacaddu iyadaa danayneysey qas iyo qalaanqal daba dheeraada oo ka
holca magaalada Muqdisho, dhab ahaantiina siiqada hadalku wuxuu u dhacayey
in Idaacadda lafteedu ay dagaalka oogeysey oo ay dhibaatada qayb ka ahayd.

“Kooxaha dagaallamayaa waxay kordhiyeen weerarada ay ku qaadayaan ciidamada
dawladda iyo kuwa Ethiopian-ka ah, iyadoo isticmaalaya hubka noocyadiisa
kala duwan iyo miinooyinka meelaha fog-fog laga hago” , Sidaa waxaa soo
celceliya qalabka warbaahinta qaarkiis, taas oo ah xaalad abuur.

Sidoo kale waxaan marar badan maqlaa “maxkamadaha Islaamiga ah ee
Soomaaliya”, ereygaas oo ah waxaan jirin, waayo waa soo noolayn wax laga
gudbey, hadalka saxda ahna waa “maxkamadihii Islaamiga ahaa ee Soomaaliya”.

Markaa waxaa ii soo baxday su'aasha ah saxaafadda Soomaaliya lug ma ku
leedahay dambiyada dagaal ee dalka ka dhacay sidii waddanka Rwanda ka
dhacday oo kale?

Nafiso Jaamac Nuur

nafisonalka@hotmail.com
 

Afeef: Aragtida qoraalkan waxaa leh qoraaga ku saxiixa