Gumaadka indheer-garadka saxaafada iyo oohinta Yaxaaska.
Qore: Jimcaale Rooble
jimcaalerooble@hotmail.com
Inkasta oo si shakhsi ah aan isu aqoonin Marxuum Cali
Iimaan Sharma’arke agaasimihii Shirkada warbaahinta Hornafrik hadana
waxaan nasiib u yeeshay in aan kala qayb galo siminaaro bulshada rayidka
ah qaban qaabisay iyo shirar bulshada qaybaheeda kala duwan isugu
yimaadeen sanadihii 2003 iyo 2005 ta, waxa uu marxuumku kasoo jeediyay
shirarkaas aan ka qayb galay muxaadarooyin iyo fikrado uu ugu tala galay
fagaarayaashaas runtii waxaad dareemaysaa indheer-garadnimada
degenaanta iyo isku kalsoonida ninkaasi ka dhaxlay khibradda iyo aqoonta
uu lahaa.Runtii ma ahayn nin ka shaqeeya xumaanta ee waxa uu ahaa nin ka
shaqeeya in la wacyi galiyo bulshada soomaaliyeed sidii ay uga bixi
lahayd dhibaatada ay ku jirto, waa nin cadowgiisa kaliya uu noqon karo
kuwa doonaya hagardaamaynta bulshada Soomaaliyeed. Halka qof walba oo
dhagaystay barnaamijkii “Muqdisho iyo maanta” ee uu soo gudbin jiray
marxuum Mahad Axmad Cilmi uu dareemi karo mowhibada uu xambaarsanaa
wariyahaas dhalinta yaraa ee hadalkiisu uu xaadaada kicinayo marka uu ka
hadlayo dhibaatada foosha xun ee cadowga shacabka Soomaaliyeed ee is
bahaystay ay u gaysanayaan dadka rayidka ah.
Hadaba su’aahsa la is waydiinayo marka ay jariimadan oo
kale dhacdo waxaa weeye “yaa ka faa’iidaysanaya dilka raggaan ahaa
hormuudka warbaahinta Soomaaliyeed” jawaabta qof kastaa fahmi karaa
waxaa weeye inuu ka faa’iidaysanayo khaarijinta ragaan cadowga Itoobiya
ee dalka soomaaliya qabsaday iyo kuwa heeryada usida oo aan doonayn
marna in la ogaado hawlaha waxashnimada ah ee ay kula kacayaan bulshada
soomaaliyeed , taasoo ku kaliftay inay siyaabo kala duwan isugu dayaaan
inay aamusiyaan shakhsiyaadka ka dhex muuqda Saxaafadda si ay ugu
quusiyaan ragga kale ee warbaahinta ku jira taaasoo isugu jirtay caga
juglayn iyo tahdiid joogta ah , xabsi, iyo ugu danbayntii khaarijin
qaawan.Daliilka labaad waxaa weeye meelaha lagu dilay raggaas waxaa si
joogto ah u jooga maleeshiyada kooxda Mbagati waana meelihii dagaalka
ba’ani ku dhex maray xoogagga muqaawamadda xaq u dirirka ah iyo
ciidamadda gumaysiga Itoobiya iyadoo jariimada dilkuna dhacay dharaar
cad oo aan marmarsiyo lahayn. Daliilka sadexaad: waxaa laga mamnuucay
shirkadaha iyo shakhsiyaadka muhiimka ah intaba inay haystaan hub fudud
oo xadidan si ay isu waardiyeeyaan, taasoo cadowga dalka qabsaday iyo
heeryo qaadyada lasocda u cuntami wayday in qof soomaaliya uu amnigiisu
suganaado.
Marka intaas oo daliil ah aad ogaato waxaad farta ku
fiiqi kartaa cida ka danbaysa Jariimadii lagu laayay madaxdii Shirkada
warbaahinta Hornafrik 11-kii bishan Augost, hadaba oohin iska keenka
madaxda kooxda Mbagathi oo waliba sheeganaya in ragaasi ay isku
dhowaayeen iyo Jeneral Gabre-ha Itoobiya oo ka qayb galay aaska marxuum
Cali Iimaan waxa kaliya oo lagu macnayn karaa waxa ay tahay sida
Yaxaaska oo oohin iska keena marka uu rabo inuu ugaarsado daxiyadiisa,
waana wax qofka dhow iyo kan fogba iska ogyahay ujeedada laga leeyahay
ficiladda noocaas ah iyadoo loola jeedo in indhaha shacabka laga leexiyo
danbiilayaasha dhabta ah taasoo aan waligeed dhici doonin waayo Shacabka
soomaaliyeed gaar ahaan shacabka Muqdisho oo dhibaatooyin iyo xaalado
qalafsani ay soo martay way ka dheregsanyihiin khayaanooyinka loo
maleegayo. Hadaba markaan ogaanay shirqoolada gumaysiga iyo heeryo
qaadkiisa waxaa la is waydiinayaa ma in la aamusiyo warbaahinta xorta ah
oo kaliya ayaa loo laynayaa saxafiyiinta iyo madaxda warbaahinta waa
maya, waxaa jira ujeedooyin kale oo kasii fog taas oo gumaysigu doonayo
waxaana weeye in layska hor keeno bulshada soomaaliyeed iyadoo loo
qaybinayo beel-beel iyadoo la isticmaalayo qaanuunka gumaysigu
waligiisba ku shaqeeyo (Qaybi oo xukun), kadib markii cadowgu ku
fashilmay iska horkeenka shacabka asagoo adeegsanaya shaqo siinta iyo
masuuliyad magacaabid beenaadka taasoo uu dad-na soo dhowaysto dad-na
fogeeyo si beeluhu u kala masayraan oo ugu tartamaan u adeega gumaysiga
, hadana wuxuu bilaabay cadowgu inuu beel walba dadka ugu muhiimsan ka
laayo sida aan arkayno maalmahaan danbe kadibna beel walba farta ugu
fiiqo beesha kale si ay isu laayaan kadibna ay ugu sahlanaato gumaysiga
xukunka iyo sii haysashada dalka iyo dadka Soomaaliyeed.
Waxaa loo baahan yahay in indheergarad-ka
Soomaaliyeed,wadaniyiinta, warbaahinta dhamaan ay isu taagaan isuna
bahaystaan in la fashiliyo khiyaanooyinka gumaysiga waana in ay ogaadaan
in aad nolol gumaysi ku noolaato waxaa kaaga fiican inaad dhimato iskaba
daa hadaad Shahiidnimo hesho waa liibaan dadka nasiibkalihi helaane,
waakii gabayaagii soomaaliyeed lahaa “ ma ogtahay geeriduba marbay
nolosha dhaantaaye” waxaana nalooka baahanyahay dhamaan qaybaha kala
duwan ee shacabka Soomaaliyeed qof walbaahi inuu inta karaankiisa ka
qayb qaato xoraynta dadkeena iyo dalkeena maskax muruq iyo maalba oo aan
lagu halayn xoogagga muqaawamadda Soomaaliyeed oo kaliya ,cadowgu kama
samaysna bir waana xanuunsanayaa waliba waxaa u dheer argagax joogta ah
oo ay ku noolyihiin waana laga guulaysanayaa ilaahay idanki, marka waa
in aan ku faraxnaa shuhadadeena oo aanaan u barooran. Alaah (SW) ayaa
waxa uu kuleeyahay quraankiisa mar uu kahadlayay dagaalka gaalada lagula
jiro (hadii aad xanuunsanaysaan gaaladuba way xanuunsanayaan waxaadna
alaah ka rajaynaysaan wax ayan rajaynayn-oo ah guusha oo aad heshaan,
jannada iyo raali noqoshadiisa. Mahad oo idil Alaah ayaa iska leh
,salaam sare-na muqaawamada Soomaaliyeed ha gaarto.Wasalaamu calaykum.
Qore: Jimcaale Rooble
jimcaalerooble@hotmail.com