 |
|
Sh. Muxamed Idris Axmad
waxa uu halkan kusoo gudbin doonaa maqaal maalinle ah iyo mid asbuuci ah
oo Axadda kusoo bixi doona SomaliTalk.com, insha Allah, ee sidaas la
soco. Sh. Muxamed Idris waxa uu noqday madaxa golaha imaamyadana ee
Woqooyiga Ameerika, iyo Iimaamkii Masjidka Assunah ee Atlanta, Georgia
iyo Masjidka ibn taymiyah ee Columbus, Ohio. Waxaana lagala
xiriiri karaa Emailka:
dalyaqaan@yahoo.com |
|
April 2, 2006 |
SOOMAALI
WADA JIRTA
iyo
Socdaalkayga
Nolosha!
(2)
1aad |
2aad
Waxba uga
noqon mayo, noloshii yaraanta, taasoo aan filayo, inaan wax weyni ku jirin,
meesheeda ayaan se ku sheegi doonaa haddii Ilaahay idmo. Waxaan kasoo qaadanayaa
oo keliya arrimaha la xiriira qadiyadda aan rabo inaan ka hadlo.
DHALASHO!
Waxaan ku dhashay degmada
QANDALA ee gobolka BARI ee Soomaaliya. Taariikhdu wexey ahayd sida la sheegay
1958 ama 57dii, (ma laha facayga sideey u badan yihiin warqad dhalasho). Meeshu
wexey ahayd Baadiye, Togga weyn ee loo yaqaan: JECEEL. Reerkuna wuxuu ahaa
hayaan, roobkii da’ay dorraad dabajooga. Hooyo, ALLAHA U NAXARIISTEE, oo bilihii
uurka dhamaystiratay wexey saarnayd, awr aan soo gaaray anoo hana qaada, iyo
isagoo fac noqday, laguna magacaabi jirey: GAARDI.. Waxaa la ii sheegay, anna
wax ka arkay, inuu ahaa awr fiican oo hayina reerkuna mudda dheer rarteen kuna
intifaaceen.
Goor barqa ah, oo reerku
hayaankaas yahay, hooyona, Allaha u naxariistee, ratigaas fuushantahay, ayaa
foosha jaq lagu siiyey!! Ilaahow kuu naxariiso, oo janadii ku gey. Geed goba oo
weyn, oo hadh qabow, oo togga bartamihiisa ku yaal, ayaa lagu hoos furay, iyada
iyo dumarkii la socday. Goobtaas, geedka hoostiisa ah, ayaa adduunkan iigu
horreysey!! Maantana in badan, oo dad yari mareen, ayaan ka maray, Afrika, Oroba,
Aasiya iyo Ameerika.
Waxaan filayaa, sidaan u
dhashay iyadoo reerku hayaan yahay, ayaa wax iga raaceen, oo aan aniguna u safar
badnahay!! Wax safar iiga fududna maba arag, intaan guriga subaxdii kasoo boxo,
ayaa jidka safar iigu dhashaa, markaasaan dhawr wadan ayaama isu maraa.!!
Waxaas dani idiin kuma jirtee,
yaanan idinku daalin. Haddaan hana qaaday, ma aanan aqoon waxa qabyaaladda la
yiraahdo. Markii iigu horreysey, ee reer hebel iyo reer hebel aan maqlo, ama dad
lakala soocdo, wexey ahayd OLOLIHII anigoo jooga aagga JAWHAR waxaan meel la
joogay muddo bila ah, rag reer MUDUG ah, oo aan markii iigu horreysey ka maqlay
kala qaad qaadka iyo Tafsiirka Qabaliga ah.!! (Reer mudugu hayga raali ahaadaan,
wax xumaana ulama jeedo). Raggaasuna adduunka maanta meel ay kaga jiraan geeri
iyo nolol ma aqaan. Asxaabtayda aanu sanadaha wada soconey ma aanan garan jirin,
cid ay yihiin.
Laakiin markii Soomaalidu is
dishey, oo dagaalka sokeeye dalkeenna ka holcey ayaan beelaha soomaaliyeed wax
ka bartay. Intii 16 sano lagu jireyna dhul badan, iyo beela badan oo
soomaaliyeed ayaan dhex maray, waaya aragnimana waan ka faa’iidey.
SOMMALI WADA
JIRTA!
Tajribooyinka iigu horreyey adeegga guud, oo aan ku aaminey ineey Soomaaliyi
wax wada qabsan karto, midoobi karto, karti leedahay, deeqsi tahay, Fahma
badantahay, wexey ahayd, Markaan Imaam ka Noqday Masjidka (Masjid Assunnah &
Da’wa Center) ee Magaalada ATLANTA gobolka GEORGIA ee dalka Maraykanka
dabayaaqada bartamaha sanadkii 1999.
Masjidka waxaanu si rasmi ah u furnay Sep 5, 1999. Inkastoo August aan bilawnay
ku tukashadiisa.
Masjidkaasi wuxuu ahaa Masjidkii ama markaskii ugu horreeyey ee JAALIYADDA
soomaaliyeed ee Maraykanku asaasto. Iyadoo Xoogga Jaaliyadda Soomaaliyeed ee
Maraykanku da’ yartahay, oo sanadihii 1991 bilaabatay, xoogeeduna ahaa 1994 iyo
95 wixii ka dambeeyey.
MASJID ASSUNNAH
sidee ayeey Soomaalidu ku asaastay iyadoo maraykanka ku cusub? Waa sheeka mudan
in dadka Soomaaliyeed dhegeystaan ama akhriyaan, iyadoo aan Muxaadaraad badan ee
dalka gudihiisa iyo dibadiisaba aan wax kaga tilmaamay, anoo tusaale usoo
qaadanayey, SIDA SOOMAALI WADA
JIRTA OO WAX WADA QABSATA LOO HELI KARO.!!
Soomaalida Atlaanta deggan wexey soo bilaabatay sideetameeyadii markii ay
yimaadeen arday dhawra, iyo qaxooti soomaaliyeed oo yar.
Dadkaasi dad isku xiran ma ahayn. Dad muuqan kara oo si gaara isu taagi karana
ma noqon. Qaarkoodna diintaba uma soo jeedin ee wexey ku dhex milmeen, mujtamaca
Maraykanka, oo ka guursadeen, ilma gaala ahna wey dhaleen.
Markii ay Soomaalida qaxootigu
kusoo korodhay ATLANTA sagaashameeyadii, wexey nolol cusub geliyeen dadkii horay
u joogey oo sii ildaran. Wuxuu igu yiri nin dadkii hore ahaa:
((Haddaan
Ilaahay qaxootiga noo keenin nalama arkeen)).
Wexey markaas Somalidu
asaaseen dugsi yar, oo caruurta qur’aanka loogu dhigo, dadka waaweynna duruusta
loogu akhriyo, salaadaha shantaa iyo jumcaha lagu oogo. Wexey kiraysteen, meel
yar oo ku dhex taal Ilaahay amarki Baar Khamri iyo Kaniisad!!.
Waa meeshii ugu munaasab
sanayd oo ay heleen.
Wexey asaaseen urur ay
meeshaas ku fureen oo bulshada soomaaliyeed u adeega ayna ku magacaabeen:
(Somali
Islamic Society of Atlanta)
.
Mudda hadii halkaas lagu jirey
meeshii dadkii wey qaadi kari weydey, ilmihii iyo dumarkii iyo dadkii wey isku
dhibtoodeen, cariiri awgiis. Guddigii, oo Soomaali oo dhan ka kooban, wuxuu
go’aansaday in meel cusub oo weyn la raadsho, welibana mid la yeesho ay noqoto
oo aan kira ahayn. Mudda hadii la raadshey waxaa lasoo helay, meel weyn oo (7.5
acre) ah, oo aqal kaniisad ahaan jirey ku dhex yaal, inta kalena banaantahay,
qaarna hawd yahay, xaafadaha soomaalidu degantahayna aan ka fogayn, kan ugu
badani gaariga 10 daqiiqo ku imaan karo, Soomaalida maahine muslimka oo dhan wax
tar u noqon karta.
Qiimaha lagu
doonayo waa (US$ 330,000)
Jaaliyaduna markaa lacagba ma haysato.!! Heshiiska hordhaca ah ee
lala galay qolada guriga iyo dhulka lahayd oo hindi ahayd la yiraahdo (Gujraati)
oo HINDUUS ah wexey ahayd, Carbuuntu waa US$ 5000
bil ka dib waxaa la shubayaa
qaybta hore ee lacagta oo ah US$ 85,000 , Dhulkayna waa laydin siinayaa, laakiin
waraaqaha lahaanshaha waxaa weli haysanaya qolada leh ilaa lacagtu dhamaato.
Inta hartayna 13 bilood ayaa bil walba US$ 18,333 la bixinayaa.
Halkaas markey botorineyso,
waxaa laysku qabtay dhulkan yuu inna dhaafin iyo Qar iska tuur ayaad tihiine
xaggaynu lacag uga keeneynaa!! Labadaas talo markey isku dhalaashay, waxaa
go’aankii ku dhamaaday aan meesha iibsanno, Ilaahayna u tala saaranno. Rag
dhawra oo ganacsi yar yar meesha ku lahaana wexeyba Ilaahay la galeen Beeco, (Ballan)
haddii lacagtaas bilna la bixin kari waayo, waxaan u xaraasheynaa ganacsigayaga
oo dhan!!
Allaahu akbar, markaas ayey
soo bidhaantay, xaqiiqada dadka Soomaalida ah ee khayrka iyo wanaagga jecel, iyo
guusha Ilaahay la damcay dadka sidaa isugu duuba.
Waxaa la qabtay shir laysugu
yeeray jaaliyadda, arrimihiina la hor dhigay, loona sheegay baahida loo qabo,
XARUN aynu diinteenna iyo dhallaankeenna ku ilaashanno. Goobtaas waxaa fadhiyey
dad boqol aan wax badan ka badnayn, amaba gaarin. Wexey ballan qaadeen lacag US$
150,000, si qaybta hore ee guriga qiimihiisa loo bixiyo, weyna dhacday oo US$
90,000 ee hormariska ahaa waa la bixiyey, furayaashii guriga iyo dhulkana waa
lalasoo wareegay.
Intaasu markey dhacday,
meeshii la iibsheyna aan weli far la saarin, deyn US$ 250,000 ahna la qabo, oo
heshiiska qalinka lagu duugey, ayaan booqasho ku imi, ATLAANTA, July 1999,
anigoo SUCUUDIGA ka imi.
Sidee ayuu ku fuley Masjid
Assunnah of Atlanta?
Akhri Qaybat 3aad >>>> GUJI
Sh. Muxamad
Idris Axmad
dalyaqaan@yahoo.com
Afeef: Aragtida qoraalkan waxaa leh
qoraaga ku saxiixan
Faafin: SomaliTalk.com | April 3,
2006
SHUKRAN
MALAYSIA: Qaybtii 1aad
| Qaybtii 2aad | Qaybtii 3aad |
Qaybtii 4aad | Qaybtii
5aad | Qaybtii 6aad |
Qaybtii 7aad | Qaybtii 8aad |
Qaybtii 9aad | Qaybtii 10aad |
CALOOL XUMO: 1
| 2 | 3 |
Daabaco
Boggan | Print