Iyada oo uu ololaha doorashada ee Labada xisbi Dimuqraadiyiinta iyo Jamhuuriyintu gallay maalintii ugu danbaysay ayaa ay adagtahay hadda in saadalba laga bixiyo ninka ku guulaysan doona Madaxnimada dalka maraykanka sannadka 2004 Ma George W. Bush mise Senator John Kerry, berri aroorta ayaa gobolada beriga dalka maraykanku waxay u dareeri doonan cod bixinta, iyada oo sida la sheegay gobolada qaar sida gobolka Florida dadka ku nool ay %40 hore codkooda u dhiibteen iyaga oo ka hor mariyey wakhtiga doorashada caadiga ah 2 november iyada oo laga baqanayo inay khaladaad ku yimaadan computerada tirinaya cododka awgood sidii kal hore sannadkii 2000, Weriyayayaasha ku sugan gobolad lagu sheegay inay doorkani yahiin gobolada dhimashada sida Gobolada Ohio iyo Florida ayaa ku sheegaya in lagu jahawareersanyahay cododka dadka laga qaadayo kolba Musharaxa horeeya, iyada oo saacadba saacadda ka danbaysa ay warbaahinta dalka maraykanku sii daynayso fikrado is khilaafsan oo hal cod oo qudhaata is dheer halka qaarkoodna ay simayaan cododka dadka.

 

Iyada oo lagu jiro maalintii ugu danbaysay ololaha doorashada labada musharax ayaa labada ninba waxay sheeganayaan in ay la dagaalami doonan argagixisada sida la ogyahay waxaa dhawaan cajalad video ah oo laga sii daayey televisionka afka carabiga ku hadla ee Aljazeera cajaladda video-ga ah oo lagu sheegay qofka ka hadlaayey inuu ahaa Osama Binladen oo doonaayey inuu saamayn ku yeesho doorashada dalka maraykanka ayaaan la sheegin in kelmadahii Bin laden aanay wax saamayn sidaasi u buuran ku samaynin taageerayaasha labada dhinac iyo weliba dadka aan go'aansan cidda ay codkooda siinayaan, Senator John Kerry ayaa wuxuu olole balaadhan ka gallay maalintii shallaytoole ahayd gobolada florida iyo Ohio wuxuuna Kerry ku cel celinaayey sida ay uga go'antahay inuu la dagaalamo argagixisada wax kasta oo ay ku qaadato, sidoo kale Madaxweyne Bush ayey ahayd Fursadiisi ugu danbaysay shallay wuxuuna ka ololaynaayey isla gobolka florida isaga la hadlaayey taagerayaal badan oo asalkoogu Cuban ah wuxuu ku hadlaayey luuqadda Spanish-ka iyo luuqadda Cubanics isaga oo doonaayey inuu soo jiito dadka Hesbanics iyo Cubanics ku nool gobolka Florida.

Labada xisbi ee Jamhuuriyiinta iyo dimuqraadiyiinta ayaa waxay tababar siinayeen labaatankii cisho ee ugu danbaysay kumanaan Garyaqaano ah iyada oo labada dhinacba ka cabsi qabaan inay dhacdo sidii kal hore 2000 cododkana khaladaad badan galaan, gobolada Ohio iyo Florida ayaa labada Musharax Bush iyo Kerry ay diiradda si weyn u saarayaan iyada oo si weyn loo filayo in natiijada doorashadu ay saamayn weyn ku yeelan doonto labadaasi gobol.

dhinaca Electoral colleges-ka iyo Popular vote-ka ayaa labada musharax midna aanu haysanin lana odhan karin hadda wuxuu haysta taageero ku filan inuu ku guulaysto Musharax kasta waxaa laga raba inuu haysto kalsooni dhan 270 electoral college, sida saadal laga qaaday electoral college-ku tibaaxayso Bush wuxuu haysta 133 electoral college halka kerry ka haysto 123 electoral college, Madaxweyne Bush ayaa maanta la filaya inuu gallo ololahiisi ugu danbaysay rajada uu ku doonayo inuu marlabaad ka arrimiyo xafiiska oval office ee guriga cad isaga oo ka aqbali doona Kiniisadda Kaatoliga ee gobolka florida taageero ay u fidisay waxaana halkaasi ku qaabili doona Baadariga kiniisadaasi oo la yidhaahdo Monsignor Jude O'Doherty, sidoo kale Senator Kerry ayaa isaguna wuxuu taageero ka aqbali doona maanta Kiniisadda Protestantka gobolka Pennyslavenia halkaasi oo uu qudbad u jeedin doono dad taageerayaashiisa oo iskugu iman doona barxadda kiniisadaasi.

Maalintii Arbacada ayaa waxaa si toos ah idiinku soo tabin doona dhammaan natiijooyinka gobolada dalka maraykanka iyo sida labada Musharax George W. Bush iyo Senator John Kerry ay cododka natiijadooda u kala heleen, waxaa hubaal ah in uu labada nin mid ku fadhiisan doono oval office ka guriga cad balse waxaa la yaableh inaan la saadalin karin cidda ku fadhiisan doonta.

Maanta oo ay bishu tahay 1-da November sannadka 2004 haddii ay dhici lahayd dooarashada dalka maraykanku sida uu qaaday barnaamijka CNN/US GALLUP iyada oo ay ka qayb qaadanayaan dooarashada Madaxweyne George W. Bush oo u tartamaaya xisbiga jamhuuriga iyo Senator John Kerry oo u tartamaaya xisbiga Dimuqraadiga iyo Ralph Nader oo ah musharax madax banaan waxay kala heli lahaayeen sida tani

• Madaxweyne George W. Bush                                       %49
• Senator John F. Kerry                                                   %49
• Ralph Nader                                                                 % 1

Sidoo kale idaacadda qaranka maraykanka ee ABC sida ay qaaday maanta oo ay bishu tahay 1 da november saadasha doorashada maraykanku waxay ahayd sida tani

• Madaxweyne George W. Bush                                         %48
• Senator John Kerry                                                        %48
• Ralph Nader                                                                  % 1

Sidoo kale Barnaamijka Zogby Reuters sida uu qaaday maanta

• Madaxweyne George W. Bush                                        %47
• Senator John Kerry                                                       %47
• Ralph Nader                                                                  % 1

Waa xaqiiq in labada musharax ay yahiin qaar madaxa iskula jira lana saadalin karin mid ku guulaysan doona doorashada guriga cad balse waa eegna maalinta arbacada iyo natiijooyinka dhabta ah.

QORAALKII HORE EE DOORSHADA...