Dhambaal Ku Socda Xildhibaanada Baarlamaanka DFKMG oo ku saabsan Difaaca
Dhul-badeedka Soomaaliya
"Xildhibaannada Baarlamaanka waxaan ugu baaqayaa in ay
soo saaraan xeer ay ku cadaynayaan in laga soo bilaabo 2009 in badda
Soomaaliya cabbirkeedu yahay 350 mayl-badeed (oo u dhiganta 648 kiilomiter), si
sheekada 200 mayl ay usoo af-jaranto. Mana jirto wax arrintaas ka hor taagan
baarlamaanka Soomaaliya."
DHAMBAAL.Waxaan Xildhibaanada Baarlamaanka DFKMG Soomaaliyeed xasusinayaa dhaartii ay u
mareen Ummadda Soomaaliyeed oo ay matalaan.
Waxaan kaloo xildhibaannada Baarlamaanka Soomaaliyeed xasuusinayaa
qeybtii weyneed oo lama illaawaanka ahaayd oo aay ka qaateen heshiiskii
Is-fahamka (MOU) ee badda Soomaaliya oo ay dhinac u tuureen, arrintaas ay
is hortaageen
oo ay aad ugu farxeen UMMADDA SOOMAALIYEED.
Anigoon ka daaleynin codsiyaddi faraha badnaa oo aan usoo jeediyay
Xildhibaannada Baarlamaanka ayaa haddana mar kale waxaan ka codsanayaa in ay
soo saaraan xeer ay ku cadaynayaan in laga soo bilaabo 2009 in badda
Soomaaliya cabbirkeedu yahay 350 mayl-badeed (oo u dhiganta 648 kiilomiter), si
sheekada 200 mayl ay usoo af-jaranto. Mana jirto wax arrintaas ka hor taagan
baarlamaanka Soomaaliya.
Intaas waxaa dheer oo aan Xidhibaanada la socodsiinayaa in Qorshahaan loogu
magac daray "Roadmap" uu yahay mid 19-ka December 2011 lagu dhawaaqi doono
xuduud badeedka Soomaaliya ee loo yaqaan "EEZ" (Exculisive Economic Zone) ama
"Aagga Dhaqaalaha ee Gaarka ah".
Sidii aan horayba u sheegay, waxay rabaan in sharci cusub oo ku aadan EEZ
Soomaalida lagu dhawaaqo kaas oo tirtiraayo Law No. 37 (1972).
Wasiirkii Kaluumeysiga ee xukuumaddii Farmaajo ayaa sharciga cusub ee la soo wado ku soo
saxiixay London horaantii sanadkaan.
Horay ayaan ku caddeeyay qoraalladeydii hore oo aad hoos ka arki kartaan in
QORSHAHAAN GURRACAN loo raadsanayo madaxda Soomaaliyeed si aay khalkhal u
galiyaan cabirka badda Soomaaliya.
Maantay rajada kaliya oo UMMADDA SOOMAALIYEED ay leeyihiin tii RABBI kasokow waa adinka oo ah XILDHIBAANADA BAARLAMAANKA SOOMAALIYEED.
Arrintu maantay ma taagna Madaxweyne la doorto iyo R-Wasaare la ansixiyo oo
Baarlamaanku labo dhinac u kala jabo.
Arrinta aad go-aanka ka gaareysaan adinkoo wada mideysan waxaay tahay Batroolka
badda Soomaaliya ku jira oo la rabo in loo gacangaliyo Dowladda Keenya ayadoo la
rabo in lagu suuliyo xeerka badda Soomaaliyeed ee loo yaqaan (Law
No. 37 oo ku saabsan DHUL-BADEEDKA Soomaaliya - Territorial Sea / Territorial
Waters ee soo baxay 10kii September 1972) - oo ah xeer la loodin waayey - in
madax Soomaaliyeed oo baa'bisa loo helo mooyee.
Maantay waxaan wada arkeynaa in la helay Madaxdaas oo hor-boodaya
go'aamada loogu yeeray "Roadmap" oo la doonayo in laga ansixiyo DFKMG.
Go-aamadaas waxaa ka mid ah in 19-ka December 2011 lagu dhawaaqi doono xuduud
badeedka Soomaaliya ee loo yaqaan "EEZ" (Exculisive Economic Zone) ama
"Aagga Dhaqaalaha ee Gaarka ah", halkii laga soo xoojin lahaa xeerkii badda
Soomaaliyeed ee la sameeyey 1972 oo qeexayey xuduudda dhul-badeedka Soomaaliya
oo xilligaas ahaa 200 nautical miles oo ah TERRITORIAL WATERS.
Ugu dambeentii waxaan xildhibaannada Baarlamaanka ka codsanayaa in aaysan
ansixin Qorshahaan Gurracan oo ay la wareegayaan Madaxdaan la adeegsanayo.
Bashir Shekh Moxamed
bashirmohamud@yahoo.com
Tixraac qoraaladii hore:
Qoraaga Magaciisu waa Bashiir Shiikh Maxamed, waana diblomaasi Soomaaliyeed
oo ka soo shaqeeyay safaaraddii Soomaalida ee Stockholm xiligii uu safiirka ka
ahaa halgamaagii weynaa ee ee Cabdulaahi Ciise Maxamuud (Alle ha u naxariistee).
Sannadkii 1979-kiina waxa uu noqday sii hayaha (Chargé
D'affaires) ee safaaradihii Soomaaliya uga furnaa waddamada Sweden, Denmark
iyo Norway.
Faafin: SomaliTalk.com | September 11, 2011
Daabaco
Boggan | Print
