Is Badalkii DFKM ahi ma waxa uu noqday Iibsiga Badda Soomaaliya?

Cabdiqani Makhtal Maxamed
cmakhtal@yahoo.com
0025290637448
Laascaanood Sool

Soomaaliya waxa ay ku taalaa Geeska Afrikadda bari sidoo kalena eegaya Baddweynta Hindiya iyo waliba Badda Cas, waana wadanka ugu Badda iyo Xeebta weyn Afrika waxaa lagu qiyaasaa 3333km ,Badda Soomaliya waxaa ku duugan oo hoosteeda ku jira Macdan kala duwan walibana kala qaalisan waxaana ka mid ah Shidaal, Kaluumo qaybihiisa kala duwan I.W.M mana jirto cid wali ka faa’iidaysata.

Dawlad la’aanta Soomaaliya awgeed ayaa wadamadda dariska laha iyo waliba kuwa shisheeye ee horumaray ay damceen in ay Siyaabo kala duwan u hantiyaan amase uga faa’iidaystaan Badda baaxadaas leh ee cidladda ah dadkii lahaana ay iyagu isku jeedaan.

Kenya waxa ay ka mid tahay wadamadda xaddka badda iyo dhulkaba la leh Soomaaliya iyada oo ka faa’iidaysana dawlad la’aanta iyo waliba xasilooni daradda Soomaaliya ka jirta awgeed ayaa waxa ay biliqo iyo waliba sheegasho aan geedkaas gaadhsiinayn kula dhaqaaqday badda Soomaaliya.

Q.M ayaa ku wargalisay in wadankasta oo leh Badd uu soo cabiro uuna soo gudbiyo ugu danbayn 13.May.2009 hadii kalena ay qaadan doontaan Badda wadankaas Haayad hoostagta Q.M, ayna ka kiran doonto Wadano kale ,lagana wareejinayo wadankii horay u sheegan jiray

Xukuumadda wadanka Kenya oo ka faa’iidaysanaysa mudadaas la qabtay iyo waliba xasilooni daradda dalkeena cidna aan iskaga tirinayn in ay ka celiso badda Soomaaliya maadaama aysan jirin Dawladd Soomaaliyeed oo ay madaxdeedu wadaniyiin yihiin , ayaa waxa ay cabirtay dhul badeed Soomaaliyeed oo baaxadiisu dhan tahay 38,000km ah oo saddex xagal ah, Kenya waxa ay iska indho tirtay xadkii badeedkii ay la wadaagtay Soomaaliya lana hirgaliyey 1924-kii, sidoo kalena waxa ayba Xadkeenan dhexda ka marisay Jasiiradda ugu wey Lama-Shaaqa, kuna began Magaladda Kismaayo sida ku cad warbixinta Somalitalk

Cabirkan Kenya gudbisay waxa uu marag u yahay qoraal sanadkii tagay lagu qoray Daily Nation-ka Kenya laguna tarjumay Somalitalk, waxana wariyihii diyaariyey ku sheegay in Soomaaliya loo kala qaybinayo labo gobal laguna kala darayo Kenya iyo Itoobiya, Donald Kipkorir oo ahaa qoraha Maqaalkaas ayaa sheegay in Itoobiya ay qaadato waxa ka sareeya Loolka 4 Degree halka Kenyna waxa ka soo hooseeya, hadaba miyaan Kenya wadadaas aysan hadeer hayn iyada oo ka soo bilawday dhanka Badda?.

waxaa la sugayey in Dawladda ku meel gaadhi ah ay keeni doonto is badal Nabadeed, Siyaasadeed iyo waliba Wadaniyeed balse riyadaasi waxa ay noqotay Lamood noqonse weydey, mar hadii Dhalinyaradii iyo Shiikhyadii la lahaa waa fursadii nabad wadan balse ay u dhaqaaqeen Iibsiga Badda Soomaaliya

Dawladda ku meel gaadhka ahi waxa ay si indho la’aan ah ugu dhacday qorshe ay Kenya ku taamaysay mudo, waxna iminka Kenya u hirgashay in ay hanato qayb ka mid ah Badeena taas oo ay Fududaysay aqoon la’aanta iyo waliba xilkas daradda Madaxdda hugaamisa DKM ah

Dawladda ku Meel gaadhi ahi ma jirto awood ay ku gali karto heshiis xuduudeed, sida uu qeexayo Axdiga u degsan, Awoodeeduna waxa ay tahay in ay ka shaqayso Nabadgalyadd, Dib u heshiisiinta iyo in ay dalka gaadhsiiyo sidii ay uga qabsoomi lahaayeen Doorashooyin xor ah balse awood uma laha in ay fara galiso wax qaranimadda Soomaaliya kala dhantaalaya balse Aqoondaradda iyo iska indho tirka ay Mas’uuliyiinta DKM ah ku hayaan Dastuurka u yaala dalka ayaa sababaya in ay ku dhaqaaqaan wax walba oo ay ka helayaan Samdareerooyin aan anfa badan u lahayb .

Dawladda ayaa waxa ay ahayd in ay ka faa’iidaysato qodobka 79aad iyada oo ka baxaysa Heshiiskaa maadaama ay Soomaaliya ka jiran arimo bini’aadamku uusan hadeer waxba ka qaban Karin, Raysulwasaaraha DKM ah oo taageeraya heshiiskan ayaa sheegay in labadda wadankaba ( Kenya iyo Soomaaliya) ay Q.M midoobay u gudbinayaan cabirka Baddahooda iyo waliba macluubaadka ku jira balse waxaa xusid mudan maxaa u diyaarsan xukuumadda Omar Cabdirashiid, hadeerse ma u tafa xaydan kartaa in ay ka macluumaadka laga rabay ka gaadhsiiso ? Jawaabtu waa May! Waayo waxa ay u baahantahay hawshan Aqoonyahano heer sarre ah, tixraac taariikhdii iyo waliba heshiisyadii hore ee Badeena, waxa kale oo ay u baahan tahay hawshani dhaqaale lagu fududeeyo DKM ahina warkeeda waan la soconaa talaabadda kaliya ee u furinaya waa in ay ka baxdo heshiiskaa.ayna ka faa’iidaysato qodobka 79aad si ay adhax-jab ugu noqoto Cadawgeena, wixii kale oo ay uga gudubtaa waa Ceeb!

Bulsho weynta Soomaaliyeed gudo iyo dibaddba waxa looga baahan yahay,talaabadan guracan ee ay ku kaceen madaxdda DKM ahi in looga jawaabo si waafaqsan wadanimo iyo geesimo

1 waa in Jaaliyadaha Dibadu ay sameeyaan Banaanbaxyo waa weyn oo ay uga soo horjeedaan heshiis beeneedkan dhex maray DKM ah iyo wadanka Kenya kaas oo Kenya ku qaadanayso qayb ka mid ah Badeena, sidoo kalna u gudbiyaan dalalka reer galbeedka, Q.M iyo cidkasta oo arinkan wax ka qaban karta in uu heshiiskaasi ahaa mid aan waxba ka jirin, DKM ahina aysan Awood u lahayn

2 Aqoonyahanadda, Warbaahinta iyo waliba dadweynaha guduhu waa in ay taageeradii kala noqdaan DKM ah hadii aysan si deg deg ah uga bixin heshiis beeneedkan ay Kenya ugu ogalaatay in ay ku qaadato Badeena sidoo kalena waa in ay Mas’uuliyiintu garawsanaan khiyaamadda qaran ee ay ku kaceen, waa ina in mar danbe aysan ku celin waxaanu ogalaanay in labadda wadanba ay Q.M u gudbiyaan Xuduud badeedka ay sheeganayaa waayo lama hayo lama helayo warbixin lid ku ah tan Kenya oo la barbar dhigo

Cabdiqani Makhtal Maxamed
cmakhtal@yahoo.com
0025290637448
Laascaanood Sool

Wadado Maantaad jaanis haystaane sidii Dagaal Oogihii oo kale ha noqonina