Gabay: Qabarka Yaw Sheega

Maxamuud Axmed Cabdalle 
Email: mabdalle@gmail.com  

09/01/2008 

Afeef: Salaan dhammaantiin. Gabaygan waxa abwaanku ku faallaynayaa Soomaalida xaaladdeeda meesha ay marayso. Haddii dad lagu magcaabay waa dad uun shaqo “public” ah haya, lagana hadli karo. Gabayguna sidiisaba been haddii lagu sheego, oo runta laga leexiyo, macnaha ayaa ka luma. Akhris wanaagsan. 

1. Soomaalida iskala qaybisee, qoonba dhan u jeedo’
2. Ee Amxaar qabbaankii noqdaye, qaalliga u dhiibtay
3. Inaan qolo wanaag lagu helayn, qabarka yaw sheega 
    
4. Odayada qudhaadhee u go’ay, qaadka cunististiisa
5. Ee qiil Suldaannimo watee, quruxda moodaaya
6. Inaan sharafi ugu qoolanayn, qabarka yaw sheega 
    
7. Wadaadada qamuunyaysan ee, soo quturanaaya
8. Ee dirirta qaashka u sitee, qaraxshey baaruudda
9. Inaan qorigu qiime u gelayn, qabarka yaw sheega 
    
10. Qabqablaha ku qooqee arlada, qaati laga joogo
11. Ee qudha ka jarayee naflaha, qaatilnimo sheegtay
12. Inaan mawdka laga qaalibayn, qabarka yaw sheega 
     
13. Qurba joogga wada quustayee, qaarad kale aaday
14. Ee quruska raacdaynayee, qaxa ku baayaalay
15. Inaan qaayo lagu soorihayn, qabarka yaw sheega 
     
16. Qayl wada munaafaqad watiyo, weriye qiiraysan
17. Qalloociisa ina Yabarow iyo, Yuusuf qarawgiisa
18. Beentay quweeyaan dishaye, qabarka yaw sheega 
     
19. Qalyayuubka qaran baan dhisniyo, qaab darrada joogta
20. Qaneecaadka Soomaalinnimo, qaafil baan garane
21. Inay qar iyo buur saaran tahay, qabarka yaw sheega 
     
22. Hiiraale wuxu qoonsadee, qaabad kale geeyey
23. Ee Kismaanyo qoodha ugu jari, waa qabiidnimo’e
24. Inuu qoomammo u soo horkici, qabarka yaw sheega 
     
25. Qandaraaska muuqdee baddii, lagu qadhiidhaayo
26. Suntan lagu qubiyo macadintaa, layska qodanaayo
27. Nabsi qaamud seben baa xigiye, qabarka yaw sheega 
     
28. Qafaalkiyo afduub, tuugadeer wada qamaamaysa
29. Naftan qoorta laga goyn, haddaan qarash la dhiibaynin
30. Qahar iyo dhibbay soo kordhine, qabarka yaw sheega 
     
31. Qarankeenni inuu maalin uun, qaawi noqonaayo
32. Qaynuunka iyo kala dambayn, laysu quminaayo
33. Qudhunleyda inan bohol ka qubi, qabarka yaw sheega! 

W.T Maxamuud Axmed Cabdalle (shiine)

Email: mabdalle@gmail.com