Sheikh Shariif "ciidamada bixitaankooda wuxuu bilaabanayaa markii la
sixiixey heshiiska, laakiin…" Shir jaraa’id
JABUUTI: Gudoomiyaha Is-bahaysiga Dibu-xoreynta Soomaaliya Sheekh Shariif Sh.
Axmed oo dhowaan dib ugu soo noqdey Jabuuti ayaa shir jaraa’id oo uu kaga
hadlayo safaradii kala duwanaa ee uu kusoo kala bixiyey dalallka Masar iyo
Suudaan, xaalada guud ee dalka Soomaaliya iyo heshiiskii ay ku kala sixiixdeen
ARTS-ta iyo TFG-da, ku qabtey Hoteel Imperial ee Caasimada dalka Jabuuti.
Sheekh Shariif Sh. Axmed
Sheikh Shariif waxaa uu shirkiisa jaraa’id ku sheegey “ dalallka aan tagney
waxay ahaayeen Masar iyo Suudaan, labada dal waxay ka mid yihiin dowlado
Afrikaan ah, dadkoodana muslimiin yihiin, islamarkaana si weyn u daneeya arimaha
Soomaaliya, inay la socdaan Is-bedalka dhacay aad ayey muhiim u tahay, ujeedada
ugu weyn Safarka waxay ahayd in la gaarsiiyo xaalada Soomaaliya iyo dowrka
loogaa baahan yahay, waxaana la kulaney Wasiirka Arimaha dibada Masar iyo
Xog-hayaha Guud ee Jaamacada Carabta, waxaana u sharaxney dhibaataada dalka ka
jirta, halka uu marayo shirkaa dibu-heshiisiinta iyo arimaha gar gaarka, waxaana
ku guulaysaney in wadahadaladii Jabuuti ka dhacay ay gacan ka geysanayaan, ayna
diyaar u yihiin wax kasta oo suurta gal ah oo arimaha Soomaaliya qayb ka
qaadankara, sidoo kale waxaan tagney Suudaan waxaana u sharaxney duruufaha ka
jira Soomaaliya iyo dowrka looga baahan yahay aad bayna u soo dhaweeyeen
wadahadaladii shirka dibu-heshiisiinta waxayna balan qaadeen inay xoojin doonaan
dadaalka dibu-heshiisiinta la wado”
Sheikh Sharif waxaa kale oo uu shirkiisa jaraa’id ku sheegey “Waxaa kale oo aan
kala hadalney waxbarashada maadaama waxbarashadii ay baaba’dey in waxbarashada
sare la siiyo ardeyda Soomaaliyeed, xisada waxbarashada la siiyana aad loo
kordhiyo, taasina balan qaad fiican ayey ka dhiibeen, marka loo laabto
heshiiskii halkan ka dhacay, wuxuu lahaa muhiimad gaar ah, sababtoo ah in loo
gudbo wax qabad waa wax weyn, in labada gudi ay diyaariyaan waa arin muhiim ah,
waxaana ka dhalan doonta in xal laga gaaro dhibaatada Soomaaliya, hadaan la
fasirin waxa ka socda Soomaaliya oo aan loo fasirin caalamka waa dadaal gaaban,
waana meelaha ay wax ka qaldamaan, mudadii uu Is-bahaysiga jirey waxaa awooda la
saarayey in la sharxo Is-bahaysiga waxa uu yahay, waxaana lagu guuleystey in
joogitaanka Ethobia uu khalad yahay, sidaas darteedna waxaan shacabka
Soomaaliyeed ugu baaqayaa inay taageeraan nabada, sida xabada loogu raadiyo
inaan diblamaasiyada ugu raadino ayaa loo baahan yahay, maanta caalamka ayaa
ogol in lala fariisto is-bahaysiga, taasina waa fursad in laga faa’iideyto ayaa
mudan aynu u garano in ay tahay, Soomaaliya qayb aduunka ka mid ah, waana aragti
gaaban in arinteena aan keligeen xalisan karno, waxaana ku khasbanahay inaan la
tacaamulno, ha noqdaan kuwo aan nagu Diin ahayn iyo kuwa nagu Diin ahba, inagoo
ilaalineyna Mabaadii’deena, jiritaankeena iyo sharafkeena, islamarkaana
fiirineyna duruufta markaa aynu ku jirno, inagoo maanka ku hayna duruufta
dhaqaale ee dalka ka jirta iyo mida Insaaniga ee dalka jirta,”.
Dadka Soomaaliyeed mudo 19 bilood ka badan waxay jiifaan Geedaha hoostooda,
dhaqaalihii waa la baabi’iyey, dadkii Xoolaha lahaa intooda badan wey ka tageen
dalka, bal ee waxaa la gaarey dadkii wax tarkaa u ahaa in la ugaarsano, arintaas
waxay keeneysaa in la siibadiyo dhibaatada, sidaas oo kale dadkii ka shaqeynayey
Hay’adaha gargaarka hadii la afduubo oo la dhibaateeyo waxay keeneysaa iyaduna
dhib kale” ayuu shirkiisa jaraa’id ku sheegey Sheekh Shariif.
Sheekh Shariif iyo Shariif Xasan oo goob joog ka ahaa shirka jaraa'id
Sheikh shariif waxaa kale oo uu ka hadley falkii lagu duqeeyey masjidka weyn ee
ku yaal Suuqa Bakaaraha ee Abaa Hureyra, wuxuuna yiri “runtii waa wax lala yaabo
in dadd muslimiin ah oo masjidka ku tukanaya la duqeeyo waana wax aan weli ka
dhicin Soomaaliya, waxa dhibaatadaas geysanaya waa cadowga jooga dalka.
Sh. Shariif
Sheekh Sahriif mar la weydiiyey dagaalada ka socda Magaalada Kismaayo ayaa
wuxuu yiri “dagaalka ka socda Magaalada Kismaayo, anagu wax shaqo ah kuma lihin,
majiro fikir aan ku taageereyno, sababtoo ah ma jiro cid laga qabsanayo iyo cid
loo qabano”
Sidoo kale mar aan weydiiyey Sheekh Shariif xiliga rasmi ahaan ee loo qabtey in
ciidamada Ethobia ay kaga baxaan iyo xiliga ay bilaabaaneyso ayaa wuxuu yiri “ciidamada
bixitaankooda wuxuu bilaabanayaa markii la sixiixey heshiiska, laakiin gudiga
nabadgelyada ayaa diyaarinayo qaabka ay u baxayaan”
Maxamed Macallin Cismaan(All-man) Somalitalk Jabuuti.
fatxumaalik@hotmail.com
Faafin: SomaliTalk.com | August 22, 2008
Shirkii Jabuuti oo la
soo geba-gebeey iyo Qodobbo sharaxaad badan yeelana oo laga soo saarey
Warbixin iyo Sawirrada Gabagabadii shirka
Guji.. Aug 19
|
Daabaco
Boggan | Print
Cudur
maskaxeedka loo yaqaan ”Autism” oo ku soo badanaaya caruurta
soomaaliyeed ee qurbaha. 
DFKMG
oo Heshiis u Saxiixday Shirkadaha Batroolka ee Kuwait Energy iyo Medco
Energi...
WAREYSI:
Professor Axmed Ismaaciil Samatar