Cumar Sheekh Cali (Cumar dheere) “TFG danta ayaa khasabtey ee anagu ma
khasbin, waxayna arkeen inayna dowlad noqon Karin, waxayna qaadeen ceeb
Taariikheed...” wareysi xiiso badan (Qaybtii labaad)
Hore waxaa loo sheegi jirey in Soomaaliya ay argagixiso joogto, ayna ka
tirsan yihiin Maxkamadaha Islaamka iyo Is-bahaysiga bal kawaran arintaas, xagey
ku dambeysey, Cumar dheere ?.
Waxaa
uu ku ku jawaabey “ anigu horta xiligii Maxkamaddaha dalka ma joogin, laakiin
markii dambe ee dalka aan joogey wali ma arag ruux Al-qaacida ayuu ka tirsan
yahay oo meel socda la leeyahay, haddii markii hore sidaa la dhihi jirey, dalka
waa la soo galey, marka mas’uuliyiinta Mareykanka ay saxaafada ka hadlayaan,
waxay dhihi jireen nimankii qarxiyey Safaaradaha Nayroobi iyo Daarusalaam ayaa
jooga Soomaaliya, hada Maxkamaduhu kama taliyaan dalka, hada dalka waxaa jooga
Ciidamo Ethobia iyo Wax-garaadkii Mareykanka oo wax walba adeegsadey, wali hal
argagixiso ah oo la soo qabtey ama Ajnabi ah nalooma sheegin intii ay dalka
joogeen, shaley hadii ay xaajadu ahayd in Soomaaliya ay argagixiso joogto oo aan
walina la helin, taasi waxay ina tusinaysaa in waxa la sheegayey ay been ahayd
oo mar marsiiyo dalka lagu soo galo oo keli ah la doonayey, waxaana maqalnay in
Mareykanku uu dadd Soomaali ah duqeeyey, laakiin waxaan qabaney, iyagoo leh wali
ma maqal, dagaal oogayaashii way joogaan iyo Ethobia-nkoodaba, marka aawey wixii
la sheegi jirey, arinta dadka dembiyadda gala laba shey ayaa looga hor tegi
karaa, in dalka Soomaaliya uu helo dowlad koontaroosha xuduudaheeeda iyo
qaranimadeeda.
Adigu ma waxaad qabtaa in lagu baneysaneyey soo gelitaanka dalka Soomaaliya,
mise ra’yi ka duwan ayaad qabtaa?, waxaa uu yiri Cumar dheere “ waxay ogaadeen
in dalkaan uusan lahayn wax dowlad la yiraahdo, waxa keliya ee la dooneyey waa
in dalka la ssoo galo, xalka keliya ee looga hor tagi karo waxay ahayd in dowlad
qaran la dhiso, waxaana xal noqoneyn oo la arkeyn in Soomaaliya lagu soo duulo
oo la qabsado, iyadoo la leeyahay Soomaaliya dowlad ma aleh, waxa jooga cid
koontarooli karta ma jirto, waxa keliyaa oo wax ogaan kara waa dowlad, wax kasta
oo la sheego run iyo been waa in Soomaaliya dowlad ka dhisanto.
Cumar dheere adigu ma waxaad leedahay xubno ka tirsan Al-qaacida oo Ajnabi ah ma
joogaan Soomaaliya iyo xubno kale oo Soomaali ah oo ka tirsan Al-qaacidada?
Waxaa uu ku jawaabey “horta qofka Soomaaaliga ah dalkiisa ayuu joogaa,
Af-kaartana lama koontarooli karo, qofna qofka kale Maskaxdiisa ma ilaalin karo,
sababtoo ah London baa wax lagu Qarxiyey, Mareykanka sidoo kale, Baariis sidoo
kale iyo Madrid dhamaan goobahaas, wixii ka dhacay waxaa loo saariyey
Al-qaacida, marka hadii ay Soomaaliya Al-qaacida ayaa joogta la yiraahdo, mida
joogta wadamadaas ayey la mid tahay, oo lama waardiyey karo, Af-kaarta oo wey
soconeysaa, laakiin qofka waxaa la koontarooli karaa ficilkiisa waxaana
qabaneysa dowlada oo marineysa wixii uu muteystey, Soomaaliya aduunka ayey la
mid tahay, wax iyadda gaar u ah ma jiro, mana dhihi karo wey jiraan iyo ma
jiraan, laakiin wey dhici kartaa dadd fikir ahaan ku qanacsan.
Mareykanku wuxuu calaamadeystey dadd gaar ah oo Soomaali ah, wuxuuna ku darsadey
liiska argagixisada ee bal kawaran arintaas?, waxaa uu ku jawaabey Cumar dheere
“markii aan tagney Qaramada Midoobey arintaas waa nalagu soo hadal qaadey,
waxaana ka qaadaney hal mow-qif dhamaanteen, waxaana u sheegney in 100% aan ka
soo horjeedno, in qof Soomaali ah lagu sheego Argagixiso, iyadoo cid ku
cadeyneysa uusan jirin in lagu daro, liiska Argagixisada, dadkii hore loogu
dareyna waxaan u sheegney in laga saaro liiska, sababtoo ah ma jiro qof
Soomaaali ah oo Qarxiyey meel oo loo hayo cadeyn, waxaana la sheegaa qofkaas
waxaan ku tuhmeynaa inuu xiriir la leeyahay Al-qaacida, taasina ma noqoneyso wax
shaqeynaya, in ruuxaas sidaas xuquuqdiisa loogu xad gudbo, inta hada liiska lagu
qorey ma jiro wax dembi ah oo ay galeen, dowladaha Mareykanka iyo Ingiriiska
waxay sheegaan, qofka ugu badan waxaa la leeyahay wuxuu diley Wariye, waana arin
tuhun ah, Qaanuunkuna wuxuu dhigayaa, in qofku uu asalkiisba dembi beri ka yahay
ilaa laga helo cadeymo, tuhun ma ahan in qof xurayadiisa loogu xayiro ama
dhiigiisa loogu baneysto, qofka Soomaaliga inaan difaacno waa mas’uuliyad na
saaran, waana mid akh-laaqi ah taasi.
![](28aug22.jpg)
Khilaafkii Is-bahaysiga dhexdiisa ahaa xagee buu ku dabeeyey, maadaama aad adigu
tahay ku xigeenkii arimaha dibadda ee ARS, islamarkaana in badan oo ka tirsan
Caalamka Dhegahooda iyo Indhahooda ay kusoo jeedaan?
Waxaa uu ku jawaabey “horta khilaafka Ururka sida dadka barkiisa ay u
maleynayaan iyo waaqiciga dhabta ah, waa ay kala yihiin, sideedaba qof kasta oo
Soomaali ah waa loo baahan yahay, ma jiro qof laga deeqtoomi karo, khilaafkuna
wuu fara badan yahay, Ummadda Soomaaliyeedna wuu dhibi khilaafku, mana ogola
xiligan, waana wax dadka awoodiisa wiiqa oo cadowgu uu ku soo galo, waxa maanta
keeeney baddeena in ay ku dabaaladto Ethobia waa khilaafka Soomaaliya in mudo ah
ay ku jirtey, Ummadii waa ay bur burtey, marka loo fiiriyo Urur kala jabay,
horta anigu Raga meesha jooga waanu Ixtiraameynaa, oo manta agteena Miizaan bey
ku leeyihiin, laakiin wax kala jab la yiraahdo ma jiro, sababtoo ah Hogaanka
Ururka isku meel buu joogaa, marka loo fiiro inta halkaas joogta oo aan ogahay
in ay yihiin 20 qof, balse sheegtey 31 qof, Golaha dhexe wuxuu ka kooban yahay
191 xubnood marka nisbada ka soo hartey waa la garankaraa, Gudiga fulinta wuxuu
ka kooban yahay 45-xubnood, shan xubnood baa halkaas kjoogta, marka inta dhimana
waa la garankaraa, marka Urur kala jabey ma jiraan, laakiin shekh-siyaad aan
qiimeyneyno wey jiraan, waana jecelnahay in dibu-heshiisiin la sameeyo, laakiin
walaallaheena xagood ayey ka socon weysey, walina anagu ma aaminsanin in la xiro
Al-baabkii wada hadalka, mar walbana wuu furan yahay.
Ma jiraa wax tilbaabo ah oo ka duwan tii Sanco oo aad qaadeen, hadii aad
qaadeena maxaa idiin kaga soo baxay?
Cumar Idirs Cumar dheere wuxuu ku jawaabey “ markii hore oo Sanca laysugu tegey
taas waa laga heshiiyey, laakiin markii ay ku noqdeen Asmara, waxay ku
dhawaaqeen Urur cusub, waxayna sheegeen in hogaankii xilka laga qaadey, ayna u
dhiibeen xubin cusub, markii ay taasi dhacadey, dadd badan ayaa arintii shoog ku
noqotey, mana jiraan tilaabo kale oo aan qaadney, hada waxaa jira shekh-siyaad
si gooni gooni ah wax u wada oo noosoo sheegay in ay wax wadaan, laakiin mada’a
ahaan anagu waxaan qaadaney, inaan qofna la Af-lagaadeyn, maxaayeeley qofka
muslimka ah in la caayo ma banaana, in sharakooda Diineed iyo tan
Soomaalinimadooda oo aan wax u dhimin, oo aan wadno Muxaawalada.
Dhowaan waxaa lagu Af-duubtey Ceelasha Biyaha, Wariyeyaal Ajnabi iyo xubin
Soomaali ah, waxaana lagu Tuhmayaa xubno ka tirsan Is-bahaysiga in ay ka
dambeeyaan falkaas, bal ka waran arintaas maxaad u sheegeysaa Caalamka?.
Cumar dheere wuxuu ku jawaabey “marka laga reebo kuwo cadowga ah oo lala
diriraayo, horta marna ma ogolin, mana waafaqsana mabda’eena in dadd la
Af-duubto, waliba dadka Joornaaliisteyaasha iyo shekh-siyaadka muhiimka ah ee
hay’adaha u shaqeeya, in ay dalka yimaadaan oo ay ogaadaan waxa ka dhacaaya,
ayna tebiyaan dan-derida haysata shacabka Soomaaliyeed, tan kale Joornaaliistaha
oo dhib loo geysta waxay la mid tahay in aan la ogaanin dhibka shacabka lagu
hayo, in la Af-duubtey Wariyeyaal waan maqley, ee in dadd ka mid ah Is-bahaysiga
ay Af-duubteen anigu ma hayo macluumaadkaas, hadii ay jirto arintaas,
Is-bahaysigu waa inuu raadiyo oo soo qabto, Maxkamadna la soo saaro, waana
waajib arintaas in mardambe aysan dhicin, waana in laga dagaalamaa, waana
Cambaareyneynaa falkaas cida ku kacdey iyo cida dhibaateysa shekh-siyaadka u
shaqeeya Hay’adaha oo bulshada wax u qabadkooda ka shaqeynaya, cida Saxafiyiinta
Af-duubaneysa waa kuwo cadowga u adeegaya, waana kuwa dhibaateynaya shacabka
Soomaaliyeed, waxayna doonayaan in ay ka dhigaan Soomaaliya Kawaan xiran oo cid
ay soo gashaa aysan jirin, waxayna u adeegayaan Ethobia-ka iyo kuwa la shaqeeya.
Md. Cumar Dheere Rajo intee la eg ayaad ku qabtaa in uu hirgalo heshiiskii
Jabuuti ARS iyo TFG?.
Cumar Dheere waxaa uu ku jawaabey “ horta wax meel kasta ku baaba’ayo waa Ummada
Soomaaliyeed oo meel kasta jooga, waxaana hoos u dhacay Sumcadii iyo Maalkii ay
lahayd, wax kasta oo la ssameeyo oo lagu soo celinayo Qaranimadii iyo Midnimadii
Ummada Soomaaliyeed, waxay dan ugu jirtaa iyaga, cawoga waxaa dan u ah inaysan
heshiin Soomaaliya oo isaga mar walba loo tago, qof kastana waa inay dareento in
heshiiska dan u yahay in Ethobia ay dalka ka baxdo, heshiiskuna waa warqad,
waxayna ku xiran tahay, dadaalka la bixiyo, lana ogaado in dhibka uu kusoo jiray
shacabka Soomaaliyeed in mudo ah, lana soo gaarey sidii looga bixi lahaa,
layskana ilaawo Aargoosi, waayo wax ma badbaadiyo.
“Taasi waa na siib daro, TFG waxa isku hayo waa Xabashida, mana laha Barnaamij
siyaasadeed, mid wadaniyadeed iyo is jeceyl dhexdeeda ah oo ay iskula joogaan,
sababtoo ah Ethobia ayaa maalinba mid erisa, sida Cali Geedi oo kale, kuwana wey
isku keentaa, waxayna rabtaa subax kasta uu mid u soo dacwoodo Gabre oo ah ninka
ugu soo horeeya ee ay u yimaadaan, marka uu ka weynaado khilaafka Gabre loo
gudbo Meles, khilaafkan soo kala dhexgaley labada mas’uul, waxaan u arkaa
xubnihii Nabada wadey in meesha laga saarayo” ayuu kaga jawaabey Cumar dheere
su’aashan aan weydiiyey sidee buu ku guulaysanayaa heshiiskan aad la gasheen
TFG, waayo iyada dhexdeeda wali waxaa ku jira khilaaf wajiyo badan leh, gaar
ahaan mas’uuliyiinta sare?.
Ugu dambeyn Md. Cumar Dheere addinka waxaad joogtaan Jabuuti, qaarkood baddaha
ayey ku baaba’yaan, qaarkood Geedaha hoostooda ayey gaajo ugu dhimanayaan,
qaarna dhaawacyadii soo gaarey ayey la ildaran yihiin, qaar kale Xabsiyada
dunida ayey ku xiran yihiin iyagoo dac dareysan ee marka sow ma haboona shacabka
Soomaaliyeed ee Gudaha jooga, inaad wax la qaybsataan intaad joogi lahaydeen
halkaan?.
Ugu dambeyn waxaa uu ku jawaabey “ Is-bahaysiga Jabuuti keli ah ma joogo, waxa
ka difaacayo cadowga Muqdisho, Baladweyne iyo Gobolada kale ee dalka waa
Is-bahaysiga, Is-bahaysiguna wuxuu leeyahay garab siyaasadeed iyo mid Militeri
ee anagu waxaanu nahay garabka siyaasadeed, waxaan Habeen iyo maalin wadnaa
dagaal diblamaasiyadeed oo lagu difaacayo dalka, marka Is-bahaysigu shacabka wuu
la joogaa, waxaana la joogaa mas’uulyiintiisa sar sare qaar ka mid ah, waxa
difaacayo shacabka ka mid baanu nahay, laba Jab-hadoodd baanu nahay mid gudaha
ka dagaalameysa iyo mid dibada ka dagaalameysa.”.
Dhamaad
Maxamed Macallin Cismaan (All-man) Somalitalk Jabuuti.
fatxumaalik@hotmail.com
Faafin: SomaliTalk.com | August 30, 2008
|