Suuqa Garoobyada Waxbaa Kasi Ah
WQ: Cali-Daahir X Muxammad
mohiyadin@hotmail.com
Waxaan Ku Billaabanayaa Magaca Alle Ee Naxariista Badan
Naxariista Khaaska ahna leh. Nabigeennii Muxammadna Naxariis
Iyo Nabadgelyo Dushiisa Ha Ahaato.
Tan iyo markii aan billaabay qoritaanka kitaabka aan ku
magacaabay:
Isbaaradii Dumarka
Kadib markii aan ku baahiyay websidyada cutubka 1aad ee
kitaabka oo aan ku magacaabay:
ILama Guursan Kartid Waa Gaalnimo
((
Halkan Waxaad ka akhrisan kartaa cutubka 1aad )).
Ayaa waxaa igu soo xoomma goob walbaa oo aan joogaba walaalo
cabbursanaa oo mar uun doonayay in baabkan lafuro. Halka walaalo
badanna ay igula soo xiriireen Email wallaw ay walaalaha Emailka
igula soo xiriiray ay ku kala aragtiyo duwanaayeen. Waxayna
isugu jireen qaar mu’ayidiin iyo mucaaradba leh waana sida
caadada insaanka u badan.
Walaalaha igu soo xoomma kolkay I arkaanba waxay qoraalka
ka fahmeen inaan hayo dumar badan oo dhibaataysan iyagoo ii
muujinaya inay daacad ka tahay inay caawiyaan gabdhahaa
walaalahood ah ee loogaga dhaartay in loo furo baabka isla
guursiga.
Raggaasi waxay isugu jiraan kuwo xaasas leh iyo kuwo aan
xaasasba lahayn waxaana ka go’n sida ay ii muujiyeen inaanay u
aabayeeli doonin wixii ka dhasha oo ah carro ka timaada dhanka
xaasaskooda, halka qaarna ayba farxaan kolkay I arkaan kolka
aan kula kaftamo:
Oo maanta si baad u faraxsan tahaye sidee bay wax u jiraan?
Kolkaa bay iigu jawaabaan:
Xaaskii Baa I Fasaxday!
Taasoo macnaheedu uu yahay, waxay igu tiri: Waad ila guursan
kartaa.
Halka qaar kalena ay igu wareersheen ii raadi mid juuqla’ ah
isagoo kawada ii raadi mid qudbo sira ah.
Haddii Alle idmo mawduucaasi qudbo siradana waxaad kaga bogan
doontaa cutubka sadexaad ee kitaabka oo aan u bixiyay:
Qudba Siradu Waa Qaan Kugu Maqan
Waxaase ka horeeya cutubka labaad oo ah:
Guuxa Garoobyada
Kolkii ay arintu sidaa iigu caddaatay ayaan goostay bal inaan
walalaha aanan rajo tirin oo aan ka caawiyo arintaa intii
karaankayga ah.
Waxyaabihii aan ku caawin karayayna waxa uun bay ahaayeen
goobo aan garanayay oo u badan masaajido ay iska diiwaan
geliyaan dadka guur doonka ah. Kolkii aan waraysanay goobihii
bal inay jiraan dumar Soomaali ah oo isugu jira gabdho, garoobyo
iyo caraamiil laga geeriyooday oo u baahan in agoonta lala
koriyo? Waxaa naloogu jawaabay hal gabar oo u dhalatay Soomaali
inaysan faylkooda uusan ku jirin balse ay hayaan dumar kale oo u
dhashay ummadaha kale ee muslimiinta iyo kuwo soo islaamay.
Waxaanse ka cudur daaranayaa inay mar labaad rag kale oo fara
badan ay igu soo xoommaan markay maqlaan inay wax uun jiraan.
Waxaa cajiib ah in raggu badankood raadinayeen hablo
Soomaaliyeed. Balse waxaa aad wax loola yaaba ah in garroobyadii
iyo caraamishii laga geeriyooday ee la caawin lahaa ay
kaalintoodii gabeen.
Waxaan shaki lahayn haddaad sidaa kusii socotaan in ay aad u
adkaan doonto sidii suuq laydiinkugu heli lahaa, maxaa yeelay
rag badan baa hadda diyaar idinla ah inay idiin caawiyaan isla
markaana ay dhagahoodu ku bateen dumar Soomaaliyeed oo aad u
badan baa dhibaataysan kadibna goostay inay qaadaan isbaaradan
xaaraanta ah ee ku dhisan garaad la’aan iyo naxariis darro
gaamurtay oo ay u dhigteen dumar walaal lammood ah oo waalan.
Talo
Waxaa iga tala ah inta ay arintu qoyan tahay inaad fadhiga ka
kacdaan oo aad midowdaan maxaa yeelay kuwo xaasaska qababa way
idiin midoobeen oo aad bay isaga kiin ilaaliyaan.
Intii aan ku hawlanaa baaritaanka mawduucan waxyaabihii iigu
yaabka badnaa ee aan la kulmay waxaa kamid ahaa fadhi ay
yeesheen dumar la qabo kuna saabsanaa inuu xaafadda ku
dhuumaalaysanayo nin qarsanaya xaas labaad ee waa in lasoo
qabtaa.
Dadka aad walaal ka dhiganaysaan ee ukhtii ukhtii aan waxba
ka jirin idinku maaweeliya kol kolna aad caawisaan oo idinku
xammaasha kolkii ay odayga idiin kala baqaana idiin erya waxba
haka sugina
Sidaa darteed waa inaad midowdaan oo aad is raadsataan isla
markaana aad is diiwaan gelisaan sida ugu dhaqsiinyaha badan,
madaxna waa inaad yeelataan oo idiin kala haga isla markaana
gudbiya codkiina, qofkaasina waa inuu yahay qof dumar ah oo xil
kas ah xogtiina hoosana aad is dhaafsan kartaan.
Waxaa kale oo idiin kugu bishaaraynayaa in dumarkii xaasaska
lahaa ay hadda aad u jilceen oo hadda sheekadii ahayd car ila
guurso waa la isaga daba yimid ee idinka codkiina hala maqlo.
Sidaa darteed waa inaad yeelataan idaaro gaar ah oo
qaabilsan qaabilaadda ragga ay soo eryaan xaasaska dhibka badan
ee ku andacooda wuu ila guursaday IWM iyagoo marmarsiinyo ka
dhiganaya masayr aan jirin maxaa yeelay shareecadu marna masayr
ma diidin oo waligeed waa la masayri jiray tan iyo intii
bani’aadam jiray balse diidmadu waa jaxdi waana arin laga madax
adaygayo aayaadka Alle waana gaalnimo hadduu qofku xallaashado
diidmadaasi Allaynu ka magan galnaye.
isla markaana waa inaad meelaysaan ninkaa lasoo eryay iskuna
daydaan inaad u dhammaystirtaan inta u hartay ee xaasas ah si
aan loo maqal dumar danbe oo ku andacooda wuu ila guursaday.
Waxaan kaloo idiin kugula talinayaa inaad la tashataan
culimada caamiliinta ah ee diinta Alle sideeda ugu dhaqma si ay
idinkaga digaan kuwa dhagarta badan ee dumarka khiyaameeya.
Iskana ilaaliya kuwa cullimo lammoodo oo dhuuna qaatayaal ah.
Towfiiqda Allaha Ina Waafajiyo
WQ: Cali-Daahir X Muxammad
mohiyadin@hotmail.com
Afeef: Aragtida qoraalkan waxaa leh qoraaga ku saxiixan